IPLમાં શુક્રવારે દિલ્હી કેપિટલ્સ અને રાજસ્થાન રોયલ્સ વચ્ચે રોમાંચક મેચ રમાઈ. છેલ્લા ઓવર સુધી ચાલેલી આ મેચ દિલ્હીએ 7 વિકેટે જીતી લીધી. કેપિટલ્સે આઈપીએલના ઇતિહાસમાં પોતાનો સૌથી મોટો રન ચેઝ કર્યો છે. જયપુરના સવાઈ માનસિંહ સ્ટેડિયમમાં રમાયેલી આ મેચની શરૂઆત યશસ્વી જયસ્વાલના ગગનચુંબી છગ્ગાથી થઈ. તેણે મિચેલ સ્ટાર્કની શોર્ટ લેન્થ બોલ પર પુલ કર્યો અને ડીપ સ્ક્વેર લેગ બાઉન્ડ્રીની બહાર પહોંચાડી દીધો. જોકે, સ્ટાર્કે તેને પોતાની જ બોલ પર કેચ કરીને પેવેલિયન પણ મોકલી દીધો. ચાહકોને સૂર્યવંશી અને સ્ટાર્ક વચ્ચે આવા જ મુકાબલાની અપેક્ષા હતી, પરંતુ વૈભવને કાઈલ જેમિસને બોલ્ડ કરી દીધો.આવા જ ટોપ મોમેન્ટ્સ અને રેકોર્ડ્સ આ સ્ટોરીમાં વાંચો… સૌથી પહેલા ટોપ રેકોર્ડ દિલ્હીનો IPLમાં સૌથી મોટો રનચેઝ દિલ્હી કેપિટલ્સે રાજસ્થાન રોયલ્સ સામે 226 રનનો ટાર્ગેટ હાંસલ કર્યો. આ IPLમાં દિલ્હીનો સૌથી મોટો રનચેઝ છે. તેણે 2025માં લખનઉ સામે 210 રન અને 2017માં ગુજરાત સામે 209 રનનો ટાર્ગેટ હાંસલ કર્યો હતો. રાહુલની રોયલ્સ સામે 8મી ફિફ્ટી, ડિવિલિયર્સની બરાબરી કરી કેએલ રાહુલે રાજસ્થાન રોયલ્સ સામે 75 રનની ઇનિંગ રમી. તેણે IPLમાં રાજસ્થાન સામે સૌથી વધુ અડધી સદી ફટકારવાના રેકોર્ડની બરાબરી કરી છે. એબી ડિવિલિયર્સે પણ રાજસ્થાન સામે 9 અડધી સદી ફટકારી છે. જયસ્વાલે ચોથી વખત ઇનિંગ્સના પહેલા બોલ પર સિક્સર ફટકારી યશસ્વી જયસ્વાલે દિલ્હી સામે ઇનિંગ્સના પહેલા બોલ પર જ સિક્સર ફટકારી. તેણે મિચેલ સ્ટાર્કને બેકવર્ડ સ્ક્વેર લેગ પર સિક્સર ફટકારી. જયસ્વાલે IPLમાં ચોથી વખત ઇનિંગ્સના પહેલા બોલ પર જ સિક્સર ફટકારી છે. પંજાબ કિંગ્સના બેટર પ્રિયાંશ આર્ય 2 વખત આવું કરી ચૂક્યા છે. યશસ્વીએ પહેલા બોલ પર સિક્સર ફટકારીને ઇતિહાસ રચ્યો જાયસ્વાલ IPL મેચની પહેલી બોલ પર સિક્સર ફટકારનારા બેટરોની યાદીમાં સામેલ થઈ ગયા છે. તેમની પહેલાં 2025માં પ્રિયાંશ આર્યા અને 2024માં ફિલ સોલ્ટ પણ આ કારનામું કરી ચૂક્યા છે. વિરાટ કોહલીએ 2019 અને નમન ઓઝાએ 2009માં આ સિદ્ધિ હાંસલ કરી છે. અહીંથી મેચની ટોપ મોમેન્ટ્સ સૂર્યવંશીને બોલ્ડ કરીને જેમિસનનું ‘એગ્રેસિવ’ સેલિબ્રેશન વૈભવ સૂર્યવંશી અને દિલ્હીના બોલર કાઈલ જેમિસન વચ્ચે બીજી ઓવરમાં જબરદસ્ત ટક્કર જોવા મળી. પહેલા સૂર્યવંશીએ પોતાની પહેલી