દુબઈમાં રમાયેલી ત્રીજી T20 મેચમાં વેસ્ટ ઇન્ડીઝ ક્રિકેટ ટીમે અફઘાનિસ્તાનને 15 રનથી હરાવીને સિરીઝમાં ક્લીન સ્વીપ થવાથી પોતાને બચાવી લીધું. આ જીતનો હીરો શમર સ્પ્રિંગર રહ્યો, જેણે 19મી ઓવરમાં હેટ્રિક લઈને મેચનો આખો માહોલ બદલી નાખ્યો અને તેને મેન ઓફ ધ મેચ તરીકે પસંદ કર્યો. શમર સ્પ્રિંગરે બોલ અને બેટ બંનેથી મહત્વપૂર્ણ યોગદાન આપ્યું. તેણે પોતાની 4 ઓવરમાં માત્ર 20 રન આપીને 4 વિકેટ ઝડપી, જ્યારે બેટિંગમાં અણનમ 14 રન બનાવીને ટીમના સ્કોરને મજબૂતી આપી. જોકે, અફઘાનિસ્તાને પ્રથમ બે મેચ જીતીને સિરીઝ પહેલેથી જ પોતાના નામે કરી લીધી હતી, પરંતુ ત્રીજી મેચમાં વેસ્ટ ઇન્ડીઝે શાનદાર વાપસી કરીને જીત નોંધાવી. 19મી ઓવર બની ટર્નિંગ પોઈન્ટ
152 રનના ટાર્ગેટને ચેઝ કરતા અફઘાનિસ્તાનને છેલ્લી બે ઓવરમાં 25 રન જોઈતા હતા. ક્રિઝ પર રહેમાનુલ્લાહ ગુરબાઝ 71 રન બનાવીને રમી રહ્યો હતો, જ્યારે ગુલબદ્દીન નઇબ તેનો સાથ આપી રહ્યો હતો. 19મી ઓવરમાં સ્પ્રિંગરે પહેલી જ બોલ પર ગુરબાઝને આઉટ કર્યો. ત્યારબાદ આવેલા રાશિદ ખાનને કેચ આઉટ કરાવ્યો અને પછીની જ બોલ પર શાહિદુલ્લાહને બોલ્ડ કરીને હેટ્રિક પૂરી કરી. આ ઓવરમાં તેણે માત્ર 5 રન આપીને 3 વિકેટ ઝડપી. છેલ્લી ઓવરમાં અફઘાનિસ્તાનને જીતવા માટે 20 રન જોઈતા હતા, પરંતુ રમન સિમન્ડ્સે માત્ર 4 રન આપ્યા અને ગુલબદ્દીન નઇબને રન આઉટ કરીને વેસ્ટ ઇન્ડીઝની જીત પાકી કરી દીધી. ગુરબાઝ-ઈબ્રાહિમની મજબૂત શરૂઆત
આ પહેલા ટાર્ગેટને ચેઝ કરતા ગુરબાઝ અને ઈબ્રાહિમ ઝાદરાને પહેલી વિકેટ માટે 72 રનની ભાગીદારી કરી. શરૂઆતની 7 ઓવરમાં ટીમે 59 રન ઉમેર્યા હતા, પરંતુ મિડલ ઓવર્સમાં વિકેટો પડવાથી અફઘાનિસ્તાન દબાણમાં આવી ગયું. વેસ્ટ ઇન્ડીઝની ઇનિંગ્સ
પહેલા બેટિંગ કરતા વેસ્ટ ઇન્ડીઝની શરૂઆત ખરાબ રહી અને 4 ઓવરમાં માત્ર 27 રન બન્યા. જોનસન ચાર્લ્સ 17 રન બનાવીને આઉટ થયો. સ્ટેન્ડ-ઇન કેપ્ટન બ્રેન્ડન કિંગે 47 રનની મહત્વપૂર્ણ ઇનિંગ્સ રમી, પરંતુ તેને રાશિદ ખાને આઉટ કર્યો. છેલ્લી ત્રણ ઓવરમાં વેસ્ટ ઇન્ડીઝે 40 રન ઉમેરીને સ્કોર 151 સુધી પહોંચાડ્યો. મેથ્યુ ફોર્ડેએ 11 બોલમાં 27 રન બનાવ્યા, જ્યારે શમર સ્પ્રિંગર 14 રન બનાવીને અણનમ રહ્યો.