રિયાલિટી શો ‘બિગ બોસ’ની 20મી સીઝન માટે સલમાન ખાન હોસ્ટ તરીકે પરત ફરશે. વેરાયટી ઇન્ડિયાના રિપોર્ટ અનુસાર, તે 21 સપ્ટેમ્બરથી નવી સીઝનનું શૂટિંગ શરૂ કરી શકે છે. આ પહેલા સલમાન ખાન ડિરેક્ટર વામસી પેડિપલ્લીની આગામી એક્શન થ્રિલર ફિલ્મનું મોટાભાગનું શૂટિંગ પૂરું કરવાની તૈયારીમાં છે. આ ફિલ્મમાં નયનતારા પણ જોવા મળશે. સૂત્રો અનુસાર, એક્ટરની ટીમ તેના શૂટિંગ અને શોના શેડ્યૂલને કોઓર્ડિનેટ કરવામાં વ્યસ્ત છે. ‘બિગ બોસ 20’ માટે શોર્ટલિસ્ટિંગ અને ઓડિશન ટૂંક સમયમાં શરૂ થવાની અપેક્ષા છે. સૂત્રોનું કહેવું છે કે શોના મેકર્સે ઘણા જાણીતા ટીવી પર્સનાલિટીઝનો સંપર્ક કર્યો છે અને પ્રારંભિક વાતચીત ચાલી રહી છે. રિયાલિટી શોના કેટલાક સ્પર્ધકોને નવી સીઝન માટે પણ સામેલ કરવા પર વિચાર કરવામાં આવી રહ્યો છે. આ પહેલ OTT દર્શકોના એન્ગેજમેન્ટને ધ્યાનમાં રાખીને કરવામાં આવી રહી છે. ઉપરાંત, શોના કેટલાક જૂના સ્પર્ધકો પણ પાછા આવી શકે છે. શોના ફોર્મેટ અને સ્પર્ધકોની યાદી વિશે વધુ માહિતી આગામી અઠવાડિયામાં સામે આવી શકે છે. ‘બિગ બોસ 19’ માં ગૌરવ ખન્ના, ફરહાના ભટ્ટ, અમાલ મલિક, તાન્યા મિત્તલ અને બસીર અલી જેવા સ્પર્ધકો સામેલ હતા. બીજી તરફ, સલમાન ખાન ડિરેક્ટર અપૂર્વ લાખિયાની ફિલ્મ ‘માતૃભૂમિ: મે વોર રેસ્ટ ઇન પીસ’ માં જોવા મળશે. આ ફિલ્મમાં ચિત્રાંગદા સિંહ પણ છે. સલમાન ફિલ્મમાં કર્નલ બિક્કુમલ્લા સંતોષ બાબુની ભૂમિકા ભજવી રહ્યો છે. ફિલ્મની રિલીઝ ડેટ હજુ નક્કી થઈ નથી. બિગ બોસનો ઇતિહાસ બિગ બોસનો વિચાર 1997માં નેધરલેન્ડમાં શરૂ થયેલા શો બિગ બ્રધર પરથી લેવામાં આવ્યો હતો. ભારતમાં આ શો 2006માં આવ્યો. શરૂઆતમાં તેને વધુ સફળતા મળી ન હતી, પરંતુ સમય જતાં તે સૌથી ચર્ચિત રિયાલિટી શોમાંથી એક બની ગયો. પહેલી સિઝનમાં રાહુલ રોય અને કેરોલ ગ્રેસિયસ જેવા નામ હતા. શોના પહેલા હોસ્ટ અરશદ વારસી હતા, પછી શિલ્પા શેટ્ટી અને અમિતાભ બચ્ચન જેવા સિતારાઓએ શોને હોસ્ટ કર્યો. 2010થી સલમાન આ શોને હોસ્ટ કરી રહ્યો છે.