સાઉથ સ્ટાર પ્રભાસની ફિલ્મ ‘ફૌજી’ના શૂટિંગ દરમિયાન એક્ટર રાજેશ શર્માને કથિત રીતે જીવડું કરડ્યા બાદ તેમને હોસ્પિટલમાં ખસેડવામાં આવ્યા હોવાના અહેવાલ આવ્યા હતા. ડોક્ટરોએ તેમની હાલત ગંભીર ગણાવી હતી. જોકે, હવે આ અંગે ‘ફૌજી’ની ટીમે નિવેદન જાહેર કર્યું છે. તાજેતરમાં રાજેશ શર્માની તબિયત બગડવાના સમાચાર સામે આવ્યા હતા. રિપોર્ટ્સ અનુસાર, તેમને પહેલા હૈદરાબાદની એક હોસ્પિટલમાં દાખલ કરવામાં આવ્યા, ત્યારબાદ સારવાર માટે કોલકાતા લઈ જવામાં આવ્યા. કેટલાક રિપોર્ટ્સમાં દાવો કરવામાં આવ્યો કે, તેમની તબિયત ફિલ્મ ‘ફૌજી’ના સેટ પર કોઈ જીવડાં કરડવાથી બગડી. એક્ટ્રેસ સુદીપા ચેટર્જીએ પણ પોતાના એક નિવેદનમાં જીવડાં કરડવાનો ઉલ્લેખ કર્યો હતો. જોકે, બાદમાં તેમણે સોશિયલ મીડિયા પોસ્ટ હટાવી દીધી હતી. ફિલ્મ ‘ફૌજી’ની ટીમે અહેવાલો પર સ્પષ્ટતા કરી સાઉથ ફિલ્મો સાથે સંકળાયેલા પોર્ટલ ગુલ્ટી અનુસાર, ‘ફૌજી’ની ટીમે જણાવ્યું કે તેમને સેટ પર આવી કોઈ ઘટનાની જાણ નથી. ટીમનું કહેવું છે કે, રાજેશ શર્મા આ અહેવાલો સામે આવ્યાના લગભગ એક અઠવાડિયા પહેલા પોતાનું શૂટ પૂરું કરીને ઘરે પરત ફર્યા હતા. તે દરમિયાન પ્રોડક્શન ટીમને કોઈ મેડિકલ ઇમરજન્સીની ઔપચારિક જાણકારી મળી ન હતી. ટીમે એમ પણ કહ્યું કે, અહેવાલો સામે આવ્યા પછી તેમણે રાજેશ શર્માના પરિવારનો સંપર્ક કરવાનો પ્રયાસ કર્યો, પરંતુ કોઈ જવાબ મળ્યો નહીં. રિપોર્ટ અનુસાર, રાજેશ શર્માના પર્સનલ આસિસ્ટન્ટ શુભાશીષ પાંડાએ એક વીડિયો જાહેર કરીને જણાવ્યું કે એક્ટરને ડાયાબિટીસ સંબંધિત સમસ્યાઓના કારણે હોસ્પિટલમાં દાખલ કરવામાં આવ્યા હતા. તેમણે એમ પણ કહ્યું કે, રાજેશ જલ્દી હોસ્પિટલમાંથી ડિસ્ચાર્જ થઈ શકે છે. આ દાવો જીવજંતુ કરડવાના રિપોર્ટ્સથી અલગ છે. અક્ષયે જલ્દી સ્વસ્થ થવાની પ્રાર્થના કરી રાજેશ શર્માના સ્વાસ્થ્યને લઈને ગુરુવારે એક્ટર અક્ષય કુમારે પણ ચિંતા વ્યક્ત કરી હતી. તેણે સોશિયલ મીડિયા પર લખ્યું, ‘મારા પ્રિય મિત્ર રાજેશની તબિયત વિશે સાંભળીને ખૂબ ચિંતા થઈ. શૂટિંગ દરમિયાન તેમને કોઈ જીવજંતુ કરડી ગયું હતું. ભગવાન મહાદેવ તેમને જલ્દી અને સંપૂર્ણ સ્વસ્થ કરે. યાર, જલ્દી સાજા થઈ જાઓ. હજી સાથે બેસીને ખૂબ હસવું-બોલવું બાકી છે.’ રાજેશ શર્માએ પોતાના કરિયરની શરૂઆત થિયેટરથી કરી હતી અને 1996માં ફિલ્મ ‘માચિસ’થી બોલિવૂડમાં ડેબ્યૂ કર્યું હતું. ત્યારબાદ તેમણે ‘પરિણીતા’, ‘ખોસલા કા ઘોસલા’, ‘ઇશ્કિયા’, ‘સ્પેશિયલ 26’, ‘બજરંગી ભાઈજાન’, ‘એમ.એસ. ધોની: ધ અનટોલ્ડ સ્ટોરી’, ‘ટોયલેટ: એક પ્રેમ કથા’ અને ‘તનુ વેડ્સ મનુ રિટર્ન્સ’ જેવી ઘણી ચર્ચિત ફિલ્મોમાં દમદાર અભિનય કર્યો.