ભારતે બીજી વનડેમાં અફઘાનિસ્તાનને 170 રનથી હરાવ્યું. લખનઉના ઇકાના સ્ટેડિયમમાં ભારતીય ટીમ 402 રન પર ઓલઆઉટ થઈ ગઈ. વનડે ક્રિકેટના ઇતિહાસમાં પહેલીવાર 400 રન બનાવનારી ટીમ ઓલઆઉટ પણ થઈ છે. બુધવારે શુભમન ગિલ (154 રન) અને ઈશાન કિશન (125 રન) એ એક જ ઓવરમાં પોતપોતાની સદી પૂરી કરી. શ્રેયસ અય્યરે વિરાટ કોહલીને પાછળ છોડી દીધો. તે સૌથી ઝડપી 3000 વનડે રન બનાવનાર બીજા ભારતીય બન્યો. મેચ દરમિયાન દરવિશ રસૂલીને ઈજા થતાં સ્ટ્રેચરથી મેદાનની બહાર લઈ જવામાં આવ્યો. ભારત-અફઘાનિસ્તાન મેચના રેકોર્ડ્સ 1. પહેલીવાર 2 ભારતીયોએ 80થી ઓછી બોલમાં સદી ફટકારી ગિલે 77 અને કિશને 71 બોલમાં સદી પૂરી કરી. આ સાથે જ બંનેએ ભારતીય ક્રિકેટમાં એક નવો રેકોર્ડ બનાવ્યો. વનડે ક્રિકેટમાં પહેલીવાર બે ભારતીય બેટ્સમેનોએ એક જ ઇનિંગ્સમાં 80 કે તેથી ઓછી બોલમાં સદી ફટકારી. 2. ભારતે સાઉથ આફ્રિકાની બરાબરી કરી ભારતે 8મી વખત વનડેમાં 400 કે તેથી વધુનો સ્કોર બનાવ્યો. ટીમે આ મામલે સાઉથ આફ્રિકાની બરાબરી કરી લીધી. સાઉથ આફ્રિકા પણ વનડેમાં 8 વખત આ કારનામું કરી ચૂક્યું છે. 3. શ્રેયસ ઐયરના 3 હજાર વનડે રન શ્રેયસ અય્યરે 11મો રન બનાવતા જ વનડેમાં 3 હજાર રન પૂરા કર્યા. તેણે 72 ઇનિંગ્સ અને 3049 બોલમાં આ સિદ્ધિ હાંસલ કરી. તેણે સૌથી ઓછી ઇનિંગ્સમાં 3 હજાર રન બનાવનાર વિરાટ કોહલી (75 ઇનિંગ્સ)ને પાછળ છોડી દીધો છે. હવે તે શિખર ધવન સાથે બીજા નંબર પર છે. આ યાદીમાં શુભમન ગિલ 62 ઇનિંગ્સ સાથે પ્રથમ સ્થાને છે. અય્યર સૌથી ઓછા બોલમાં આ આંકડો પાર કરનાર ત્રીજા નંબર પર પહોંચી ગયો છે. પૂર્વ વર્લ્ડ કપ વિજેતા કેપ્ટન કપિલ દેવ 2995 બોલ સાથે પ્રથમ નંબર પર છે. 4. ગિલનો ભારત માટે ત્રીજો સૌથી ઝડપી 150 રન ગિલે 108 બોલમાં 150 રન પૂરા કર્યા. આ વનડેમાં કોઈ ભારતીયનો ત્રીજો સૌથી ઝડપી 150+ નો સ્કોર છે. પ્રથમ સ્થાને ઈશાન કિશન છે. તેણે 2022 માં બાંગ્લાદેશ સામે 103 બોલમાં 150 રન બનાવ્યા હતા. 5. અફઘાનિસ્તાન સામે સૌથી ઝડપી સદીમાં ઈશાન અને ગિલનો સમાવેશ ઈશાન અને ગિલ અફઘાનિસ્તાન સામે વનડેમાં સૌથી ઝડપી સદી ફટકારનારા ખેલાડીઓમાં સામેલ થઈ ગયા છે. આ યાદીમાં ઈશાન (71 બોલ) ત્રીજા અને ગિલ (77 બોલ) 5મા નંબર પર આવી ગયા છે. પ્રથમ સ્થાને ઈંગ્લેન્ડના પૂર્વ ખેલાડી ઈયોન મોર્ગન છે. તેમણે 2019 માં માન્ચેસ્ટરના મેદાન પર અફઘાન ટીમ સામે 57 બોલમાં સદી ફટકારી હતી. પૂર્વ ભારતીય કેપ્ટન રોહિત શર્મા પણ 63 બોલમાં સદી ફટકારી ચૂક્યો છે. 6. વનડેમાં અફઘાનિસ્તાન સામે બીજી સૌથી મોટી પાર્ટનરશીપ ગિલ-ઈશાને ત્રીજી વિકેટ માટે 224 રનની પાર્ટનરશીપ કરી. આ વનડેમાં અફઘાનિસ્તાન સામે સંયુક્ત રીતે બીજી સૌથી મોટી પાર્ટનરશીપ છે. આ યાદીમાં ડેવિડ વોર્નર અને સ્ટીવ સ્મિથની જોડી પ્રથમ સ્થાને છે. તેમણે 2015માં અફઘાન ટીમ સામે 260 રનની ભાગીદારી કરી હતી. 