કેન્દ્રીય વાણિજ્ય અને ઉદ્યોગ મંત્રી પીયૂષ ગોયલે ચીન પર નામ લીધા વિના કટાક્ષ કર્યો છે. ટોક્યોમાં સુમિતોમો કોર્પોરેશનના પ્રેસિડેન્ટ અને સીઈઓ સાથેની બેઠક દરમિયાન ગોયલે કહ્યું કે ભારતમાં આંત્રપ્રિન્યોરશિપની ઉજવણી કરવામાં આવે છે. તમારે એ વાતની ચિંતા કરવાની જરૂર નથી કે જો તમે ભારતમાં પૈસા કમાઓ છો અથવા સફળ થાઓ છો, તો એક દિવસ અચાનક ગુમ થઈ જશો અને પછી કોઈ જાપાની યુનિવર્સિટીમાં પ્રોફેસર બનીને બહાર આવશો. ભારતમાં આવું જોખમ નથી હોતું. ચીની બિઝનેસમેન જેક માના કેસ તરફ ઈશારો ગોયલે ચીન કે જેક માનું નામ લીધું ન હતું, પરંતુ તેમનો ઈશારો સ્પષ્ટપણે અલીબાબાના સ્થાપક જેક મા તરફ હતો. વર્ષ 2020માં ચીનના નાણાકીય નિયમનકારોની ટીકા કર્યા પછી જેક મા અચાનક ઘણા મહિનાઓ માટે ગુમ થઈ ગયા હતા. ત્યારબાદ ચીની સરકારે તેમની કંપની એન્ટ ગ્રુપના રેકોર્ડ IPO રદ કર્યો અને અલીબાબા પર 2.8 અબજ ડોલરનો દંડ ફટકાર્યો. લાંબા સમય સુધી જાહેર જીવનથી દૂર રહ્યા બાદ 2023માં જેક મા ટોક્યો યુનિવર્સિટીમાં વિઝિટિંગ પ્રોફેસર તરીકે સામે આવ્યા હતા. ભારતમાં ન ડેટા ચોરી થશે, ન IPRનું ઉલ્લંઘન થશે જાપાની ઉદ્યોગપતિઓને સંબોધિત કરતા વાણિજ્ય મંત્રીએ સુરક્ષા અને પારદર્શિતા પર સૌથી વધુ ભાર મૂક્યો. તેમણે કહ્યું કે ભારત કોઈ અન્ય દેશની ટેકનોલોજી ચોરતું નથી અને ન તો બીજાના બૌદ્ધિક સંપદા અધિકારો (IPR)નું ઉલ્લંઘન કરીને બજારમાં પ્રોડક્ટ ઉતારે છે. ભારત માત્ર ચાઇના પ્લસ વન વિકલ્પ નથી વૈશ્વિક કંપનીઓ આ દિવસોમાં ચીન પર પોતાની નિર્ભરતા ઘટાડવા માટે ‘ચાઇના પ્લસ વન’ વ્યૂહરચના અપનાવી રહી છે. આ અંગે વાત કરતા ગોયલે કહ્યું કે “ભારત કોઈ ‘પ્લસ વન’ દેશ નથી. ભારત પોતે એક મજબૂત અને સ્વતંત્ર રોકાણ સ્થળ છે.” તેમણે કહ્યું કે ભારત 24 કલાક રોકાણના દરવાજા ખોલવા માટે તૈયાર છે, પરંતુ તે દેશના પોતાના હિતોના ભોગે કે કોઈના દબાણ હેઠળ નહીં હોય. સેમિકન્ડક્ટર અને AI સેક્ટરમાં મોટા રોકાણની અપેક્ષા ગોયલે જાપાની કંપનીઓને ભારતમાં સેમિકન્ડક્ટર, આર્ટિફિશિયલ ઇન્ટેલિજન્સ, ક્લીન એનર્જી અને એડવાન્સ્ડ મેન્યુફેક્ચરિંગ જેવા સેક્ટરમાં રોકાણ વધારવા અપીલ કરી.