આયર્લેન્ડે બીજી T20 મેચમાં ભારતને એક રનથી હરાવીને સિરીઝને 2-0થી ક્લીનસ્વીપ કર્યું. ભારતીય ટીમ 16 T20 સિરીઝ જીત્યા બાદ હારી છે. બેલફાસ્ટમાં મળેલી હાર સાથે શ્રેયસ પ્રથમ બે T20 મેચ હારનાર બીજા ભારતીય કેપ્ટન બન્યો. તે પહેલાં રિષભ પંતે પોતાની કપ્તાનીમાં શરૂઆતની બે મેચ ગુમાવી હતી. IND Vs IRE મેચના ટોપ રેકોર્ડ્સ-મોમેન્ટ્સ… 1. ભારત 3 વર્ષ પછી T20 સિરીઝ હાર્યું આ ભારતની 2023થી 2026 વચ્ચે T20 સિરીઝમાં પ્રથમ હાર છે. ટીમ સતત 16 સિરીઝ બાદ હારી છે. આ પહેલા પાકિસ્તાન 2016થી 2018 વચ્ચે સતત 11 T20 સિરીઝ જીત્યા બાદ હાર્યું હતું. 2. શ્રેયસ કેપ્ટન તરીકે સતત બીજી મેચ હાર્યો શ્રેયસ ઐયર કેપ્ટન તરીકે તેની શરૂઆતની બંને ટી-20 આંતરરાષ્ટ્રીય મેચ હારનાર ભારતનો બીજો કેપ્ટન બન્યો છે. તે પહેલાં રિષભ પંતના નામે આ શરમજનક રેકોર્ડ નોંધાયેલો હતો. પંત ભારતનો પહેલો એવો કેપ્ટન હતો, જેને કેપ્ટનશીપની તેની શરૂઆતની બંને ટી-20 મેચોમાં હારનો સામનો કરવો પડ્યો હતો. 3. ભારત ટી-20માં 1 રનથી ત્રીજી વખત હાર્યું ભારતને ટી-20 ઇન્ટરનેશનલમાં ત્રીજી વખત એક રનથી હાર મળી છે. આ પહેલા ટીમ 2012માં ન્યુઝીલેન્ડ સામે અને 2016માં વેસ્ટ ઇન્ડીઝ સામે એક રનથી હારી હતી. 4. પ્રિન્સ પહેલી બોલ પર સિક્સર ફટકારનાર ત્રીજા ભારતીય પ્રિન્સે મેચની છેલ્લી બોલ પર સિક્સર ફટકારી. તે ટી-20 ઇન્ટરનેશનલમાં પોતાની પહેલી બોલ પર સિક્સર ફટકારનાર ત્રીજા ભારતીય બની ગયા છે. સૌથી પહેલા સૂર્યકુમાર યાદવે 2021માં ઇંગ્લેન્ડના જોફ્રા આર્ચર સામે સિક્સર ફટકારી હતી. તેમના પછી રમનદીપ સિંહે 2024માં સાઉથ આફ્રિકાના એન્ડિલે સિમેલાને સામે સિક્સર ફટકારી હતી. 5. અભિષેક એક વર્ષમાં 6 વખત શૂન્ય પર આઉટ થયો અભિષેક શર્મા ટી-20માં એક વર્ષમાં સૌથી વધુ વખત શૂન્ય પર આઉટ થનાર ભારતીય બેટ્સમેન બની ગયો છે. તે આ વર્ષે છઠ્ઠી વખત શૂન્ય પર આઉટ થયો. આ મામલે પાકિસ્તાનનો સઈમ અયુબ પ્રથમ સ્થાને છે. તે 2025માં 7 વખત શૂન્ય પર આઉટ થયો હતો. 6. ટી-20માં ત્રીજી વખત ભારતીય ઓપનરો શૂન્ય પર આઉટ સંજુ સેમસન અને અભિષેક શર્મા બંને શૂન્ય પર આઉટ થયા. આ ત્રીજી વખત છે, જ્યારે ટી-20માં ભારતના બંને ઓપનર્સ શૂન્ય પર આઉટ થયા. સૌથી પહેલા 2016માં રોહિત શર્મા અને અજિંક્ય રહાણેની જોડી પાકિસ્તાન સામે શૂન્ય પર આઉટ થઈ હતી. શુભમન ગિલ અને યશસ્વી જયસ્વાલની જોડી પણ આ લિસ્ટમાં છે. 