પૂર્વ ઓસ્ટ્રેલિયન ખેલાડી જસ્ટિન લેંગર, ઇંગ્લેન્ડ ટેસ્ટ ટીમના નવા હેડ કોચની રેસમાં સૌથી આગળ ચાલી રહ્યા છે. પૂર્વ ભારતીય કોચ રવિ શાસ્ત્રી અને રાહુલ દ્રવિડ આ રેસનો હિસ્સો નથી. તો બીજી તરફ એન્ડી ફ્લાવરે પોતાને આનાથી અલગ કરી લીધા છે. લેંગર IPLમાં લખનઉ સુપર જાયન્ટ્સના કોચ છે. જો તેઓ આ પદ માટે પસંદગી પામે છે, તો તેમને IPLમાં કોચિંગ છોડવી પડી શકે છે. ન્યૂઝીલેન્ડ સામે હોમ ટેસ્ટ સિરીઝ 2-1થી હાર્યા બાદ બોર્ડે બ્રેન્ડન મેકકુલમને પદ પરથી હટાવી દીધા હતા. જોકે તેઓ વન-ડે અને T20 ફોર્મેટમાં કોચિંગ ચાલુ રાખશે. ———————— સ્પોર્ટ્સના અન્ય સમાચાર પણ વાંચો… જિયોહોટસ્ટારે ધ હંડ્રેડ ક્રિકેટ લીગના ડિજિટલ રાઈટ્સ ખરીદ્યા જિયોહોટસ્ટારે ભારતમાં ‘ધ હંડ્રેડ 2026’ના પુરુષ અને મહિલા ટુર્નામેન્ટ્સના બ્રોડકાસ્ટિંગ રાઈટ્સ મેળવી લીધા છે. છઠ્ઠી સીઝનની તમામ 68 મેચનું પ્રસારણ સ્ટાર સ્પોર્ટ્સ નેટવર્ક અને જિયોહોટસ્ટાર પર કરવામાં આવશે. ટુર્નામેન્ટની પહેલી મેચ 21 જુલાઈએ ધ ઓવલ ખાતે રમાશે. ફાઈનલ 16 ઑગસ્ટે લોર્ડ્સમાં થશે. ઘણા ભારતીયો ધ હંડ્રેડની વુમન્સ લીગનો ભાગ છે. જેમાં સ્મૃતિ મંધાના, દીપ્તિ શર્મા, રિચા ઘોષ અને જેમિમાહ રોડ્રિગ્સ પણ સામેલ છે. ———————— સ્પોર્ટ્સના અન્ય સમાચાર પણ વાંચો… હોકી વર્લ્ડકપ માટે ભારતની ટીમ જાહેર હોકી ઈન્ડિયાએ આવતા મહિને યોજાનાર FIH મેન્સ હોકી વર્લ્ડ કપ માટે 20 સભ્યોની ભારતીય ટીમની જાહેરાત કરી છે. અનુભવી ડ્રેગ ફ્લિકર હરમનપ્રીત સિંહ ટીમની આગેવાની કરશે. પ્રો લીગ ટીમમાં સામેલ રહેલા ચાર ખેલાડીઓને અંતિમ દળમાં સ્થાન મળ્યું નથી. તેમાં ડિફેન્ડર અમનદીપ લકડા, મિડફિલ્ડર રાજ કુમાર પાલ, રબીચંદ્ર સિંહ મોઇરાંગથેમ અને ફોરવર્ડ સેલ્વમ કાર્થીના નામ છે. સૌથી અનુભવી ખેલાડી મનપ્રીત સિંહ ઉપરાંત હાર્દિક સિંહ, વિવેક સાગર પ્રસાદ, અભિષેક અને અમિત રોહિદાસ જેવા ખેલાડીઓ ટીમની કરોડરજ્જુ હશે. મુખ્ય કોચ ક્રેગ ફુલ્ટને કહ્યું કે ટીમમાં અનુભવ અને યુવા ખેલાડીઓનું સંતુલિત મિશ્રણ છે. ફુલ્ટને વિશ્વાસ વ્યક્ત કર્યો કે 1975 વિશ્વ કપ જીતના 50 વર્ષ પૂરા થવાના અવસરે આ ટીમ ભારતીય હોકી ઇતિહાસમાં નવો અધ્યાય લખી શકે છે. ભારતને પૂલ-Dમાં ઇંગ્લેન્ડ, પાકિસ્તાન અને વેલ્સ સાથે રાખવામાં આવ્યું છે. ભારતીય ટીમ 15 ઑગસ્ટે વેલ્સ સામે અભિયાન શરૂ કરશે. ત્યારબાદ 17 ઑગસ્ટે ઇંગ્લેન્ડ અને 19 ઑગસ્ટે કટ્ટર હરીફ પાકિસ્તાન સામે મુકાબલો થશે. તમામ ગ્રુપ મેચ નેધરલેન્ડ્સના એમ્સટેલવીનમાં રમાશે. ભારતની ટીમ ગોલકીપર: મોહિત એચએસ, સૂરજ કરકેરા. ડિફેન્ડર: જર્મનપ્રીત સિંહ, હરમનપ્રીત સિંહ (કેપ્ટન), અમિત રોહિદાસ, જુગરાજ સિંહ, સંજય, સુમિત, યશદીપ સિવાચ.