શું તમે વિશ્વાસ કરી શકો છો કે કોઈ બોલરે એક બોલ ફેંકવા માટે 100 કિમીની દોડ લગાવી! તમે કહેશો કે આ વળી કેવી વાત થઈ! તમારી વાત બિલકુલ સાચી છે. આના પર એકવાર માટે વિશ્વાસ કરવો મુશ્કેલ છે, પરંતુ આ વાત એકદમ 100 ટકા સાચી છે. ઇંગ્લેન્ડમાં એક સ્થાનિક ક્રિકેટર સેમ બોડોઆનોએ આ હેરાન કરી દેનારી સિદ્ધિ હાંસલ કરીને નવો રેકોર્ડ બનાવી દીધો. તેણે માત્ર એક બોલ ફેંકવા માટે 100 કિમીની દોડ લગાવી. સેમ બોડોઆનોએ પોતાનો રન-અપ લોર્ડ્સથી શરૂ કર્યો અને સરેના વોકિંગ સ્થિત વેલી એન્ડ ક્રિકેટ ક્લબમાં બોલ ફેંક્યો. આ સાથે જ તેણે ગિનિઝ બુક ઑફ વર્લ્ડ રેકોર્ડ્સમાં પોતાનું નામ નોંધાવવા માટે પણ અરજી કરી છે. 100 કિમીના રન-અપમાં લાગ્યો આટલો સમય સેમ બોડોઆનોને આ રન-અપમાં 14 કલાકનો સમય લાગ્યો. બોડોઆનોનો આ પ્રયાસ ચેરિટી માટે ફંડ એકઠું કરવાના હેતુથી હતો. તેણે કેન્સર ચેરિટી ‘ધ રૂથ સ્ટ્રોસ ફાઉન્ડેશન’ માટે કુલ £6,000 (ભારતીય રૂપિયામાં અંદાજે 6,58,968) એકઠા કર્યા, જેની સ્થાપના ઇંગ્લેન્ડના પૂર્વ કેપ્ટન એન્ડ્ર્યુ સ્ટ્રોસે પોતાની સ્વર્ગસ્થ પત્ની રૂથની યાદમાં કરી હતી. રેકોર્ડને સત્તાવાર બનાવવા માટે તેણે ક્રિકેટનો વ્હાઇટ ડ્રેસ પહેરીને હાથમાં બોલ લઈને દોડવાનું હતું. સાથે જ તે ઐતિહાસિક બોલ ફેંક્યા પછી એક મેચ પણ રમવાની હતી. બોડોઆનોના આ પ્રયાસે ટોમ ડનના 24 કિલોમીટરના રન-અપને પાછળ છોડી દીધો છે, જે વર્ષ 2024માં બનાવ્યો હતો. અનુભવ કેવો રહ્યો તે વ્યક્ત કર્યો ‘ધ ટેલિગ્રાફ’માં ટાંકવામાં આવેલા નિવેદનો અનુસાર, પોતાની આ સિદ્ધિ પછી બોડોઆનોએ કહ્યું, ‘આખો સમય બોલને પકડી રાખવો ખૂબ જ હેરાન કરનારો હતો, પરંતુ મને આશ્ચર્ય થયું કે વ્હાઇટ કપડાં પહેરવા તેટલા અસહજ નહોતું જેટલું મેં વિચાર્યું હતું. મને લાગ્યું હતું કે ત્વચા છોલાઈ જવું ખૂબ ખરાબ હશે. આ ખૂબ કઠિન હતું, મારા પગ સંપૂર્ણપણે થાકીને ભાંગી પડ્યા હતા, પરંતુ હું આ પૂરું કરવામાં સફળ રહ્યો અને રસ્તામાં મને ખૂબ સારું સમર્થન મળ્યું.’ તેણે આગળ કહ્યું, ‘હું ખૂબ થાકેલો છું. મારી ઊંઘ પૂરી નથી થઈ, પરંતુ આ બધું એક અદ્ભુત હેતુ માટે હતું. હું સોશિયલ મીડિયા પર અનેક પડકારો લેતો રહું છું. એવી કોઈ પણ વસ્તુ જ્યાં હું મારા જુસ્સાને એકસાથે જોડી શકું. હું મારા જીવનના મોટા ભાગમાં ક્રિકેટ રમતો રહ્યો છું. તેથી અલ્ટ્રા-મેરેથોન જેવી વસ્તુઓને ક્રિકેટ સાથે જોડવી એવું કંઈક હતું જેના માટે હું ખૂબ આતુર હતો.’ ગિનિઝ બુક ઑફ વર્લ્ડ રેકોર્ડ્સના નિયમો અનુસાર, બોડોઆનોનો પ્રયાસ હવે એક ઔપચારિક ચકાસણી પ્રક્રિયામાંથી પસાર થશે. તે પછી રેકોર્ડને સત્તાવાર રીતે મંજૂરી આપવામાં આવશે.