બોલિવૂડ એક્ટર શાહિદ કપૂર ટૂંક સમયમાં ફિલ્મ ‘ઓ રોમિયો’માં જોવા મળશે. આ ફિલ્મમાં પહેલીવાર તેની જોડી એક્ટ્રેસ તૃપ્તિ ડિમરી સાથે જોવા મળશે. તાજેતરમાં દિવ્ય ભાસ્કર સાથેની વાતચીત દરમિયાન શાહિદ કપૂરે તૃપ્તિ સાથે કામ કરવાના અનુભવ વિશે વાત કરી અને તેના ખૂબ વખાણ કર્યા. શાહિદે કહ્યું કે- તૃપ્તિ એક ખૂબ જ શાનદાર એક્ટ્રેસ છે અને ફિલ્મમાં તેનો કિરદાર ખૂબ જ સુંદર રીતે લખવામાં આવ્યો છે. તેણે જણાવ્યું કે ફિલ્મમાં તેના અને તૃપ્તિના કિરદારો વચ્ચે જે સંબંધ છે, તેની જર્ની ઘણી યુનિક અને રસપ્રદ છે. શાહિદના મતે, જ્યારે પણ બે કલાકાર પહેલીવાર સાથે કામ કરે છે, ત્યારે તેમાં એક અલગ પ્રકારની ફ્રેશનેસ હોય છે અને જો તે યોગ્ય રીતે બેસી જાય, તો તેની અસર સ્ક્રીન પર સ્પષ્ટ દેખાય છે. શાહિદે આગળ કહ્યું- મેં તૃપ્તિ સાથે કામ કરતી વખતે ખૂબ આનંદ કર્યો. તે હવે તેની કારકિર્દીના એવા તબક્કામાં છે, જ્યાં તે સતત સારું કામ કરી રહી છે. આ રોલ તેને ખૂબ જ શોભે છે અને જ્યારે દર્શકો ફિલ્મ જોશે, ત્યારે તેને તે સ્પષ્ટપણે દેખાશે. ફિલ્મ ‘ઓ રોમિયો’નું નિર્દેશન વિશાલ ભારદ્વાજે કર્યું છે અને આ શાહિદ સાથેની તેની ચોથી ફિલ્મ છે. આ ગેંગસ્ટર ડ્રામા ફિલ્મ 13 ફેબ્રુઆરી 2026ના રોજ વેલેન્ટાઇન ડેના અવસરે સિનેમાઘરોમાં રિલીઝ થશે. ફિલ્મમાં નાના પાટેકર, રણદીપ હુડ્ડા, વિક્રાંત મેસી, દિશા પાટની અને તમન્ના ભાટિયા પણ મહત્વની ભૂમિકાઓમાં જોવા મળશે.