ભારત અને આયર્લેન્ડ વચ્ચે T20 સિરીઝની પહેલી મેચ આજે સાંજે 6 વાગ્યે બેલફાસ્ટમાં રમાશે. શ્રેયસ અય્યરની કેપ્ટનશીપમાં ભારતીય T20 ટીમની નવી સફર શરૂ થશે. ટીમ 2028 ઓલિમ્પિક ગેમ્સ અને T20 વર્લ્ડ કપની તૈયારીઓ શરૂ કરશે. આ સિરીઝ 15 વર્ષીય વૈભવ સૂર્યવંશીની પસંદગીના કારણે પણ ખાસ છે. તે 15 વર્ષ 71 દિવસની ઉંમરે ટીમ ઈન્ડિયા માટે પસંદ કરાયેલા સૌથી યુવા ક્રિકેટર છે. હવે સવાલ એ છે કે શું તેને આજે ઈન્ડિયા ડેબ્યૂની તક મળશે? પ્રિવ્યૂ રિપોર્ટમાં વાંચો… મેચની ખાસ વાતો વૈભવનું ડેબ્યૂ સરળ નથી, ટૉપ ઓર્ડરમાં જગ્યા ખાલી નથી વૈભવ સૂર્યવંશીને પ્લેઇંગ-11માં સામેલ કરવો ટીમ મેનેજમેન્ટ માટે સરળ નહીં હોય. આ માટે કોઈ અનુભવી ખેલાડીને બહાર બેસાડવો પડશે અથવા બેટિંગ ક્રમ બદલવો પડશે. ભારતના વર્તમાન ટૉપ ઓર્ડરમાં સંજુ સેમસન, અભિષેક શર્મા અને ઈશાન કિશન સામેલ છે. ત્રણેય ખેલાડીઓએ T20 વર્લ્ડ કપ ફાઈનલમાં ન્યૂઝીલેન્ડ સામે ફિફ્ટી ફટકારી હતી. સંજુએ ઓપનર તરીકે 28 ઇનિંગ્સમાં 3 સદી અને 4 ફિફ્ટીની મદદથી 926 રન બનાવ્યા છે. અભિષેકે 43 ઇનિંગ્સમાં 1414 રન બનાવ્યા છે અને તેનો સ્ટ્રાઇક રેટ 192.38 છે. વૈભવ માટે શું વિકલ્પ હોઈ શકે? જો વૈભવને તક આપવી હોય, તો સેમસન અથવા અભિષેકને નીચે મોકલવા પડશે. ચોથા અને પાંચમા નંબર પર શ્રેયસ અય્યર અને તિલક વર્મા રમી શકે છે. એવામાં વૈભવ માટે છઠ્ઠું સ્થાન જ બચે છે. સામાન્ય રીતે છઠ્ઠો નંબર ઓલરાઉન્ડર માટે રાખવામાં આવે છે. ભારત પાસે શિવમ દુબે, અક્ષર પટેલ, વોશિંગ્ટન સુંદર અને સૂર્યાંશ શેડગેના રૂપમાં વિકલ્પો છે, તેથી ટીમ કોમ્બિનેશનમાં ફેરફાર કરવો સરળ નહીં હોય. બોલિંગમાં યુવા ખેલાડીઓ પાસે તક જસપ્રીત બુમરાહ, મોહમ્મદ સિરાજ અને વરુણ ચક્રવર્તી આ સિરીઝનો ભાગ નથી. આવી સ્થિતિમાં હર્ષિત રાણા, પ્રસિદ્ધ ક્રિષ્ના અને પ્રિન્સ યાદવ પાસે પોતાને સાબિત કરવાની તક છે. પ્રસિદ્ધ ક્રિષ્નાએ અફઘાનિસ્તાન સામેની ત્રીજી વન-ડેમાં 5 વિકેટ લીધી હતી. ઈજામાંથી પરત ફરી રહેલા હર્ષિત રાણા પણ રેસમાં છે. બંને ટીમ વચ્ચે નવમી T20 ઈન્ટરનેશનલ મેચ ભારત અને આયર્લેન્ડ વચ્ચે અત્યાર સુધીમાં કુલ 8 મેચ રમાઈ છે અને તમામ મેચમાં ભારતીય ટીમે જીત મેળવી છે. બંને ટીમ વચ્ચે છેલ્લી T20 મેચ વર્ષ 2024માં રમાઈ હતી. ઈશાને આ વર્ષે સૌથી વધુ રન બનાવ્યા ઈશાન કિશન અને વરુણ ચક્રવર્તી આ વર્ષે ભારતના ટૉપ પરફોર્મર રહ્યા છે. ઈશાને 13 મેચમાં 207ના સ્ટ્રાઇક રેટથી 532 રન બનાવ્યા છે, જેમાં તેણે 1 સદી અને 4 અડધી સદી ફટકારી છે. બીજી તરફ, વરુણ ચક્રવર્તીએ 12 મેચમાં 18 વિકેટ લીધી છે. મેચના દિવસે 84% વરસાદની શક્યતા બેલફાસ્ટમાં રમાનારી આ મેચમાં વરસાદ ખલેલ પહોંચાડી શકે છે. વેધર વેબસાઇટ એક્યુવેધર અનુસાર બેલફાસ્ટમાં મેચના દિવસે 84% વરસાદની સંભાવના છે. પીચ રિપોર્ટ આ મેદાન પર અત્યાર સુધી 33 T20 મેચ રમાઈ છે, જેમાંથી 13 મેચ પહેલા બેટિંગ કરનારી ટીમે જીતી છે, જ્યારે 19 મેચ પહેલા બોલિંગ કરનારી ટીમે જીતી છે. આથી, ટૉસ જીતનારી ટીમ બોલિંગ પસંદ કરી શકે છે. અહીં પહેલી ઇનિંગ્સનો એવરેજ સ્કોર 127 રન અને બીજી ઇનિંગ્સનો એવરેજ સ્કોર 112 રન છે. બન્ને ટીમની ફૂલ સ્ક્વોડ ભારત (IND): શ્રેયસ અય્યર (કેપ્ટન), તિલક વર્મા (વાઇસ કેપ્ટન), વૈભવ સૂર્યવંશી, અભિષેક શર્મા, સંજુ સેમસન, ઈશાન કિશન, શિવમ દુબે, નીતિશ કુમાર રેડ્ડી, અક્ષર પટેલ, વોશિંગ્ટન સુંદર, રવિ બિશ્નોઈ, વરુણ ચક્રવર્તી, મોહમ્મદ સિરાજ, હર્ષિત રાણા, અર્શદીપ સિંહ અને પ્રિન્સ યાદવ. આયર્લેન્ડ (IRE): લોર્કન ટકર (કેપ્ટન અને વિકેટકીપર), રોસ એડેર, બેન કેલિટ્ઝ, ગેરેથ ડેલાની, જ્યોર્જ ડોકરેલ, સ્ટીફન ડોહેની, મેથ્યુ હમ્ફ્રીઝ, ગેવિન હોઈ, મેટ હોલાર્ડ, લિયામ મેકકાર્થી, જય મુંદ્રા, હેરી ટેક્ટર, ટિમ ટેક્ટર અને રુબેન વિલ્સન.