હોલિવૂડ સિંગર અને ફેશન ડિઝાઇનર વિક્ટોરિયા બેકહામનો પરિવાર આ સમયે મુશ્કેલ સમયમાંથી પસાર થઈ રહ્યો છે. આ દિવસોમાં વિક્ટોરિયા બેકહામ પોતાની વહુ સાથે થયેલા ઝઘડાને લઈને ચર્ચામાં છે. તેના દીકરા બ્રુકલિને પરિવાર સાથેના બધાં સંબંધો તોડી નાખ્યા છે. હવે બોલિવૂડ એક્ટ્રેસ અને સાંસદ કંગના રનૌત વિક્ટોરિયાના સમર્થનમાં આવી છે. ‘વિક્ટોરિયા રીયલ ક્વીન છે’ કંગના રનૌતે વિક્ટોરિયા બેકહામ પર દીકરા બ્રુકલિન અને વહુ નિકોલાના આરોપો પછી ઇન્સ્ટાગ્રામ પર પોસ્ટ શેર કરી છે. પોસ્ટમાં 2007ના રિયાલિટી શોનો વીડિયો શેર કર્યો છે. વિક્ટોરિયા ડ્રાઇવિંગ લાઇસન્સનો ફોટો ક્લિક કરાવવા ગઈ હતી. તેણે તેને ફોટોશૂટ બનાવી દીધું. કંગનાએ લખ્યું, ‘કોઈ સાસુ-વહુ ડ્રામા મને વિક્ટોરિયાથી નફરત કરાવી શકે નહીં.’ તેણે વિક્ટોરિયાને ‘રીયલ ક્વીન’ કહી. શું છે આખો મામલો? તાજેતરમાં પૂર્વ ફૂટબોલ સ્ટાર ડેવિડ બેકહામ અને પ્રખ્યાત સિંગર વિક્ટોરિયા બેકહામને લઈને એક પારિવારિક વિવાદ ચર્ચામાં છે. તેમના દીકરા બ્રુકલિન બેકહામે માતા-પિતા પર ગંભીર આરોપો લગાવ્યા છે. બ્રુકલિનનું કહેવું છે કે, ડેવિડ અને વિક્ટોરિયા તેના લગ્નજીવનમાં સતત દખલ કરી રહ્યા છે, જેના કારણે તેના અને તેની પત્નીના સંબંધો પર ખરાબ અસર પડી છે. બ્રુકલિન અને તેની પત્નીની અવગણના થતી હોવાનો દાવો બ્રુકલિનના મતે, લગ્નના શરૂઆતના દિવસોથી જ તેના માતા-પિતા તેના વૈવાહિક જીવનમાં મુશ્કેલીઓ ઊભી કરી રહ્યા છે. એટલું જ નહીં, ફેમિલી ફંક્શન્સમાં પણ તેને અને તેની પત્નીને અવગણવામાં આવે છે. તેણે એમ પણ જણાવ્યું કે, જ્યારે તે તેની પત્ની નિકોલા સાથે ડેવિડ બેકહામના 50મા જન્મદિવસના અવસરે લંડન પહોંચ્યો હતો, ત્યારે ત્યાં પણ તેને અપેક્ષિત સન્માન મળ્યું ન હતું. બ્રુકલિનનો દાવો છે કે, આ કાર્યક્રમ દરમિયાન તેની પત્ની નિકોલા પર પાછા ફરવા દબાણ કરવામાં આવ્યું હતું, જેનાથી તે ખૂબ જ દુઃખી થઈ હતી. હાલમાં આ આખો મામલો ચર્ચાનો વિષય બન્યો છે. જોકે, અત્યાર સુધી વિક્ટોરિયા બેકહામ તરફથી આ વિવાદ પર કોઈ સત્તાવાર પ્રતિક્રિયા સામે આવી નથી.