એફબીઆઈ ચીફ તરીકે કાશ પટેલની યાત્રા જેટલી ઝડપથી આગળ વધી, તેમના અંગત શોખ અને વિવાદોએ તેમને એટલી જ ઝડપથી ચર્ચાના કેન્દ્રમાં લાવી દીધા છે. હવે તેમના પર દારૂ પીવાની ટેવ અને બિનજવાબદારભર્યા વર્તનના ગંભીર આરોપો લાગી રહ્યા છે. રાષ્ટ્રપતિ ડોનાલ્ડ ટ્રમ્પની નારાજગીના સમાચારો વચ્ચે તેમને પ્રેસ કોન્ફરન્સ કરીને આ દાવાઓ પર સ્પષ્ટતા કરવી પડી છે. જોકે, વોશિંગ્ટનના રાજકીય ગલિયારામાં કાશ પટેલની ઓળખ એક એવા અધિકારી તરીકેની છે જે નિયમો અને પ્રોટોકોલની કદર કર્યા વિના પોતાની ધૂનમાં રહેવાનું પસંદ કરે છે. પટેલની જીવનશૈલીમાં રંગીન મિજાજી અને વિચિત્ર શોખ હંમેશાથી સામેલ રહ્યા છે. તેમની આ વ્યક્તિત્વનું સૌથી રસપ્રદ પાસું ‘કોચ કાશ’ વાળી છબી છે. વકીલાત અને સરકારી નોકરીના શરૂઆતના દિવસોમાં તેઓ સ્થાનિક હાઈસ્કૂલની હોકી ટીમને તાલીમ આપતા હતા. ઘણીવાર તેઓ પેન્ટાગોન કે વ્હાઇટ હાઉસની મહત્વપૂર્ણ બેઠકોમાંથી સૂટમાં જ હોકી રિંક પહોંચી જતા હતા. રમત પ્રત્યેની આ જ દીવાનગી હાલમાં મિલાન ઓલિમ્પિક દરમિયાન તેમના માટે મુશ્કેલીનું કારણ બની ગઈ, જ્યારે તેઓ અમેરિકન ટીમના ડ્રેસિંગ રૂમમાં ખેલાડીઓ સાથે બીયર પીતા જોવા મળ્યા. ગર્લફ્રેન્ડ માટે સરકારી વિમાનોના ઉપયોગ પર પણ તેઓ વિરોધીઓના નિશાના પર આવી ચૂક્યા છે. ફેશન સેન્સની મિત્રો મજાક ઉડાવતા હતા મિયામીમાં જ્યારે તેઓ સરકારી વકીલ હતા, ત્યારે તેમની સાથે કામ કરનારા લોકો આજે પણ તેમની ફેશન સેન્સની મજાક ઉડાવે છે. તેઓ અવારનવાર ભારતથી ખાસ રીતે સિવડાવેલા સૂટ પહેરતા હતા, જે અમેરિકન કોર્ટના માહોલ પ્રમાણે ઘણા અલગ દેખાતા હતા. તેમની સાથે પહેરેલા રંગબેરંગી અને વિચિત્ર પેટર્નવાળા મોજા ગપસપનો વિષય બની જતા હતા. કાશે એકવાર એક ચેરિટી કાર્યક્રમમાં ભંડોળ એકત્ર કરવા માટે પોતાને ‘એલિજિબલ બેચલર’ તરીકે હરાજી માટે પણ રજૂ કર્યા હતા. આ ઉપરાંત, તેઓ બાળકો માટે પુસ્તક પણ લખી ચૂક્યા છે. ‘ધ પ્લોટ અગેન્સ્ટ ધ કિંગ’ નામની પુસ્તકમાં તેમણે પોતાને એક જાદુગર (વિઝાર્ડ) તરીકે રજૂ કર્યા. પિતાને એક સૂટકેસમાં સંઘર્ષ કરતા જોયા કાશ પટેલ મૂળ યુગાન્ડા અને ભારત સાથે ગાઢ રીતે જોડાયેલા છે. તેમના પિતા પ્રમોદ પટેલ 1970ના દાયકામાં તાનાશાહ ઈદી અમીનના શાસનથી જીવ બચાવીને ન્યૂયોર્ક ભાગી ગયા હતા, ત્યારે તેમની પાસે ફક્ત એક સૂટકેસ અને થોડા જ ડોલર હતા. આ જ સંઘર્ષમાંથી પ્રેરણા લઈને કાશે પોતાની ઓળખ બનાવી. લોકપ્રિયતાનો લાભ લેવા માટે પોતાની બ્રાન્ડ લોન્ચ કરી પોતાની લોકપ્રિયતાનો લાભ ઉઠાવતા કાશે K$H નામથી પોતાની એક પર્સનલ બ્રાન્ડ પણ બજારમાં ઉતારી છે. આ બ્રાન્ડ હેઠળ તેઓ ટી-શર્ટ, હુડી અને ટોપી જેવા કપડાંથી લઈને વાઇન સુધી વેચે છે. આ ઉત્પાદનોના વેચાણથી થતી કમાણીનો એક મોટો હિસ્સો તેમના દ્વારા સ્થાપિત ‘કાશ ફાઉન્ડેશન’માં જાય છે. જોકે, આને લઈને પણ વિવાદો થઈ ચૂક્યા છે.