7. ઈશાન-ગિલે બીજી સૌથી ઝડપી 200+ રનની પાર્ટનરશીપ કરી ઈશાન-ગિલે 9.60ના રનરેટથી 224 રન જોડ્યા. આ ભારત માટે વનડેમાં બીજી સૌથી ઝડપી 200+ રનની પાર્ટનરશીપ છે. આ મામલે કેએલ રાહુલ અને શ્રેયસ ઐયરની જોડી પ્રથમ સ્થાને છે. બંનેએ 2023 વર્લ્ડ કપમાં નેધરલેન્ડ સામે 9.82ના રનરેટથી 208 રનની પાર્ટનરશીપ કરી હતી. 8. અફઘાનિસ્તાનની વનડેમાં બીજી સૌથી મોટી હાર અફઘાનિસ્તાનને 170 રનની હારનો સામનો કરવો પડ્યો. આ અફઘાનિસ્તાનની વનડેમાં બીજી સૌથી મોટી હાર છે. ટીમને ઓસ્ટ્રેલિયા સામે 2015માં સૌથી મોટી હાર મળી હતી. ત્યારે પર્થના મેદાન પર તેને 275 રનથી હારનો સામનો કરવો પડ્યો હતો. 9. ગુરબાઝ સૌથી ઝડપી 2 હજાર વનડે રન બનાવનાર અફઘાની બેટ્સમેન રહેમાનુલ્લાહ ગુરબાઝે 33 બોલમાં 41 રન બનાવ્યા. આ ઇનિંગ દરમિયાન તેણે વનડેમાં 2 હજાર રન પણ પૂરા કર્યા. તે વનડેમાં સૌથી ઝડપી 2,000 રન બનાવનાર અફઘાની બની ગયો છે. તેણે માત્ર 54 ઇનિંગ્સમાં આ સિદ્ધિ હાંસલ કરી. રહેમત શાહ 57 ઇનિંગ્સ સાથે બીજા નંબર પર છે. મેચની ટોપ-4 મોમેન્ટ્સ… 1. ગિલે ગળામાં આઇસ પેક પહેરીને બેટિંગ કરી લખનઉમાં મેચ દરમિયાન ખૂબ જ ભેજ હતો. આને કારણે એક ઇનિંગ્સમાં 3 ડ્રિંક્સ બ્રેક રાખવામાં આવ્યા હતા. બ્રેકમાં ખેલાડીઓ ટુવાલથી પરસેવો લૂછતા જોવા મળ્યા. 14મી ઓવરમાં ડ્રિંક્સ બ્રેક પછી કેપ્ટન ગિલે ગળામાં આઇસ પેક પહેરીને બેટિંગ કરી. 2. ગિલ-ઈશાને એક જ ઓવરમાં સદી પૂરી કરી ભારતીય ઇનિંગ્સની 33મી ઓવરમાં ગિલ અને ઈશાને પોતાની સદી પૂરી કરી. બિલાલ સામીની ઓવરના પહેલા બોલ પર ચોગ્ગો ફટકારીને ગિલે 9મી વનડે સદી ફટકારી. છેલ્લા બોલ પર કિશને પણ ચોગ્ગો મારીને પોતાની બીજી વનડે સદી પૂરી કરી. 3. નો-બોલથી ટળી પ્રિન્સ યાદવની પ્રથમ વન-ડે વિકેટ બીજી ઇનિંગ્સની 7મી ઓવરમાં પ્રિન્સ યાદવને વિકેટ મળતા મળતા રહી ગઈ. ડેબ્યૂ કરી રહેલા પ્રિન્સે ઓવરની 5મી બોલ શોર્ટ નાખી. બોલ રહેમાનુલ્લાહ ગુરબાઝના બેટની કિનારી લઈને મિડ-ઓન તરફ ગઈ, જ્યાં કેચ પકડવામાં આવ્યો. પ્રિન્સ પોતાની પ્રથમ વનડે વિકેટ મળવાનો જશ્ન મનાવી જ રહ્યો હતો. આ દરમિયાન નો-બોલનો હૂટર વાગી ગયો. જોકે, બાદમાં પ્રિન્સે બે વિકેટ લીધી. 4. દરવિશ રસૂલી સ્ટ્રેચર દ્વારા મેદાનની બહાર ગયો 25મી ઓવરમાં અફઘાની બેટ્સમેન દરવિશ રસૂલી ઈજા બાદ રિટાયર્ડ હર્ટ થયો. ઓવરના ત્રીજા બોલ પર શોટ રમ્યા બાદ રસૂલી જમણી હેમસ્ટ્રિંગ ખેંચાવાને કારણે મેદાન પર પડી ગયો. ભારતીય ખેલાડી વોશિંગ્ટન સુંદર તરત જ તેમની મદદ માટે પહોંચ્યો. ત્યારબાદ ફિઝિયોએ તેના પગ પર પટ્ટી બાંધી, પરંતુ દુખાવો ઓછો ન થયો. ત્યારબાદ અફઘાનિસ્તાનના કોચ રિચાર્ડ પાયબસે તેને મેદાનની બહાર આવવાનો ઈશારો કર્યો. પોતાની ડેબ્યૂ મેચ રમી રહેલા રસૂલીને સ્ટ્રેચર પર લાદીને મેદાનની બહાર લઈ જવામાં આવ્યો.