બોલ પર લોંગ ઓફ પર ચોગ્ગો ફટકાર્યો. તેના પછીની જ બોલ પર જેમિસને ડિપિંગ ફુલ ટોસ પર સૂર્યવંશીને ક્લીન બોલ્ડ કરી દીધો. વિકેટ લીધા પછી જેમિસન, સૂર્યવંશી પાસે ગયો અને આક્રમક અંદાજમાં ઉજવણી કરી. જુરેલ છગ્ગો મારીને આગલી બોલ પર આઉટ થયો રાજસ્થાન રોયલ્સની ઇનિંગ્સની 12મી ઓવર ઘણી ઇવેન્ટફુલ રહી. દિલ્હીના બોલર અક્ષર પટેલની ત્રીજી બોલ પર ધ્રુવ જુરેલે સીધો છગ્ગો ફટકાર્યો. આગળનો બોલ અક્ષરે ઓફ સ્ટમ્પની બહાર શોર્ટ નાખ્યો. જુરેલે મોટો શોટ રમવાનો પ્રયાસ કર્યો, પરંતુ બોલ લોંગ-ઓન પર ઉભેલા ટ્રિસ્ટન સ્ટબ્સના હાથમાં ગયો. રિયાન પરાગ રનઆઉટથી બચ્યા, આશુતોષ થ્રો ચૂકી ગયો રાજસ્થાનની ઇનિંગ્સની 14મી ઓવરમાં રનઆઉટની તક દિલ્હીના હાથમાંથી સરકી ગઈ. કુલદીપ યાદવના બોલ પર રિયાન પરાગ રનઆઉટ થતા માંડ માંડ બચ્યો. બેકવર્ડ પોઈન્ટ પર આશુતોષે ડાઈવ લગાવીને ચોગ્ગો રોક્યો, ત્યારબાદ જાડેજા અને પરાગે રન ચોરવાનો પ્રયાસ કર્યો. ફિલ્ડરનો થ્રો આવતા કીપર કેએલ રાહુલે ગિલ્લીઓ તો વિખેરી, પરંતુ તેને સ્ટમ્પ તરફ ફરવામાં સમય લાગી ગયો. આ વિલંબનો ફાયદો ઉઠાવીને પરાગે સમયસર ક્રીઝમાં ડાઈવ લગાવી દીધી અને સુરક્ષિત બચી ગયો. કુલદીપની ઓવરમાં ફરેરાએ 3 છગ્ગા ફટકાર્યા 18મી ઓવરમાં ડોનોવન ફરેરાએ કુલદીપ યાદવની બોલને ત્રણ વખત બાઉન્ડ્રીની પાર પહોંચાડી. તેણે ઓવરના ત્રીજા બોલને કવર ઉપરથી શાનદાર ઇનસાઇડ-આઉટ સિક્સર ફટકારી. પછી તરત જ આગલા બોલને સીધો લોંગ-ઓફ ઉપરથી સ્ટેન્ડમાં મોકલી દીધો. 5મો બોલ ડોટ રહ્યો, પરંતુ છેલ્લા બોલને ડીપ મિડ-વિકેટ ઉપરથી સિક્સર ફટકારી. અક્ષરે કેચ છોડ્યો, ફરેરાને સિક્સર મળી ગઈ પ્રથમ ઇનિંગ્સના છેલ્લા બોલ પર ડોનોવન ફરેરા આઉટ થઈ શક્યા હોત, પરંતુ દિલ્હીના કેપ્ટન અક્ષર પટેલ પાસેથી એક મોટી તક છૂટી ગઈ. નટરાજનના લો ફુલ-ટોસ પર ફરેરાએ ફ્લેટ શોટ રમ્યો, જે સીધો લોંગ-ઓફ પર ઉભેલા અક્ષરના હાથમાં ગયો. અક્ષરે ‘રિવર્સ કપ’ સ્ટાઇલમાં કેચ પકડવાનો પ્રયાસ કર્યો, પરંતુ બોલ તેમના હાથમાંથી છટકીને બાઉન્ડ્રીની પાર પડી ગયો. આ રીતે રાજસ્થાનની ઇનિંગ્સ છગ્ગા સાથે સમાપ્ત થઈ. આર્ચરનો બાઉન્સર નિસાંકાના હેલ્મેટ પર વાગ્યો ત્રીજી ઓવરમાં જોફ્રા આર્ચરનો બાઉન્સર પાથુમ નિસાંકાના હેલ્મેટ પર વાગ્યો. આને કારણે થોડા સમય માટે રમત અટકી રહી. મેદાન પર ફિઝિયો આવ્યા અને તેમણે નિસાંકાને