અમેરિકામાં છેતરપિંડીના આરોપોનો સામનો કરી રહેલા ભારતીય મૂળના ગૌરવ શ્રીવાસ્તવ પર હવે ઇન્ડોનેશિયામાં પણ મોટા કૌભાંડનો આરોપ લાગ્યો છે. રિપોર્ટ્સ અનુસાર, તેણે પોતાને અમેરિકી ગુપ્તચર એજન્સી CIAનો એજન્ટ ગણાવીને ઇન્ડોનેશિયાના રાષ્ટ્રપતિ પ્રબોવો સુબિયાંતોનો વિશ્વાસ જીત્યો અને સંરક્ષણ સોદાના નામે લગભગ 425 કરોડ રૂપિયાની નકલી લોન મંજૂર કરાવી લીધી. ઓર્ગેનાઇઝ્ડ ક્રાઇમ એન્ડ કરપ્શન રિપોર્ટિંગ પ્રોજેક્ટ (OCCRP) અને ઇન્ડોનેશિયન મેગેઝિન ટેમ્પોના રિપોર્ટ અનુસાર, ગૌરવે ઇન્ડોનેશિયન સેનાને 36 ફાઇટર જેટ, બ્લેક હોક હેલિકોપ્ટર અને મિલિટરી કમાન્ડ સિસ્ટમ અપાવવાનો દાવો કર્યો. આ માટે તેણે નકલી શેલ કંપનીઓનો ઉપયોગ કર્યો અને અમેરિકાના એક કથિત ‘સિક્રેટ પ્રોગ્રામ’ના નામે લગભગ 425 કરોડ રૂપિયાની નકલી લોન મંજૂર કરાવી લીધી. રિપોર્ટમાં દાવો કરવામાં આવ્યો છે કે આ કથિત છેતરપિંડી 2020 થી 2022ની વચ્ચે થઈ. છેતરપિંડીથી મળેલા પૈસાથી ગૌરવે લોસ એન્જલસમાં લગભગ 208 કરોડ રૂપિયાનો એક આલીશાન બંગલો પણ ખરીદ્યો. પ્રબોવો ગૌરવને ‘મિસ્ટર G’ કહીને બોલાવતા હતા રિપોર્ટ અનુસાર, ગૌરવે પ્રબોવોનો એટલો વિશ્વાસ જીતી લીધો હતો કે તેઓ તેને ‘મિસ્ટર G’ કહીને બોલાવતા હતા. તેણે રાષ્ટ્રપતિના અંગત જીવન સાથે જોડાયેલી એવી જાણકારીઓનો પણ ઉપયોગ કર્યો, જે ફક્ત તેમના નજીકના લોકોને જ ખબર હતી. આમાં એ વાત પણ સામેલ હતી કે પ્રબોવો પોતાના ઘરના કરોળિયાના જાળાંને પ્રકૃતિનો ભાગ માને છે અને તેમને સાફ કરાવતા નથી. ગૌરવે એવો પણ દાવો કર્યો કે તેણે 2002ના બાલી બોમ્બ ધડાકાના આતંકવાદીઓને પકડાવવામાં અને પ્રબોવોનું નામ અમેરિકી ઇમિગ્રેશનની બ્લેકલિસ્ટમાંથી હટાવવામાં મદદ કરી હતી. ઇન્ડોનેશિયાના સંરક્ષણ મંત્રાલયના પ્રવક્તા રિકો સિરાઇતે કહ્યું કે જે સંરક્ષણ સોદાઓ પર વાતચીત થઈ હતી, તે અંતિમ કરાર સુધી પહોંચ્યા ન હતા. તેથી સરકારને કોઈ સીધું આર્થિક નુકસાન થયું ન હતું.