તમારા મનપસંદ મેસેજિંગ પ્લેટફોર્મ WhatsApp પર ટૂંક સમયમાં મોટો ફેરફાર જોવા મળી શકે છે. અત્યાર સુધી જાહેરાતો વિનાનો અને એકદમ ક્લીન અનુભવ આપતું WhatsApp હવે કદાચ મફત નહીં રહે. તાજેતરના અહેવાલો મુજબ, Meta માલિકીની આ એપમાં ‘Ads-Free Subscription Model’ લાવવાની તૈયારીઓ ચાલી રહી છે.

શું છે આ નવો ફેરફાર?

WhatsApp ના લેટેસ્ટ બીટા વર્ઝન (2.26.3.9) ના કોડમાં એવા સંકેતો મળ્યા છે કે કંપની યુઝર્સને બે વિકલ્પ આપી શકે છે: કાં તો જાહેરાતો જુઓ અથવા પૈસા ચૂકવીને જાહેરાત-મુક્ત સેવાનો આનંદ લો. આ જાહેરાતો મુખ્યત્વે Status અને Channels ના વિભાગમાં જોવા મળી શકે છે. જો તમે તમારા સ્ટેટસ ચેક કરતી વખતે વચ્ચે આવતી જાહેરાતોથી બચવા માંગતા હોવ, તો તમારે તેનું સબ્સ્ક્રિપ્શન લેવું પડશે.

શા માટે આ નિર્ણય લેવાઈ રહ્યો છે?

WhatsApp તેના લોન્ચિંગ સમયથી જ તેની સાદગી અને પ્રાઈવસી માટે જાણીતું છે. જોકે, Meta હવે આ પ્લેટફોર્મ પરથી કમાણી (Monetization) કરવાના રસ્તાઓ શોધી રહ્યું છે. ગયા વર્ષે પણ કંપનીએ સ્ટેટસ સેક્શનમાં જાહેરાતોનું ટેસ્ટિંગ કર્યું હતું, જેનો યુઝર્સ દ્વારા વિરોધ કરવામાં આવ્યો હતો. તેમ છતાં, કંપની હવે પ્રીમિયમ મોડેલ તરફ આગળ વધી રહી હોય તેવું લાગે છે.

WhatsApp નો ઇતિહાસ અને સફર

શરૂઆત: 2009 માં જાન કુમ અને બ્રાયન એક્ટન દ્વારા.

વિકાસ: 2010 માં મેસેજિંગ અને 2011 માં ગ્રુપ ચેટ ફીચર આવ્યું.

મોટું વેચાણ: 2014 માં ફેસબુક (હવે Meta) એ તેને 19 બિલિયન ડોલરમાં ખરીદ્યું.

યુઝર્સ પર શું અસર પડશે?

હાલમાં આ મોડેલ માત્ર ટેસ્ટિંગના તબક્કામાં છે અને કંપનીએ કોઈ સત્તાવાર તારીખ જાહેર કરી નથી. જો આ અમલમાં આવશે, તો સામાન્ય યુઝર્સ માટે WhatsApp વાપરવું કદાચ પહેલા જેવું ‘ફ્રી’ નહીં રહે. જે યુઝર્સ પ્રીમિયમ પેકેજ નહીં લે, તેમને કદાચ એપના અમુક હિસ્સામાં જાહેરાતોનો સામનો કરવો પડશે. જોકે, નિષ્ણાતોનું માનવું છે કે કંપની ચેટ વિન્ડો (વ્યક્તિગત મેસેજ) માં જાહેરાતો નહીં આપે, જેથી યુઝર એક્સપિરિયન્સ બહુ ખરાબ ન થાય. હવે જોવાનું એ રહેશે કે WhatsApp પ્રેમીઓ આ પેઈડ મોડેલને કેવી રીતે સ્વીકારે છે.

આ પણ વાંચોઃ Dwarka : ઇલેક્ટ્રિક ટાવર પાસેની કેબિનમાં ભીષણ આગથી ફફડાટ, કોઇ જાનહાનિ નહીં