રેપર અને સિંગર ‘કિંગ’ એટલે કે અર્પણ કુમાર ચંદેલ હવે એક્ટિંગની દુનિયામાં પગ મૂકવા જઈ રહ્યો છે. તે વેબ સિરીઝ ‘લુક્ખે’થી પોતાનું એક્ટિંગ ડેબ્યૂ કરી રહ્યો છે, જેમાં તેની સાથે પલક તિવારી પણ જોવા મળશે. આ સિરીઝ એમેઝોન પ્રાઇમ વીડિયો પર સ્ટ્રીમ થઈ ચૂકી છે. રિલીઝ પહેલા દિવ્ય ભાસ્કર સાથે ખાસ વાતચીતમાં બંને કલાકારોએ પોતાના પાત્ર, ઓડિશન, મિત્રતા, યુવાનો પર ડ્રગ્સની અસર, સોશિયલ મીડિયા અને AI જેવા મુદ્દાઓ પર ખુલીને વાત કરી. પ્રિન્સે જ્યાં પોતાના પાત્ર ‘બદનામ’ની વિચારસરણી સમજાવી, ત્યાં પલકે ‘સનોબર’ના ભાવનાત્મક પ્રવાસ સાથે જોડાયેલી રસપ્રદ વાતો શેર કરી. પ્રશ્ન: જ્યારે તમને ‘લુક્ખે’ ટાઈટલ વિશે જાણ થઈ ત્યારે પહેલું રિએક્શન શું હતું? પ્રિન્સ: મને પહેલા ટાઇટલ નહીં, વાર્તા સંભળાવવામાં આવી હતી. વાર્તા એટલી દમદાર લાગી કે, ત્યારે જ નક્કી કરી લીધું હતું કે આ પ્રોજેક્ટ કરવો છે. પછી જ્યારે ‘લુક્ખે’ નામ સાંભળ્યું, ત્યારે લાગ્યું કે આ ટાઇટલ વાર્તા પર બિલકુલ ફિટ બેસે છે. પ્રશ્ન: વાર્તામાં એવી કઈ વાત હતી, જેણે તમને સૌથી વધુ પ્રભાવિત કર્યા? પ્રિન્સ: વાર્તા ધીમે ધીમે ખુલે છે. એમાં એવા પાત્રો છે, જે બદનામ થઈને નામ કમાય છે. એ જ વસ્તુ મને સૌથી વધુ રસપ્રદ લાગી. પ્રશ્ન: પલક, તમને ‘લુક્ખે’ કેવી રીતે મળી? પલક તિવારી: પહેલા મને ઓડિશનની સ્ક્રિપ્ટ મળી. એમાં બે સીન હતા અને તેને વાંચીને હું રડી પડી. ત્યારે જ લાગ્યું કે આ ખૂબ જ ભાવનાત્મક અને અસરકારક વાર્તા છે. પ્રશ્ન: ઓડિશનનો અનુભવ કેવો રહ્યો? પલક: મેં ઘણી વાર ઓડિશન આપ્યા. લગભગ છ-સાત વાર બોલાવવામાં આવી. પછી જ્યારે સિલેક્શન થયું અને આખી વાર્તા ખબર પડી, ત્યારે લાગ્યું કે, મેં જે વિચાર્યું હતું, તેના કરતાં આ વધુ સારું છે. પ્રશ્ન: આટલું કામ કર્યા પછી પણ તમે ઓડિશન આપો છો? પલક: ચોક્કસ. મને લાગે છે કે ઓડિશન એક એક્ટરની ફરજ છે. તમે પાત્ર કેવી રીતે ભજવશો, તે બતાવ્યા વિના, ફક્ત રોલ માંગવો યોગ્ય નથી. મને ઓડિશન આપવું ગમે છે. પ્રશ્ન: પ્રિન્સ, તમે પણ ઓડિશનને જરૂરી માનો છો? પ્રિન્સ: હા. જેમ ગાયકે સતત ગીતો બનાવતા રહેવું જોઈએ, તેવી જ રીતે એક્ટર માટે ઓડિશન જરૂરી છે. આનાથી કલાકાર પોતાને વધુ સારો બનાવે છે. પ્રશ્ન: મ્યુઝિકથી એક્ટિંગમાં આવવું કેટલો અલગ અનુભવ હતો? પ્રિન્સ: મારા માટે આ ખૂબ જ મજેદાર રહ્યું. ગ્રીષ્મ અને દેબુએ વાર્તા એટલા સારા ઇરાદાથી બનાવી હતી કે તેને ભજવવામાં વધુ મજા આવી. પ્રશ્ન: તમારું પાત્ર ‘બદનામ’ વાસ્તવિક જીવનમાં તમારાથી કેટલું મળતું આવે છે? પ્રિન્સ: ઘણું અલગ છે. બદનામ ઘણા ખોટા નિર્ણયો લે છે, હું તેવો નથી. પરંતુ એક વસ્તુ મળે છે કે, તે પોતાના પરિવાર અને પોતાના પ્રિયજનોને ખૂબ પ્રેમ કરે છે. પ્રશ્ન: પલક, તમારું પાત્ર ‘સનોબર’ તમારાથી કેટલું મળતું આવે છે? પલક: અમે બંને ઘણા અલગ છીએ, પરંતુ એક વાત સામાન્ય છે કે સનોબર પોતાના પરિવાર અને