મિડફિલ્ડર: મનપ્રીત સિંહ, હાર્દિક સિંહ, વિવેક સાગર પ્રસાદ, નીલકાંત શર્મા, રાજિંદર સિંહ, આદિત્ય અર્જુન લાલગે. ફોરવર્ડ: મનદીપ સિંહ, દિલપ્રીત સિંહ, અભિષેક, સુખજીત સિંહ, શિલાનંદ લકડા. ———————— સ્પોર્ટ્સના અન્ય સમાચાર પણ વાંચો… દિલીપ ટ્રોફી માટે વેસ્ટ ઝોનની ટીમ જાહેર, ઋતુરાજ ગાયકવાડને કમાન 23 ઑગસ્ટથી શરૂ થનારી દિલીપ ટ્રોફી 2026 માટે વેસ્ટ ઝોને 15 સભ્યોની ટીમની જાહેરાત કરી દીધી છે. મહારાષ્ટ્રના બેટર ઋતુરાજ ગાયકવાડને કેપ્ટન અને મુંબઈના સ્પિન ઓલરાઉન્ડર શમ્સ મુલાનીને વાઇસ-કેપ્ટન બનાવ્યો છે. ટીમમાં શાર્દૂલ ઠાકુર, સરફરાઝ ખાન, પૃથ્વી શો, મુશીર ખાન અને તનુષ કોટિયાનનો પણ સમાવેશ થાય છે. ઋતુરાજ આ ટુર્નામેન્ટમાં મિડલ ઓર્ડરમાં બેટિંગ કરશે. જ્યારે, મુંબઈ છોડીને મહારાષ્ટ્રથી રમતા પૃથ્વી શોને રણજી ટ્રોફી 2025-26માં 537 રન બનાવ્યા બાદ ટીમમાં તક મળી છે. તેણે ચંદીગઢ સામે 156 બોલમાં 222 રનની ઇનિંગ રમી હતી. 19 વર્ષીય આયુષ મ્હાત્રે ઈજાના કારણે ટીમમાં સ્થાન બનાવી શક્યો નથી. ટુર્નામેન્ટ 23 ઑગસ્ટથી 10 સપ્ટેમ્બર સુધી બેંગલુરુ સ્થિત BCCI સેન્ટર ઑફ એક્સેલન્સમાં રમાશે. વેસ્ટ ઝોનની ટીમ કેપ્ટન: ઋતુરાજ ગાયકવાડ (મહારાષ્ટ્ર) વાઇસ-કેપ્ટન: શમ્સ મુલાની (મુંબઈ), સરફરાઝ ખાન, પૃથ્વી શો, જયમીત પટેલ, શિવાલિક શર્મા, શાર્દૂલ ઠાકુર, મુશીર ખાન, અતિત શેઠ, હાર્વિક દેસાઈ, ઉર્વિલ પટેલ, તુષાર દેશપાંડે, તનુષ કોટિયન, સિદ્ધાર્થ દેસાઈ, મુકેશ ચૌધરી. ———————— સ્પોર્ટ્સના અન્ય સમાચાર પણ વાંચો… આશુતોષ શર્મા ઇંગ્લેન્ડમાં હેમ્પશાયર ક્રિકેટ ક્લબ તરફથી રમશે દિલ્હી કેપિટલ્સના ઓલરાઉન્ડર આશુતોષ શર્મા ઇંગ્લેન્ડની ડોમેસ્ટિક વન-ડે કપમાં હેમ્પશાયર ક્રિકેટ ક્લબ તરફથી રમશે. કાઉન્ટી ક્લબે સોમવારે તેની સાથે આખી ટુર્નામેન્ટ માટે કરારની જાહેરાત કરી. GMR ગ્રુપ દિલ્હી કેપિટલ્સ અને હેમ્પશાયર ક્રિકેટ ક્લબ બંનેનો સહ-માલિક છે. 