7. સેમસન ટી-20માં બીજી વખત ઇનિંગ્સના પહેલા બોલ પર આઉટ સેમસન સૌથી વધુ વખત ટી-20 ઇનિંગ્સના પહેલા બોલ પર આઉટ થનાર ભારતીય બેટ્સમેન બની ગયા છે. તેઓ 2 વખત પહેલા બોલ પર આઉટ થઈ ચૂક્યો છે. તેની પહેલા કેએલ રાહુલ, પૃથ્વી શો, રોહિત શર્મા અને અભિષેક શર્મા 1-1 વખત ટી-20 ઇનિંગ્સના પહેલા બોલ પર આઉટ થઈ ચૂક્યા છે. 8. હેરી ટેક્ટરે પોતાની 100મી ટી-20 મેચમાં ફિફટી ફટકારી આયર્લેન્ડના હેરી ટેક્ટરે 53 રન બનાવ્યા. તે 100મી ટી-20 મેચમાં 50 કે તેથી વધુ સ્કોર બનાવનાર વિશ્વના 8મા બેટ્સમેન બની ગયો છે. આ ખાસ યાદીમાં ગ્લેન મેક્સવેલ, રોહિત શર્મા, જોસ બટલર જેવા દિગ્ગજોના નામ સામેલ છે. 9. અર્શદીપ સિંહની પહેલી ઓવરમાં 2 છગ્ગા લાગ્યા અર્શદીપ સિંહની પહેલી ઓવરમાં આઇરિશ બેટર રોસ અડેરે સતત 2 સિક્સર ફટકારી. તે ટી-20માં ઇનિંગની પહેલી ઓવરમાં 2 છગ્ગા ખાનારા ભારતના ત્રીજા બોલર બન્યો. તેની પહેલા 2016માં રવિચંદ્રન અશ્વિન અને 2020માં શાર્દુલ ઠાકુરની પહેલી ઓવરમાં 2 છગ્ગા લાગ્યા હતા. 10. હેરી ટેક્ટર 100 ટી-20 રમનારા સૌથી યુવા આઇરિશ પ્લેયર હેરી ટેક્ટરે 100 ટી-20 મેચ રમી. તે 100 ટી-20 મેચ રમનારા આયર્લેન્ડના સૌથી યુવા અને દુનિયાનો ત્રીજો સૌથી યુવા ખેલાડી બન્યો છે. તેણે 26 વર્ષ 204 દિવસની ઉંમરે આ સિદ્ધિ હાંસલ કરી. પાકિસ્તાનના શાદાબ ખાન 25 વર્ષ 239 દિવસની ઉંમર સાથે પહેલા સ્થાને છે. અહીંથી ટોપ-3 મોમેન્ટ્સ… 1. પ્રિન્સ યાદવે પહેલી ટી-20 ઇન્ટરનેશનલ વિકેટ લીધી આયર્લેન્ડની ઇનિંગ્સની 7મી ઓવરમાં પ્રિન્સ યાદવે ટી-20 કરિયરની પહેલી વિકેટ લીધી. ઓવરના ત્રીજા બોલ પર લોર્કન ટકર મોટો શોટ મારવા ગયો. પરંતુ, બોલ બેટની કિનારી લઈને વિકેટકીપર ઈશાન કિશનના હાથમાં જતો રહ્યો. 2. શિવમ દુબેએ સતત 2 બોલ પર બે વિકેટ લીધી 15મી ઓવરમાં શિવમ દુબેએ સતત 2 બોલ પર વિકેટ ઝડપી. બેન્જામિન કેલિટ્ઝે પહેલા બે છગ્ગા ફટકાર્યા. ત્યારબાદ ઓવરના ચોથા બોલ પર તિલક વર્માને કેચ આપી બેઠો. તેના પછીના જ બોલ પર ગેરેથ ડેલાની ખાતું ખોલ્યા વિના બોલ્ડ થઈ ગયો. 3. વરસાદના કારણે 2 વાર રમત અટકી વરસાદના કારણે રમત 2 વાર રોકવામાં આવી. પહેલા આયર્લેન્ડની ઇનિંગ્સની 18મી ઓવરમાં વરસાદે વિક્ષેપ પાડ્યો. જેના કારણે 5 મિનિટ સુધી રમત અટકી. ત્યારબાદ બીજી ઇનિંગ્સમાં 8મી ઓવર પછી વરસાદના કારણે રમત ફરીથી રોકવામાં આવી. આ વખતે લગભગ 20 મિનિટ પછી રમત ફરી શરૂ થઈ શકી.