ચર્ચિત અમેરિકી પત્રકાર જેક ન્યુશમને સોશિયલ મીડિયા પર એક મેસેજ મળ્યો. મોકલનારે લખ્યું હતું કે હું પ્રિડિક્શન માર્કેટ બીટમાં તમારી મદદ કરવા માંગુ છું. ન્યુશમે તેને મજાક સમજ્યો. પરંતુ જ્યારે વીડિયો કૉલ પર દાંતમાં ‘બ્રેસિસ’ લગાવેલા અને ચહેરા પર નિર્દોષતા સાથે 13 વર્ષનો એલી ગોલ્ડફાઇન સામે આવ્યો, ત્યારે દુનિયા દંગ રહી ગઈ. એલીએ આટલી નાની ઉંમરે એ ક્ષેત્રમાં પ્રભુત્વ જમાવી દીધું છે, જેમાં 25-30 વર્ષના યુવાનોનું વર્ચસ્વ માનવામાં આવે છે. નાના રૂમમાંથી, પુસ્તકો, ટેલિસ્કોપ અને લેપટોપની વચ્ચે બેઠેલો આ છોકરો પ્રિડિક્શન માર્કેટની જટિલ દુનિયાને સમજીને કઈ રીતે પ્રયોગોમાં વ્યસ્ત છે, વાંચો… એલીની શરૂઆત ખૂબ જ રસપ્રદ રહી. તેણે સૌથી પહેલા પોલીમાર્કેટ (પ્રિડિક્શન માર્કેટ) વિશે શીખ્યું અને પછી ‘મેનિફોલ્ડ’ જેવા પ્લેટફોર્મ પર જાતે પ્રયોગો શરૂ કર્યા. સ્કૂલમાં તેણે સાથીઓ વચ્ચે વિદ્યાર્થી ચૂંટણીઓ પર ‘બેટિંગ માર્કેટ’ બનાવી દીધું. જોકે, સ્કૂલ પ્રશાસનને આ પસંદ ન આવ્યું, પરંતુ એલી માટે આ શીખવાનો અવસર હતો અને તેણે તેમાં સારો એવો નફો પણ કમાઈ લીધો. આજે એલી માત્ર અનુમાન લગાવીને પૈસા કમાવવા પૂરતો સીમિત નથી. તે ‘બેયસિયન સુપર સાયકલ’ નામનો બ્લોગ ચલાવે છે. અને સોશિયલ મીડિયા પ્લેટફોર્મ પર મોટા-મોટા નિષ્ણાતો સાથે પ્રશ્ન-જવાબ પણ કરે છે. તાજેતરમાં તેણે 5C (સી) કેપિટલના સ્થાપકો (જેઓ પહેલા કાલશીમાં કામ કરી ચૂક્યા છે)નો લાઇવ ઇન્ટરવ્યુ લીધો. આવો ઇન્ટરવ્યુ સામાન્ય રીતે મોટા બિઝનેસ ન્યૂઝ ચેનલો કરે છે. આનાથી એલીની દૂરંદેશીતા જાણવા મળે છે. એલીના રૂમની કબાટો તેની બહુમુખી પ્રતિભાની સાક્ષી છે. એક તરફ ‘ચાર્લી બ્રાઉન’ અને ‘કેલ્વિન એન્ડ હોબ્સ’ જેવા કોમિક્સના સેટ છે, તો બીજી તરફ બીજગણિત અને ઓપ્ટિક્સના ભારે પુસ્તકો પણ છે. એલીને ટેલિસ્કોપ બનાવવાનો અને તારાઓ જોવાનો શોખ છે. તાજેતરમાં ચર્ચામાં રહેલા ઓપ્ટિકલ ડિઝાઇનર અલ નેગલરનો ઇન્ટરવ્યુ પણ લીધો હતો. માઇક્રોસોફ્ટ રિસર્ચના લોકો સાથે પ્રોજેક્ટ્સ પર ચર્ચા કરી તો તેઓ આશ્ચર્યચકિત થઈ ગયા. રસપ્રદ વાત એ છે કે ઘણી કંપનીઓ એલીને તક આપવા માંગે છે, પરંતુ ‘બાળ મજૂરી કાયદા’ વિશે વિચારવા લાગે છે. એલીએ એક ઇન્ટરવ્યુ દરમિયાન ઇન્ટર્નશિપ માંગી, તો કંપનીના માલિકે હસતા કહ્યું, ‘અમારે તારા માતા-પિતા સાથે વાત કરવી પડશે જેથી અમે કાયદો તોડવાના દોષી ન બનીએ.’ ‘થ્રાઇવ કેપિટલ’ જેવી મોટી ફર્મ પણ તેમને તક આપવા માંગે છે. પિતા ઇવાન, રિયલ એસ્ટેટ ડેવલપર અને માતા મનોવૈજ્ઞાનિક છે. બંને એલીને પ્રોત્સાહિત કરે છે. તે હોમવર્ક સ્કૂલ બસમાં પૂરું કરે છે જેથી વેબસાઇટ અને સંશોધન માટે સમય મળી શકે. એલીની રણનીતિ પ્રેડિક્શન માર્કેટ એવું પ્લેટફોર્મ છે જ્યાં લોકો ભવિષ્યની ઘટનાઓ (જેમ કે ચૂંટણીના પરિણામો) પર શેરબજારની જેમ દાવ લગાવે છે; ‘સાચી ભવિષ્યવાણી’ની કિંમત વધે છે, ‘ખોટી’ની ઘટે છે. એલી રણનીતિજ્ઞની જેમ કામ કરે છે. ડેટા વિશ્લેષણ કરે છે, સ્કૂલ ચૂંટણી જેવા પોતાના પ્રેડિક્શન માર્કેટ બનાવે છે. જટિલ આર્થિક વિષયો પર નિષ્ણાતો પાસેથી સમજવાનો પ્રયાસ કરે છે કે ભવિષ્યમાં શું થવાની સંભાવના વધુ છે.