27 વર્ષીય આશુતોષના નામે ભારતીય ક્રિકેટમાં સૌથી ઝડપી T20 અડધી સદીનો રેકોર્ડ છે. તેણે સૈયદ મુશ્તાક અલી ટ્રોફીમાં રેલવે તરફથી રમતા અરુણાચલ પ્રદેશ સામે 11 બોલમાં અડધી સદી ફટકારી હતી. હેમ્પશાયર ક્રિકેટ ક્લબના ક્રિકેટ ડાયરેક્ટર જાઈલ્સ વ્હાઈટે કહ્યું કે આશુતોષે IPLમાં દિલ્હી કેપિટલ્સ માટે શાનદાર પ્રદર્શન કર્યું અને દબાણમાં સારું રમવાની ક્ષમતા ધરાવે છે. ગઈ સીઝનમાં વન-ડે કપનો ખિતાબ ચૂકી ગયેલા હેમ્પશાયર ક્રિકેટ ક્લબને આશા છે કે આશુતોષ આ વખતે ટીમને ટ્રોફી અપાવવામાં મહત્વની ભૂમિકા ભજવશે. ———————— સ્પોર્ટ્સના અન્ય સમાચાર પણ વાંચો… બીજી યુથ ટેસ્ટના પહેલા દિવસે ભારત U-19નો સ્કોર 253/3 કોલંબોમાં રમાઈ રહેલી બીજી યુથ ટેસ્ટના પહેલા દિવસે ભારત અંડર-19એ 0/2ની ખરાબ શરૂઆત બાદ શાનદાર વાપસી કરતા 65 ઓવરમાં 3 વિકેટે 253 રન બનાવ્યા. વરસાદ અને ખરાબ લાઇટના કારણે રમત સમય પહેલા રોકવી પડી. ઓપનિંગ બેટર લક્ષ્ય રાયચંદાણી અને સાગર વિર્ક ખાતું ખોલ્યા વિના આઉટ થયો હતો. ત્યારબાદ કેપ્ટન યશવર્ધન ચૌહાણ (78) અને કુશાગ્ર ઓઝા (103)એ ત્રીજી વિકેટ માટે 122 રન જોડીને ઇનિંગને સંભાળી હતી. યશવર્ધનના આઉટ થયા બાદ મનલ ચૌહાણ (55)એ કુશાગ્રનો સાથ આપ્યો. બંને ચોથી વિકેટ માટે અત્યાર સુધી અણનમ 131 રન જોડી ચૂક્યા છે. શ્રીલંકા તરફથી ગિમહાન મેન્ડિસે 2 અને સેથમિકા સેનેવિરાત્નેએ 1 વિકેટ લીધી. ———————— સ્પોર્ટ્સના અન્ય સમાચાર પણ વાંચો… જૂનના ICC પ્લેયર ઓફ ધ મંથ નાથન સ્મિથ અને ડેની વ્યાટ-હોજ બન્યા ICCએ જૂન મહિનાના પ્લેયર ઓફ ધ મંથ એવોર્ડની જાહેરાત કરી. મેન્સ કેટેગરીમાં ન્યૂઝીલેન્ડના ઝડપી બોલર નાથન સ્મિથ અને વુમન્સ કેટેગરીમાં ઇંગ્લેન્ડની ઓપનિંગ બેટર ડેની વ્યાટ-હોજને સન્માન મળ્યું. સ્મિથે ભારતના કેપ્ટન શુભમન ગિલ અને બાંગ્લાદેશના મોસાદેક હુસૈનને પાછળ છોડ્યા, જ્યારે ડેનીએ સ્કોટલેન્ડની કેથરીન બ્રાઇસ અને ભારતની શ્રી ચરણીને હરાવી. ન્યૂઝીલેન્ડની ઇંગ્લેન્ડ પર 2-1ની ટેસ્ટ સિરીઝ જીતમાં સ્મિથ સૌથી વધુ 16 વિકેટ લેનાર બોલર રહ્યો. લોર્ડ્સ ટેસ્ટમાં તેમણે મેચમાં 9 વિકેટ (બીજી ઇનિંગ્સમાં 6/70) લીધી. એવોર્ડ મળવા પર તેણે કહ્યું કે ટીમની જીતમાં યોગદાન આપવું તેના માટે સૌથી મોટી સિદ્ધિ છે. વુમન્સ કેટેગરીમાં ડેની વ્યાટ-હોજે T20 વર્લ્ડ કપમાં શાનદાર બેટિંગ કરી. તેણે શ્રીલંકા સામે 62 બોલમાં અણનમ 105 રન અને ન્યૂઝીલેન્ડ સામે 53 બોલમાં અણનમ 89 રન બનાવ્યા. બંને મેચમાં તેને પ્લેયર ઓફ ધ મેચ તરીકે પસંદ કરવામાં આવી. તેણે કહ્યું કે લોર્ડ્સમાં વર્લ્ડ કપ ફાઇનલ રમવું હંમેશા યાદગાર રહેશે. ICC પ્લેયર ઑફ ધ મંથના વિજેતાઓની પસંદગી ચાહકોના વોટિંગ અને ભૂતપૂર્વ ખેલાડીઓ તથા ક્રિકેટ નિષ્ણાતોની પેનલના રેટિંગના આધારે કરવામાં આવે છે.