કેપ વર્ડે ફૂટબોલ ટીમના કેપ્ટન રેયાન મેન્ડેસ પર બળાત્કારના આરોપો લાગ્યા છે. બ્રાઝિલિયન મીડિયા ગ્લોબો અનુસાર, ન્યુઝીલેન્ડમાં માર્ચ 2026ની FIFA સિરીઝ દરમિયાન ટીમ સાથે ટ્રાન્સલેટર તરીકે કામ કરતી એક મહિલાએ તેમના પર યૌન શોષણનો આરોપ લગાવ્યો છે. જોકે, હજુ એ નક્કી નથી થયું કે તેમની વિરુદ્ધ ફોજદારી કેસ દાખલ થશે કે નહીં. મામલાની તપાસ ચાલુ છે. હજુ સુધી તેમને કોઈ અદાલતે દોષિત ઠેરવ્યા નથી. આ મામલો એવા સમયે સામે આવ્યો છે, જ્યારે કેપ વર્ડે પહેલીવાર ફૂટબોલ વર્લ્ડ કપના નોકઆઉટમાં પહોંચ્યું છે. તે રાઉન્ડ ઓફ 32માં પહોંચનારો દુનિયાનો સૌથી નાનો દેશ બન્યો છે. ટીમને 4 જુલાઈએ આર્જેન્ટિના સામે મેચ રમવાની છે. મેન્ડેસ ગ્રુપ સ્ટેજના ત્રણેય મેચ રમી ચૂક્યા છે. જોકે, તેમના નામે એક પણ ગોલ નોંધાયો નથી. FIFAએ USA TODAYના હવાલાથી જારી કરેલા નિવેદનમાં કહ્યું- અમે કોઈપણ પ્રકારના ખોટા આચરણના આરોપને ગંભીરતાથી લઈએ છીએ. અમે ન્યુઝીલેન્ડની સંબંધિત એજન્સીઓના સંપર્કમાં છીએ, પરંતુ આનાથી આગળ કોઈ ટિપ્પણી કરીશું નહીં. મહિલાએ હોટલના રૂમમાં રેપનો આરોપ લગાવ્યો ગ્લોબોના અહેવાલ મુજબ, ફરિયાદ કરનાર મહિલા બ્રાઝિલની નાગરિક છે. મહિલાનો આરોપ છે કે ઓકલેન્ડની એક હોટલમાં રેયાન મેન્ડેસ તેના રૂમમાં આવ્યા અને જાતીય હુમલો કર્યો. આ પછી પીડિતાએ સ્થાનિક પોલીસને ઘટનાની જાણ કરી અને મેડિકલ તપાસ કરાવી. અહેવાલમાં દાવો કરવામાં આવ્યો છે કે મેડિકલ તપાસમાં મહિલાના શરીર પર ઘણી ઇજાઓના નિશાન મળ્યા. અહેવાલ મુજબ, મહિલાએ આ ઇજાઓની તસવીરો પોલીસ અને બાદમાં ગ્લોબોને પણ ઉપલબ્ધ કરાવી હતી. કેપ વર્ડે તરફથી કોઈ નિવેદન નહીં મીડિયા રિપોર્ટમાં દાવો કરવામાં આવ્યો કે મહિલાએ કથિત ઘટનાની જાણ કેપ વર્ડે ફૂટબોલ ટીમ સાથે સંકળાયેલા ત્રણ અધિકારીઓને પણ કરી હતી, પરંતુ તેને કોઈ જવાબ મળ્યો નહીં. કેપ વર્ડે ફૂટબોલ અધિકારીઓએ અત્યાર સુધી આ આરોપો પર કોઈ નિવેદન આપ્યું નથી. USA TODAY અનુસાર, રાષ્ટ્રીય ટીમે ટિપ્પણી માટેની વિનંતીનો પણ જવાબ આપ્યો નથી. ગ્રુપ સ્ટેજમાં અજેય રહી કેપ વર્ડેની ટીમ પહેલીવાર વર્લ્ડ કપ રમી રહેલું કેપ વર્ડે ગ્રુપ સ્ટેજમાં અજેય રહ્યું છે. તેણે સ્પેન અને ઉરુગ્વે જેવી પૂર્વ વર્લ્ડ ચેમ્પિયન ટીમોવાળા ગ્રુપમાં પણ કોઈ મેચ ગુમાવી નથી. ટીમે અનુભવી ગોલકીપર વોજિન્યાના નેતૃત્વમાં અપેક્ષા કરતાં વધુ સારો દેખાવ કર્યો.