સ્વજનોને ખૂબ મહત્વ આપે છે. તે દરેક નાની વસ્તુ માટે આભારી રહે છે અને આ વાત મારા જેવી છે. પ્રશ્ન: શું તમે સનોબરના જીવન સાથે પોતાને જોડી શકો છો? પલક: અમુક હદ સુધી. પરંતુ તેનું બાળપણ ખૂબ મુશ્કેલીઓમાં વીત્યું, જ્યારે મારો ઉછેર ખૂબ સુરક્ષિત વાતાવરણમાં થયો. તેથી તેની દરેક પરેશાની સાથે હું સંબંધ બાંધી શકતી નથી. પ્રશ્ન: સિરીઝમાં ડ્રગ્સ અને ખોટા રસ્તાઓની વાત બતાવવામાં આવી છે. યુવાનોને શું સંદેશ આપવા માંગશો? પ્રિન્સ: આ શો ફક્ત ડ્રગ્સ વિશે નથી, પરંતુ તેના પરિણામો વિશે છે. જો કોઈ પોતાને આ પાત્રોમાં જુએ છે, તો તેને સમજવું જોઈએ કે ખોટા નિર્ણયોનું પરિણામ શું હોય છે. પ્રશ્ન: જો કોઈ યુવાન ભટકેલો મળે તો તમે શું સલાહ આપો છો? પ્રિન્સ: સૌથી પહેલા હું તેને સમજાવવાનો પ્રયત્ન કરું છું કે જીવનમાં તેના માટે સૌથી જરૂરી શું છે. દરેક મુશ્કેલી સમય સાથે પસાર થઈ જાય છે, તેથી કોઈ ખોટી વસ્તુ પર નિર્ભર રહેવાની જરૂર નથી. પ્રશ્ન: પલક, તમે આ મુદ્દાને કેવી રીતે જુઓ છો? પલક: આજના સમયમાં આના પર વાત કરવી ખૂબ જ જરૂરી છે. આ ફક્ત મ્યુઝિક ઇન્ડસ્ટ્રી સુધી સીમિત નથી, સ્કૂલ-કોલેજ અને આખી દુનિયામાં આ સમસ્યા છે. જેટલી જાગૃતિ ફેલાશે, તેટલું સારું રહેશે. પ્રશ્ન: પલક, તમને પ્રિન્સનું કયું ગીત સૌથી વધુ પસંદ છે? પલક: મને એમના બધા ગીતો ગમે છે. ‘Maeri Jaan’ થી હું એમના સંગીત સાથે જોડાઈ હતી, પણ ‘લુક્ખે’ માં એમના લખેલા ગીતોએ મને ખૂબ પ્રભાવિત કરી. ખાસ કરીને ‘હમ જી લેંગે’. પ્રશ્ન: પ્રિન્સ, ‘હમ જી લેંગે’ તમારા માટે ખાસ કેમ છે? પ્રિન્સ: કારણ કે આ ગીત માત્ર સિરીઝ માટે જ નહીં, વાસ્તવિક જીવન માટે પણ મહત્ત્વ ધરાવે છે. તેમાં આશા, પ્રેમ અને સંઘર્ષની વાત છે. પ્રશ્ન: પલક વિશે શું કહેવા માંગશો? પ્રિન્સ: પલક ખૂબ જ પરિપક્વ અને સમજદાર વ્યક્તિ છે. તેમણે હંમેશા પહેલ કરીને મિત્રતા નિભાવી. તેમનો સૌથી સારો ગુણ એ છે કે તેઓ કોઈપણ રૂમમાં જઈને લોકોને પોતાના બનાવી લે છે. પ્રશ્ન: AIના વધતા ઉપયોગને તમે કેવી રીતે જુઓ છો? પ્રિન્સ: AI એક સારું ટૂલ છે, પરંતુ માનવીય ભાવનાઓ અને લાગણીઓને બદલી શકતું નથી. હું હંમેશા વાસ્તવિક અને દિલથી બનાવેલી વસ્તુઓ પર વિશ્વાસ કરું છું. પ્રશ્ન: મધર્સ ડે પર શું ખાસ કરવાના છો? પલક: તે દિવસે વહેલા ઘરે જઈશ અને મમ્મી સાથે વધુ સમય વિતાવીશ. મમ્મીને વધારે કંઈ જોઈતું નથી, બસ સાથ જોઈએ છે. પ્રશ્ન: તમારી વાયરલ સોશિયલ મીડિયા વીડિયો પર શું કહેવા માંગશો? પ્રિન્સ: હું ઇન્ટરનેટ પર વધારે એક્ટિવ રહેતો નથી. રીલ્સ અને વાયરલ વસ્તુઓથી થોડો દૂર જ રહું છું. પ્રશ્ન: સૌથી યાદગાર DM કયો હતો? પ્રિન્સ: તાજેતરમાં એક છોકરાનો મેસેજ આવ્યો હતો, જે ખૂબ મુશ્કેલ સમયમાંથી પસાર થઈ રહ્યો હતો. તેની વાત વાંચીને તેની પરેશાની અનુભવાઈ અને મેં તેની મદદ કરી. પ્રશ્ન: પલક, તમે DM વાંચો છો? જવાબ/પલક: સાચું કહું તો હું DM વધુ વાંચતી જ નથી.