તપાસ્યા. જોકે, નિસાંકાના હેલ્મેટ સાથે અથડાયા પછી બોલ બાઉન્ડ્રી લાઇન બહાર જતો રહ્યો. રિપ્લેમાં દેખાયું કે બોલ બેટની ટોપ એજ લઈને હેલ્મેટ પર વાગ્યો હતો. નીતિશ રાણાના કેચ આઉટ પર સવાલો ઉઠ્યા દિલ્હીની ઇનિંગ્સની 15મી ઓવરમાં થર્ડ અમ્પાયર દ્વારા ઉતાવળમાં અપાયેલા નિર્ણય પર સવાલો ઉઠ્યા. તુષાર દેશપાંડેની ત્રીજી બોલ દિલ્હીના બેટર નીતિશ રાણાના બેટની કિનારી લઈને વિકેટકીપર ધ્રુવ જુરેલના હાથમાં ગઈ. અમ્પાયરે નોટઆઉટ જાહેર કર્યો, પછી રાજસ્થાને રિવ્યુ લીધો અને થર્ડ અમ્પાયરે આઉટ આપ્યો. જોકે, રિપ્લેમાં દેખાયું કે જ્યારે બોલ બેટની નજીક હતો, ત્યારે બેટ નીચે જમીન પર પણ વાગ્યો હતો. અલ્ટ્રા એજમાં સ્પાઇક જોઈને અમ્પાયરે તરત જ આઉટ આપી દીધો. આના પર સ્ટાર સ્પોર્ટ્સમાં કોમેન્ટ્રી કરી રહેલા પૂર્વ ક્રિકેટર મોહમ્મદ કૈફે સવાલો ઉઠાવ્યા. તેમણે કહ્યું કે થર્ડ અમ્પાયરે ઉતાવળમાં નિર્ણય લીધો. તેમને વધુ સમય લઈને હકીકત તપાસવી જોઈતી હતી. ફ્લડ લાઇટ બંધ થવાને કારણે રમત અટકી દિલ્હીની ઇનિંગ્સની 17મી ઓવરમાં મેદાનના એક ફ્લડલાઇટ ટાવર બંધ થવાને કારણે રમતને વચ્ચે જ રોકવી પડી હતી. આ દરમિયાન બોલર બ્રિજેશ શર્મા, જયસ્વાલ સાથે બોલિંગ રણનીતિ પર વાત કરતા જોવા મળ્યા. આશુતોષે પોતાના હેલ્મેટ પર બોલ માર્યો 18મી ઓવરમાં આશુતોષ મુશ્કેલીમાં દેખાયા. તુષાર દેશપાંડેની બીજી બોલ પર આશુતોષ શર્મા લેપ શોટ રમવા ગયા. આ દરમિયાન બોલ સીધો તેમના હેલ્મેટના ગ્રિલ પર વાગ્યો. ત્યારબાદ કન્કશન ટેસ્ટ માટે ફિઝિયો તરત મેદાન પર આવ્યા. જોકે, આશુતોષે બેટિંગ ચાલુ રાખી.
નો બોલથી મેચ પૂરી થઈ બીજી ઇનિંગ્સની 20મી ઓવરમાં નો-બોલ સાથે જ દિલ્હી મેચ જીતી ગઈ. ઓવરની બીજી બોલ બ્રિજેશ શર્માએ યોર્કર નાખવાનો પ્રયાસ કરતા હાઈ ફુલ-ટોસ ફેંકી, જેના પર આશુતોષ શર્માએ લેગ-સાઇડમાં શોટ રમીને સિંગલ પૂરો કર્યો. અમ્પાયરે તેને નો-બોલ જાહેર કર્યો અને દિલ્હી મેચ જીતી ગઈ. જીત બાદ આશુતોષ મેદાન પર ખુશીથી ઉછળી પડ્યા. અક્ષરે અકસ્માતમાં મૃત્યુ પામેલા બે ચાહકોને જીત સમર્પિત કરી રાજસ્થાન સામે મળેલી જીતને અક્ષર પટેલે અકસ્માતમાં મૃત્યુ પામેલા પોતાના બે ચાહકોને સમર્પિત કરી છે. છેલ્લા મેચ પછી દિલ્હીમાં થયેલા એક માર્ગ અકસ્માતમાં બે યુવાન ભાઈઓ, અભવ અને યજ્ઞ ભાટિયાનું મૃત્યુ થયું હતું. અક્ષરે પોતાની સંવેદના વ્યક્ત કરી છે.