બોલિવૂડ એક્ટ્રેસ મૌની રોય મંગળવારે રાત્રે પાપારાઝીથી નારાજ થઈ ગઈ. મુંબઈમાં મિત્રો સાથે ડિનર કર્યા પછી જ્યારે તે પોતાની કારમાં બેઠી, ત્યારે ફોટોગ્રાફર્સ સતત તેનો વીડિયો બનાવવા લાગ્યા. આનાથી ગુસ્સે થઈને મૌનીએ હાથના ઈશારાથી કેમેરા બંધ કરવાનું કહ્યું. વીડિયોમાં દેખાઈ રહ્યું છે કે મૌની રોય પોતાની કારની સીટ પર બેઠી છે. તેણે સ્લીવલેસ બ્લેક આઉટફિટ પહેર્યો છે અને વાળ ખુલ્લા રાખ્યા છે. કારની અંદર બેઠા હોવા છતાં પણ જ્યારે ફોટોગ્રાફર્સ બારીમાંથી સતત તેનો વીડિયો રેકોર્ડ કરતા રહ્યા, ત્યારે મૌનીનો ગુસ્સો વધી ગયો. તેણે પહેલા હાથથી ઈશારો કર્યો અને પછી આંગળી બતાવતા કડક અવાજમાં કહ્યું, “બંધ કરો.” મૌનીએ ઘણું ધૈર્ય રાખવાનો પ્રયાસ કર્યો, પરંતુ પાપારાઝી ન માનતા તે નારાજ થઈ ગઈ અને પછી તેની ગાડી ત્યાંથી રવાના થઈ ગઈ. ઝરીન ખાને કહ્યું- ફાલતુગીરી ન કરતા આ પહેલાં અભિનેત્રી ઝરીન ખાન પણ પાપારાઝી પર ખૂબ ગુસ્સે થઈ ગઈ હતી. એક બ્રાન્ડ ઇવેન્ટ દરમિયાન ઝરીને પાપારાઝીને ઠપકો આપતા કહ્યું કે મારી સાથે ફાલતુગીરીની વાતો ન કરતા. તેણે કડક શબ્દોમાં સામેવાળાને પોતાની હદમાં રહેવાની સલાહ આપી. ઝરીન ખાન મુંબઈમાં એક ક્લોથિંગ બ્રાન્ડના પ્રમોશન ઇવેન્ટમાં પહોંચી હતી. તે લીલા કલરના ડ્રેસ પહેરીને મીડિયાના કેમેરા સામે ડેનિમ જેકેટ અને જીન્સ પ્રદર્શિત કરી રહી હતી. આ દરમિયાન ત્યાં હાજર પાપારાઝીએ તેને કહ્યું કે ડ્રેસ ટ્રાય કરીને બતાવો. એક્ટ્રેસને આ વાત બિલકુલ પસંદ ન આવી. ઝરીન ખાને કહ્યું, “મારી સાથે ફાલતુ વાતો ન કરતાં, કારણ કે હું આવી વસ્તુઓ સહન કરનારાઓમાંની નથી. પોતાની હદમાં રહીને વાત કરવી.” આ વાત કહેતા ઝરીનના ચહેરા પર સ્પષ્ટપણે ગુસ્સો જોઈ શકાય છે. તાજેતરમાં નેહા ધૂપિયા પણ આપી ચૂકી છે હિદાયત આ પહેલા ગોલ્ડ સ્ટ્રીમિંગ એવોર્ડ સેરેમનીમાં નેહા ધૂપિયા પાપારાઝી પર ભડકી ગઈ હતી. એક્ટ્રેસ બેક શોટ લેવા અને તેને પોસ્ટ કરવા પર નારાજગી વ્યક્ત કરી અને પાપારાઝીને કડક શબ્દોમાં ચેતવણી પણ આપી. સેરેમનીમાંથી નેહા ધૂપિયા એવોર્ડ લઈને નીકળી રહી હતી. ત્યારે પાપારાઝીએ તેના ગ્રે હેર પર કોમેન્ટ કરી, જેના જવાબમાં ગુસ્સે થતા તેણે કહ્યું છે, ‘બોલી લીધું? કરી લીધું? આ બદતમીઝીથી બેક શોટ તમારામાંથી કોણ લે છે? કોણ લે છે? છાપે છે કોણ? ન કરો. મારું નથી કરવાનું, કોઈનું નથી કરવાનું. બોલી-બોલીને થાકી ગયા છીએ.’ આગળ એક્ટ્રેસે કહ્યું, ‘આ અમારું કામ નથી. અમે બહાર આવીએ છીએ, ત્યારે તમે લોકો ત્યાં આ બધું કરો છો, બેગ ઉઠાવીને, બુક ઉઠાવીને, પાછળથી ચાલતા, આ બધું હવે નહીં ચાલે. બંધ કરો આ બધું. ખૂબ ઇજ્જતથી અમે તમારા લોકો સાથે વાત કરીએ છીએ, આ બધું ન કરો. ન કરો, બિલકુલ આ બધું ન કરો.’ આ એક્ટર્સ પણ પાપારાઝી પર ભડક્યા હતા મલાઈકા અરોરાએ ક્લાસ લીધો હતો થોડા સમય પહેલા જ મલાઈકા અરોરાનો એક વીડિયો વાઇરલ થયો હતો, જેમાં તે પાપારાઝી પર ગુસ્સે થતી જોવા મળી હતી. એક ઇવેન્ટ પછી મલાઈકા એક વ્યક્તિ સાથે વાત કરી રહી હતી, પરંતુ પાપારાઝી પ્રાઇવસી આપવાને બદલે સતત તેનો વીડિયો લઈ રહ્યા હતા. આ જોઈને એક્ટ્રેસ ભડકી ગઈ અને કહ્યું- અહીં જ આવી જાઓ. સલમાન પણ ભડક્યો હતો ગયા મહિને સલમાન ખાન પણ પાપારાઝી પર ભડકી ગયો હતો. તે હિન્દુજા હોસ્પિટલ પહોંચ્યો હતો, જ્યાંથી નીકળતી વખતે પાપારાઝીના અવાજથી એક્ટર ભડકી ગયો હતો. જોકે, પછીથી જ્યારે સલમાન ફિલ્મ રાજા શિવાજીની સક્સેસ પાર્ટીમાં પહોંચ્યો, ત્યારે બધા પાપારાઝીએ તેમની માફી માંગી હતી. સલમાન જેવા જ પાર્ટીમાં પહોંચ્યા, તેવા જ બધા પેપરાઝીએ તેમને ઘેરી લીધા અને માફી માંગવા લાગ્યા. બધા એકસાથે, “સોરી ભાઈજાન, જોરથી બોલો સોરી”, કહેતા દેખાયા. આ પછી સલમાને પણ તેમની માફી કબૂલ કરી લીધી હતી.