માન્ચેસ્ટર એરપોર્ટ્સ ગ્રુપ (MAG) – જે માન્ચેસ્ટર, લંડન સ્ટેન્સટેડ અને ઇસ્ટ મિડલેન્ડ્સ એરપોર્ટ્સનું સંચાલન કરે છે – તેને નિશાન બનાવીને કરવામાં આવેલા સાયબર હુમલામાં આશરે 8.7 મિલિયન (87 લાખ) મુસાફરોના અંગત ડેટા જાહેર થઈ ગયા છે. આ ત્રણેય એરપોર્ટસે મળીને છેલ્લા એક વર્ષમાં 54 મિલિયન (5.4 કરોડ) મુસાફરોનું સંચાલન કર્યું હતું. ‘ધ ગાર્ડિયન’ના એક રિપોર્ટ અનુસાર, આ સાયબર હુમલામાં પાર્કિંગ રેઝર્વેશન, પ્રીમિયમ લાઉન્જ એક્સેસ, ફાસ્ટ-ટ્રેક સિક્યોરિટી પાસ અને ટર્મિનલ Wi-Fi રજિસ્ટ્રેશન સંબંધિત રેકોર્ડ્સ સાથે સમાધાન થયું હતું. હુમલાખોરો દ્વારા મેળવવામાં આવેલી માહિતીમાં ગ્રાહકોના ઇમેઇલ એડ્રેસ, ટેલિફોન નંબર, પોસ્ટલ કોડ અને વાહનોના રજીસ્ટ્રેશન નંબરનો સમાવેશ થાય છે. આ ગ્રુપે પુષ્ટિ કરી હતી કે જે ડેટાબેઝ સાથે છેડછાડ થઈ છે તેમાં નાણાકીય રેકોર્ડ્સ કે બેંકિંગ વિગતો સંગ્રહિત નહોતી. સાથે જ તેમણે ભારપૂર્વક જણાવ્યું હતું કે સમગ્ર ઘટના દરમિયાન એવિએશન સિક્યોરિટી (વિમાન સુરક્ષા), મુસાફરોની ભૌતિક સુરક્ષા અને એરપોર્ટની દૈનિક કામગીરી સંપૂર્ણપણે અપ્રભાવિત રહી હતી. એરપોર્ટ્સે ગ્રાહકો માટે એડવાઇઝરી જાહેર કરી અસરગ્રસ્ત મુસાફરોને મોકલવામાં આવેલી એક એડવાઇઝરીમાં, લંડન સ્ટેન્સટેડ એરપોર્ટે જનતાને સંભવિત ફિશિંગના પ્રયાસો સામે સતર્ક રહેવા વિનંતી કરી છે. “અમે તમને વિનંતી કરીએ છીએ કે અમારા તરફથી હોવાનો દાવો કરતા કોઈ પણ અણધાર્યા ઇમેઇલ્સ, કોલ્સ અથવા ટેક્સ્ટ મેસેજ પ્રત્યે ખાસ સાવધ રહો. અમે ચુકવણી (પેમેન્ટ) કે બેંકિંગ માહિતી માંગવા માટે ક્યારેય પણ અણધારી રીતે તમારો સંપર્ક કરીશું નહીં. આનાથી થતી કોઈ પણ અગવડતા કે ચિંતા માટે અમે ક્ષમાપ્રાર્થી છીએ.” MAG એ જણાવ્યું હતું કે તેમની ટેકનિકલ ટીમોએ સ્વતંત્ર સાયબર સિક્યોરિટી કન્સલ્ટન્ટ્સ સાથે મળીને ક્ષતિ (વલ્નરેબિલિટી)ને અલગ કરવા માટે તાત્કાલિક પગલાં લીધાં હતાં અને સાથે જ નિયમનકારી ઓથોરિટીઝને આ ઘટના અંગે રિપોર્ટ કર્યો હતો. પ્રવક્તાના જણાવ્યા મુજબ, આ ગ્રુપ “નિષ્ણાત સલાહકારો સાથે કામ કરી રહ્યું છે અને ગ્રાહકો તથા સિસ્ટમ્સનું રક્ષણ કરવા માટે યોગ્ય પગલાં લઈ રહ્યું છે.” ગ્રુપે વધુમાં ઉમેર્યું હતું કે, “અમે સંબંધિત ઓથોરિટીઝને જાણ કરી દીધી છે અને તેમની સાથે કામ કરી રહ્યા છીએ. કોઈ પણ સમયે મુસાફરોની સુરક્ષા કે એવિએશન સિક્યોરિટી સાથે સમાધાન થયું નથી. એરપોર્ટનું સંચાલન અપ્રભાવિત રહ્યું છે અને ગ્રાહક પાર્કિંગ સેવાઓ સામાન્ય રીતે ચાલુ છે. અમે ગ્રાહકોને આશ્વાસન આપવા માંગીએ છીએ કે માન્ચેસ્ટર એરપોર્ટ ગ્રુપ ગ્રાહકોની માહિતીની સુરક્ષાને અત્યંત ગંભીરતાથી લે છે અને આનાથી થયેલી કોઈ પણ અગવડતા કે ચિંતા માટે અમે માફી માંગીએ છીએ.” દરમિયાન, ત્રણેય ટ્રાન્સપોર્ટ હબ પર ફ્લાઇટ શિડ્યુલ્સ, પેસેન્જર પ્રોસેસિંગ અને વહાન પાર્કિંગની સુવિધાઓ સામાન્ય રીતે કાર્યરત છે. હેકર્સ ઈરાન સાથે જોડાયેલા હોવાની આશંકા અહેવાલો મુજબ, ઈરાન સાથે જોડાયેલા હોવાની શંકા ધરાવતા હેકર્સે યુકેના પાવર જનરેશન ફેસિલિટીને નિશાન બનાવ્યું હતું, જેના કારણે નેશનલ ગ્રીડને નુકસાન પહોંચાડ્યા વિના ચાર દિવસ માટે કામગીરી અસ્થાયી રૂપે બંધ રહી હતી; તેના થોડા દિવસો બાદ જ આ સાયબર હુમલો સામે આવ્યો છે.