પૂર્વ ભારતીય કેપ્ટન સુનીલ ગાવસ્કરે IPLમાં ખેલાડીઓના ટ્રેડને લઈને સંપૂર્ણ નાણાકીય વિગતો સાર્વજનિક કરવાની માગ કરી છે. ગાવસ્કરે કહ્યું કે જ્યારે કોઈ ખેલાડી એક ફ્રેન્ચાઈઝીમાંથી બીજી ટીમમાં ટ્રેડ થાય છે, ત્યારે તેની ડીલની રકમ પણ સાર્વજનિક ડોમેનમાં હોવી જોઈએ. આનાથી બધી ફ્રેન્ચાઈઝીઓને ખબર પડશે કે ટીમે નિર્ધારિત સેલરી કેપનું પાલન કર્યું છે કે નહીં. ગાવસ્કરે કહ્યું- અત્યારે માત્ર 4 પક્ષોને જ રકમની જાણ થાય છે ગાવસ્કરે ‘મિડ-ડે’ના પોતાના કૉલમમાં લખ્યું કે કોઈ ખેલાડીના ટ્રેડની રકમની જાણકારી બંને ફ્રેન્ચાઈઝીઓ, ખેલાડી અને BCCIને હોય છે. બાકીની ટીમને આ ડીલની સંપૂર્ણ નાણાકીય જાણકારી મળતી નથી. તેમના મતે, આનાથી અન્ય ફ્રેન્ચાઇઝીઓ માટે એ તપાસવું મુશ્કેલ બની જાય છે કે કોઈ ટીમે નિર્ધારિત સેલરી કેપની અંદર રહીને ટ્રેડ કર્યો છે કે નહીં. તેથી, ટ્રેડની રકમને સાર્વજનિક કરવી પારદર્શિતા માટે જરૂરી છે. કહ્યું- આ માત્ર બે પક્ષોનો મામલો નથી ગાવસ્કરના મતે IPL વિશ્વની સૌથી મોટી T-20 લીગ છે, તેથી તેના કામકાજમાં પારદર્શિતા અત્યંત જરૂરી છે. ટ્રેડની રકમ સાર્વજનિક થવાથી તમામ ફ્રેન્ચાઇઝીઓને એકસરખી માહિતી મળશે અને લીગના નિયમોને લઈને ઉભા થતા પ્રશ્નો ઘટાડી શકાશે. પંત-કુલદીપનો પણ ટ્રેડ થયો 2026 સીઝન પહેલા સંજુ સેમસન રાજસ્થાન રોયલ્સથી ચેન્નઈ સુપર કિંગ્સમાં ટ્રેડ થયા હતા. તેની લીગ ફી 18 કરોડ રૂપિયા જણાવવામાં આવી હતી. 2026 સીઝન પૂરી થયા પછી રિષભ પંત અને કુલદીપ યાદવનો પણ ટ્રેડ થયો. પંત LSGથી દિલ્હી કેપિટલ્સ પરત ફર્યો, જ્યારે કુલદીપ દિલ્હીથી LSGમાં ગયો. IPL મુજબ પંતની નવી ફી 15 કરોડ અને કુલદીપની 13.50 કરોડ રૂપિયા છે. હાર્દિકના ટ્રેડની માત્ર અટકળો મુંબઈ ઈન્ડિયન્સના ઓલરાઉન્ડર હાર્દિક પંડ્યાને લઈને પણ ટીમ બદલવાની અટકળો ચાલી રહી છે. જોકે, હજુ સુધી તેના મુંબઈ ઈન્ડિયન્સ છોડવાની કોઈ સત્તાવાર જાહેરાત થઈ નથી. હાર્દિક 2024 સીઝન પહેલા ગુજરાત ટાઇટન્સમાંથી ટ્રેડ થઈને મુંબઈ ઈન્ડિયન્સમાં ફરી આવ્યો હતો.