સુપ્રીમ કોર્ટે કહ્યું છે કે ભારતમાં ક્રિકેટ પર BCCIનું નિયંત્રણ હવે કાયદેસર રીતે પણ માન્યતા પામી ચૂક્યું છે. આ ટિપ્પણી તે અરજીની સુનાવણી દરમિયાન આવી, જેમાં માગ કરવામાં આવી હતી કે ભારતીય ક્રિકેટ ટીમને ભારતીય ટીમ કે ટીમ ઈન્ડિયા કહેવાથી રોકવામાં આવે. ગુરુવારની સુનાવણીમાં જસ્ટિસ જોયમાલ્યા બાગચીએ વર્તમાન પરિસ્થિતિ પર ટિપ્પણી કરતા કહ્યું કે પરિસ્થિતિ ક્યારેક એવી થઈ જાય છે જાણે પૂંછડી જ કૂતરાને હલાવી રહી હોય. તેમનો ઇશારો એ વાત તરફ હતો કે ક્રિકેટમાં પૈસા અને તાકાત એટલી વધી ગઈ છે કે આ સવાલ ઊભો થવા લાગે છે કે અસલી નિયંત્રણ આખરે કોના હાથમાં છે. BCCI સરકારી સંસ્થા નથી- જસ્ટિસ સૂર્યકાંત
આ મામલાની સુનાવણી મુખ્ય ન્યાયાધીશ (CJI) જસ્ટિસ સૂર્યકાંતની અધ્યક્ષતાવાળી બેન્ચ કરી રહી હતી. અરજદાર તરફથી દલીલ કરવામાં આવી કે BCCI એક ખાનગી સંસ્થા છે, જે તમિલનાડુ સોસાયટી રજીસ્ટ્રેશન એક્ટ હેઠળ નોંધાયેલી છે. તેનું કહેવું હતું કે BCCI ન તો કોઈ સરકારી સંસ્થા છે અને ન તો બંધારણના અનુચ્છેદ 12 હેઠળ રાજ્યની કેટેગરીમાં આવે છે, તેથી તેને ભારતીય ક્રિકેટ ટીમને રાષ્ટ્રીય ટીમ કહેવાનો અધિકાર ન હોવો જોઈએ. જોકે, અદાલત આ દલીલ સાથે સહમત નહોતી. જસ્ટિસ જોયમાલ્ય બાગચીએ કહ્યું કે વર્તમાન સમયમાં BCCIનો ભારતીય ક્રિકેટ પર પ્રભાવ અને નિયંત્રણ માત્ર વ્યવહારિક રીતે જ નહીં, પરંતુ કાયદેસર રીતે પણ સ્વીકારવામાં આવ્યું છે. તેમણે એ પણ સ્પષ્ટ કર્યું કે સરકાર તરફથી BCCIને સંપૂર્ણ સમર્થન પ્રાપ્ત છે, જેનાથી તેની ભૂમિકા વધુ મજબૂત બને છે. કોર્ટનો સમય બરબાદ ન કરો
સુપ્રીમ કોર્ટે આ અરજીને ફાલતુ ગણાવીને ફગાવી દીધી. કોર્ટે અરજદારને સખત ઠપકો આપ્યો અને ચેતવણી આપી કે આવા કિસ્સાઓમાં ભારે દંડ પણ લાદવામાં આવી શકે છે. સુનાવણી દરમિયાન જસ્ટિસ સૂર્યકાંતે નારાજગી વ્યક્ત કરતા કહ્યું કે તમે ઘરે બેઠા અરજીઓ ડ્રાફ્ટ કરી દો છો, કોર્ટનો સમય બરબાદ ન કરો. તેમણે એ પણ યાદ અપાવ્યું કે દેશમાં નેશનલ સ્પોર્ટ્સ ટ્રિબ્યુનલ સુધીનું નોટિફિકેશન જાહેર થઈ ચૂક્યું છે. દિલ્હી હાઈકોર્ટે પણ ફગાવી દીધી હતી
આ પહેલા ઓક્ટોબર 2025માં દિલ્હી હાઈકોર્ટે પણ આ જ અરજીને ફગાવી દીધી હતી. તે સમયે કોર્ટે અરજદારના વકીલ રીપક કંસલને સખત ઠપકો આપ્યો હતો. હાઈકોર્ટે સવાલ કર્યો હતો કે શું તમે એ કહેવા માગો છો કે જે ટીમ દુનિયાભરમાં ભારતનું પ્રતિનિધિત્વ કરી રહી છે, તે ભારતની ટીમ નથી. કોર્ટે સ્પષ્ટ કહ્યું હતું કે જે ટીમ આંતરરાષ્ટ્રીય મંચ પર દેશનું નામ રોશન કરી રહી છે, તેને ટીમ ઈન્ડિયા કહેવા પર વાંધો નિરર્થક છે. દિલ્હી હાઈકોર્ટના તત્કાલીન મુખ્ય ન્યાયાધીશ ડી.કે. ઉપાધ્યાયે આ અરજીને કોર્ટના સમયનો સંપૂર્ણ બગાડ ગણાવી હતી. તેમણે ઉદાહરણ આપતા પૂછ્યું હતું કે શું ઓલિમ્પિક, કોમનવેલ્થ ગેમ્સ કે હોકી, ફૂટબોલ અને ટેનિસની ટીમ સરકાર પોતે પસંદ કરે છે, તેમ છતાં તેઓ ભારતનું પ્રતિનિધિત્વ કરે છે. BCCIને સરકાર તરફથી ફંડ મળતું નથી
અરજીમાં એવી દલીલ પણ કરવામાં આવી હતી કે રમતગમત મંત્રાલયના RTI જવાબો મુજબ BCCIને ન તો નેશનલ સ્પોર્ટ્સ ફેડરેશનની માન્યતા મળી છે અને ન તો સરકાર તરફથી કોઈ ફંડ મળે છે. આમ છતાં, સરકારી મીડિયા પ્લેટફોર્મ ક્રિકેટ ટીમને ટીમ ઈન્ડિયા કહે છે અને મેચ દરમિયાન ભારતીય ધ્વજ જેવા રાષ્ટ્રીય પ્રતીકોનો ઉપયોગ થાય છે. જોકે, સુપ્રીમ કોર્ટ અને દિલ્હી હાઈકોર્ટ બંનેએ સ્પષ્ટ કર્યું કે આ મુદ્દો નકામો અને બિનજરૂરી છે, અને તેને આગળ વધારવાની કોઈ જરૂર નથી.