ફુટબોલ વર્લ્ડ કપની ફાઈનલ એકવાર ફરી યુરોપ અને લેટિન અમેરિકાની બે ટીમ વચ્ચે રમાશે. ન્યૂ જર્સીમાં ડિફેન્ડિંગ ચેમ્પિયન આર્જેન્ટિનાનો સામનો યુરોપિયન ચેમ્પિયન સ્પેન સામે થશે. આ મુકાબલો માત્ર ટ્રોફીનો જ નથી, પરંતુ 96 વર્ષના ઈતિહાસ અને 64 વર્ષ જૂના રેકોર્ડનો પણ છે. ઈતિહાસ હાલમાં આર્જેન્ટિનાના પક્ષમાં દેખાઈ રહ્યો છે. યુરોપની બહાર રમાયેલા 11 વર્લ્ડ કપમાંથી 9 વખત લેટિન અમેરિકન ટીમે ટ્રોફી જીતી છે. બીજી તરફ, આર્જેન્ટિના પાસે 1962 પછી સતત બીજી વખત વર્લ્ડ ચેમ્પિયન બનનારી પ્રથમ ટીમ બનવાની તક છે. જ્યારે સ્પેન બિન-યુરોપિયન ધરતી પર દક્ષિણ અમેરિકન ટીમના દબદબાને ખતમ કરીને 96 વર્ષ જૂનો ટ્રેન્ડ બદલવા મેદાને ઉતરશે. 5 મોટા ફેક્ટ્સ: કેમ ખાસ છે સ્પેન-આર્જેન્ટિના ફાઈનલ? 1. વર્લ્ડ કપની ટ્રોફી માત્ર બે ખંડો વચ્ચે જ વહેંચાઈ 1930થી 2022 સુધી રમાયેલા 22 વર્લ્ડ કપમાં માત્ર યુરોપ અને લેટિન અમેરિકાની ટીમ જ ચેમ્પિયન બની છે. યુરોપે પાંચ દેશોના દમ પર 12 અને લેટિન અમેરિકાએ ત્રણ દેશોના દમ પર 10 ટાઇટલ જીત્યા છે. એટલે કે 96 વર્ષમાં કોઈ પણ એશિયન, આફ્રિકન કે ઉત્તર અમેરિકન ટીમ વર્લ્ડ ચેમ્પિયન બની શકી નથી. 2. યુરોપની બહાર વર્લ્ડ કપ… તો લેટિન અમેરિકાનો દબદબો યુરોપની બહાર અત્યાર સુધી 11 વર્લ્ડ કપ યોજાયા છે. તેમાંથી 9 વખત લેટિન અમેરિકન અને માત્ર 2 વખત યુરોપિયન ટીમ ચેમ્પિયન બની છે. ઉરુગ્વે (2), બ્રાઝિલ (5) અને આર્જેન્ટિના (2)એ મળીને નવ ટ્રોફી જીતી છે, જ્યારે સ્પેન (2010) અને જર્મની (2014) જ યુરોપની એવી ટીમ છે જેણે બિન-યુરોપિયન ધરતી પર ખિતાબ જીત્યો છે. 3. આર્જેન્ટિના પાસે 64 વર્ષ જૂનો રેકોર્ડ પુનરાવર્તિત કરવાની તક આર્જેન્ટિના સતત બીજી વખત વર્લ્ડ કપ જીતવાથી માત્ર એક ડગલું દૂર છે. ટીમે 2022માં કતારમાં ત્રીજો વર્લ્ડ કપ જીત્યો હતો. જો તે ન્યૂ જર્સીમાં સ્પેનને હરાવીને પોતાનો ટાઇટલ બચાવવામાં સફળ રહેશે, તો તે 1962 પછી સતત બે વર્લ્ડ કપ જીતનારી પ્રથમ ટીમ બની જશે. અત્યાર સુધી માત્ર બે જ દેશોએ પોતાના વર્લ્ડ કપ ટાઇટલનું સફળતાપૂર્વક ડિફેન્ડ કર્યું છે. ઈટાલીએ 1934 અને 1938, જ્યારે બ્રાઝિલે 1958 અને 1962માં સતત બે વાર ટ્રોફી જીતી હતી. 4. શું સ્પેન ઈતિહાસ બદલી શકશે? સ્પેને પોતાનો એકમાત્ર વર્લ્ડ કપ 2010માં સાઉથ આફ્રિકામાં જીત્યો હતો. હવે તેની સામે બીજી ટ્રોફી જીતવાની સાથે-સાથે બિન-યુરોપિયન ધરતી પર લેટિન અમેરિકાના લાંબા વર્ચસ્વને પડકારવાની તક છે. સ્પેનની વર્લ્ડ કપ સફર ઉતાર-ચઢાવ ભરેલી રહી છે. 2010ના ટાઇટલ પછી ટીમ 2014, 2018 અને 2022માં નોકઆઉટથી આગળ વધી શકી નહોતી. બીજી તરફ આર્જેન્ટિના છેલ્લા ચાર વર્લ્ડ કપમાં ત્રણ વખત સેમિફાઈનલ અને બે વખત ફાઈનલ રમી ચૂક્યું છે. 5. ફાઈનલના આંકડા કોના પક્ષમાં? વર્લ્ડ કપના ઈતિહાસમાં યુરોપ અને લેટિન અમેરિકાની ટીમ 11 વખત ફાઈનલમાં સામસામે આવી છે. તેમાંથી લેટિન અમેરિકાએ 8 અને યુરોપે 3 વખત જીત મેળવી છે. જર્મની સૌથી વધુ 8 ફાઈનલ રમનારી ટીમ છે, પરંતુ સૌથી સફળ ટીમ બ્રાઝિલ છે, જેણે સાત ફાઈનલમાંથી પાંચ વખત ટ્રોફી જીતી છે. આર્જેન્ટિના 2026ની ફાઈનલ રમતાની સાથે જ સાતમી વખત ટાઇટલ મેચમાં ઉતરશે. યજમાન દેશોનો રેકોર્ડ પણ રસપ્રદ છે. અત્યાર સુધી આઠ યજમાન દેશો ફાઈનલ સુધી પહોંચ્યા છે અને તેમાંથી 6 દેશોએ પોતાના ઘરઆંગણે જ ટ્રોફી જીતી છે.