સોનમ વાંગચુકની ભૂખ હડતાળ વચ્ચે સોશિયલ મીડિયા પર એક્ટ્રેસ દીપિકા પાદુકોણને લઈને એક દાવો વાયરલ થઈ રહ્યો છે. ઇન્ટરનેટ પર દીપિકાની કથિત ઇન્સ્ટાગ્રામ સ્ટોરીનો એક સ્ક્રીનશોટ શેર કરવામાં આવી રહ્યો છે. તેમાં દાવો કરવામાં આવી રહ્યો છે કે દીપિકાએ સોનમ વાંગચુકને સમર્થન આપ્યું અને દેશના નેતૃત્વ પર પ્રશ્નો ઉઠાવ્યા. યુઝર્સનું કહેવું છે કે, દીપિકાએ તેને પોસ્ટ કર્યાના થોડી જ મિનિટો પછી ડિલીટ કરી દીધું. જોકે, તપાસમાં આ દાવો સંપૂર્ણપણે ખોટો હોવાનું જાણવા મળ્યું છે. દીપિકાના ઓફિશિયલ એકાઉન્ટ પર આવી કોઈ પોસ્ટ કરવામાં આવી ન હતી. વાયરલ સ્ક્રીનશોટમાં શું દાવો કરવામાં આવ્યો?
બુધવારથી સોશિયલ મીડિયા પર એક સ્ક્રીનશોટ ઝડપથી ફેલાઈ રહ્યો છે. તેમાં દેખાઈ રહ્યું છે કે દીપિકાએ સોનમ વાંગચુક સાથે સંબંધિત એક પોસ્ટને રી-શેર કરી છે. સ્ક્રીનશોટ મુજબ, પોસ્ટ પર લખેલું છે, ‘તેઓ ઉપવાસ કરી રહ્યા છે અને આપણે સ્ક્રોલ કરી રહ્યા છીએ.’ આ સાથે કથિત રીતે દીપિકાનું કેપ્શન પણ લખેલું છે, જેમાં લખ્યું છે, ‘આ વિશે કોઈ વાત કેમ નથી કરી રહ્યું? આપણે લોકશાહીના સૌથી કાળા સમયગાળામાંથી પસાર થઈ રહ્યા છીએ. કોઈ નિષ્ફળ નેતાની પ્રશંસામાં ગમે તેટલી ફિલ્મો બનાવી લેવામાં આવે, હકીકત બદલાતી નથી.’ તપાસમાં વાયરલ સ્ક્રીનશોટ નકલી નીકળ્યો
સોશિયલ મીડિયા પર ચાલી રહેલી આ ચર્ચા વચ્ચે જ્યારે હકીકત જાણવામાં આવી, ત્યારે મામલો સંપૂર્ણપણે નકલી નીકળ્યો. હિન્દુસ્તાન ટાઈમ્સના રિપોર્ટ અનુસાર દીપિકા પાદુકોણના વેરિફાઈડ ઇન્સ્ટાગ્રામ એકાઉન્ટ અને તેમના સોશિયલ મીડિયા આર્કાઇવ રેકોર્ડ્સની તપાસ કરવામાં આવી. તેમાં આવી કોઈ પણ પોસ્ટ કે સ્ટોરીનો કોઈ પુરાવો મળ્યો નથી. ફેક્ટ ચેક મુજબ, વાયરલ થઈ રહેલો સ્ક્રીનશોટ સંપૂર્ણપણે ડિજિટલ રીતે એડિટ કરવામાં આવ્યો છે. દીપિકા તરફથી આવું કોઈ નિવેદન કે પોસ્ટ જારી કરવામાં આવી ન હતી. ઇન્ટરનેટ પર કરવામાં આવી રહેલો દાવો સંપૂર્ણપણે ખોટો છે. વાંગચુકના સમર્થનમાં આવ્યા ઘણા બોલિવૂડ સેલિબ્રિટીઝ જોકે, કોકરોચ જનતા પાર્ટી સાથે ચાલી રહેલા આ આંદોલનને હવે બોલિવૂડ સેલિબ્રિટીઝનું સમર્થન મળી રહ્યું છે. મંગળવારે એક્ટ્રેસ સ્વરા ભાસ્કરે પ્રદર્શન સ્થળે પહોંચી અને સોનમ વાંગચુક સાથે મુલાકાત કરી. જ્યારે, આલિયા ભટ્ટની માતા સોની રાઝદાન, શબાના આઝમી અને રૂબીના દિલેક જેવી એક્ટ્રેસિસે સોશિયલ મીડિયા પર પોસ્ટ લખીને સોનમ વાંગચુકને પોતાના ઉપવાસ સમાપ્ત કરવા માટે ભાવુક અપીલ કરી છે. તેમનું કહેવું છે કે, દેશને સોનમ જેવા સાચા લોકોની ખૂબ જરૂર છે. પ્રદર્શન સ્થળે પહોંચી સ્વરા ભાસ્કર મંગળવારે એક્ટ્રેસ સ્વરા ભાસ્કર દિલ્હીના જંતર-મંતર પર ચાલી રહેલા પ્રદર્શનમાં સામેલ થઈ. તેણે ત્યાં પહોંચીને સોનમ વાંગચુક અને અભિજીત સાથે મુલાકાત કરી. આ મુલાકાતની તસવીરો કોકરોચ જનતા પાર્ટીના ઓફિશિયલ ઇન્સ્ટાગ્રામ એકાઉન્ટ પરથી શેર કરવામાં આવી હતી. તેના કેપ્શનમાં લખવામાં આવ્યું હતું કે, ‘બેબાક અને નીડર એક્ટ્રેસ સ્વરા ભાસ્કર જંતર-મંતર પર વિરોધ પ્રદર્શનમાં સામેલ થયાં.’
સ્વરાએ આ પોસ્ટને પોતાના ઇન્સ્ટાગ્રામ સ્ટેટસ પર પણ શેર કરી. તેણે અભિજીતનો આભાર વ્યક્ત કરતા લખ્યું કે, ‘અમારા બાળકોના ભવિષ્ય માટે લડવા બદલ તમારો આભાર.’ સોનમ વાંગચુક માટે તેણે લખ્યું કે, ‘તેઓ અથાકપણે બાળકોના ભવિષ્ય માટે લડી રહ્યા છે, મારી સંપૂર્ણ એકતા તેમની સાથે છે.’ સોની રાઝદાને ભાવુક અપીલ કરી સોનમ વાંગચુકના સ્વાસ્થ્યને લઈને હવે ચિંતા સતત વધી રહી છે. બુધવારે એક્ટ્રેસ સોની રાઝદાને ઇન્સ્ટાગ્રામ પર એક પોસ્ટ શેર કરીને તેમને અનશન સમાપ્ત કરવાની અપીલ કરી. સોની રાજદાને લખ્યું કે, ‘પ્રિય સોનમ વાંગચુક, અમે સૌ તમારા સારા સ્વાસ્થ્ય માટે પ્રાર્થના કરીએ છીએ. કૃપા કરીને અમને આ રીતે છોડીને ન જાઓ.’ ‘આગળની લડાઈ લડવા માટે તમારું જીવંત રહેવું જરૂરી છે, તેથી આજે જ તમારું અનશન સમાપ્ત કરો.’ તેમણે પોસ્ટ સાથે કેપ્શનમાં લખ્યું કે, ‘અમને તમારી જરૂર છે, અમને છોડીને ન જાઓ.’ લડાઈ લાંબી, સ્વસ્થ રહેવું જરૂરી દિગ્ગજ એક્ટ્રેસ શબાના આઝમીએ પણ ઇન્સ્ટાગ્રામ પર સોનમ વાંગચુકના સમર્થનમાં એક સંદેશ લખ્યો. શબાનાએ લખ્યું કે, ‘પ્રિય સોનમ વાંગચુક, તમારા જેવા વ્યક્તિની આપણા દેશને ખૂબ જરૂર છે. તમે અન્યાય વિરુદ્ધ અને સત્ય માટે ઊભા છો, અમને તમારા પર ગર્વ છે.’ ‘અમે તમને વિનંતી કરીએ છીએ કે તમે તમારું અનશન તોડી દો, કારણ કે અમારા વિદ્યાર્થીઓ માટે તમારું માર્ગદર્શન તેમનો ઉત્સાહ વધારે છે.’ તેમણે આગળ લખ્યું કે, ‘આ લડાઈ આગળ સુધી લડવાની છે, તેથી તમારું સ્વસ્થ રહેવું ખૂબ જ જરૂરી છે, અમે તમારી સાથે છીએ.’
નસીરુદ્દીન શાહ, અરુંધતી અને રૂબીનાનું પણ સમર્થન મળ્યું ટેલિવિઝન એક્ટ્રેસ રૂબીના દિલેકે પણ ઇન્સ્ટાગ્રામ પર સોનમ વાંગચુકને સમર્થન આપ્યું છે. તેણે લખ્યું કે, ‘તેઓ એક સાચા હીરો છે, તેમને દેશના ભલા માટે લડતા આ રીતે મરવા ન દો.’ રૂબીનાએ અભિનેત્રી ઝીનત અમાનની એક પોસ્ટ પણ શેર કરી હતી, જેમાં સરકારે પર્યાવરણ કાર્યકર્તા સાથે શાંતિપૂર્ણ વાતચીત કરવા વિનંતી કરી હતી. આ ઉપરાંત અભિનેતા નસીરુદ્દીન શાહ, રત્ના પાઠક શાહ, લેખિકા અરુંધતી રોયે પણ સોનમ વાંગચુકને તેમના અનિશ્ચિતકાલીન ઉપવાસ પાછા ખેંચવા વિનંતી કરી છે. ફિલ્મમેકર અનુરાગ કશ્યપે પણ સોનમ વાંગચુકને સમર્થન આપ્યું. તેણે સોશિયલ મીડિયા પર સોનમ વાંગચુકની ઘણી તસવીરો શેર કરી અને ઇન્સ્ટાગ્રામ સ્ટોરી પર એક લાંબી નોંધ લખી. અનુરાગે લખ્યું, એક સમય હતો જ્યારે ભૂખ હડતાળનો ઘણો અર્થ થતો હતો. કોઈ પણ આમ જ ભૂખ હડતાળ પર બેસતું નથી. એ ખૂબ જ દુઃખની વાત છે કે વ્યવસ્થા લોકોના જીવન પ્રત્યે આટલી બેદરકાર બની ગઈ છે. તેણે આગળ લખ્યું, ફક્ત તે જ વ્યક્તિ આવું પગલું ભરી શકે છે, જેનામાં બીજાઓ પ્રત્યે સંવેદના હોય અને જે સત્ય અને ન્યાયમાં વિશ્વાસ રાખતો હોય. મારામાં તે હિંમત નથી, જે સોનમ વાંગચુક બતાવી રહ્યા છે. પરંતુ સત્તામાં બેઠેલા લોકોની ચૂપકીદી એટલી ગુંજતી હોય છે કે તે તેમની ભૂલ અને લોકોના જીવની પરવા ન કરતી વિચારસરણી દર્શાવે છે. હું સોનમ વાંગચુક જેવા બહાદુર વ્યક્તિની સાથે ઊભો છું.