લદ્દાખના એક્ટિવિસ્ટ સોનમ વાંગચુકની ભૂખ હડતાળનો આજે એટલે કે 14 જુલાઈના રોજ 17મો દિવસ છે. NEET પેપર લીક મુદ્દે કોકરોચ જનતા પાર્ટી (CJP) જંતર-મંતર પર 20 જૂનથી પ્રદર્શન કરી રહી છે. આમાં વાંગચુક પણ અનશન પર બેઠા છે. વાંગચુકની હડતાળને લઈને બોલિવૂડના લોકો તેમના સમર્થનમાં આવ્યા છે. ‘3 ઈડિયટ્સ’માં ચતુર રામલિંગમનું પાત્ર ભજવી ચૂકેલા ઓમી વૈદ્યે કહ્યું, ‘હું નથી ઈચ્છતો કે આ વ્યક્તિ મરી જાય. મારા માટે તે એક પ્રેરણાદાયક વ્યક્તિ છે. હું ઈચ્છું છું કે તે સુરક્ષિત રહે અને જીવતા રહે.’ એક્ટ્રેસ ઝીનત અમાને એક પોસ્ટમાં લખ્યું કે હું વાંગચુકની માંગણીઓનું સન્માન કરું છું. મારી ભારત સરકારને અપીલ છે કે આ મુદ્દે તેમની સાથે વાતચીત કરે. આ ભારત ભવિષ્ય સાથે જોડાયેલું છે. ઓમીએ વીડિયો જાહેર કરીને લોકોને ધ્યાન આપવા અપીલ કરી આજે હું તમારી સાથે એક મહત્વપૂર્ણ વાત કરવા માંગુ છું. હું આવા વીડિયો વારંવાર બનાવતો નથી, તેથી મારી વાત ધ્યાનથી સાંભળો. શું તમને ખબર છે કે 3 ઇડિયટ્સમાં આમિર ખાનનું પાત્ર ફુનસુખ વાંગડુ વાસ્તવિક જીવનના લદ્દાખના એન્જિનિયર, ઇનોવેટર, શિક્ષક અને સમાજ સુધારક સોનમ વાંગચુકથી પ્રેરિત હતું? ઓમીએ આગળ કહ્યું, તેમને મળી ચૂક્યો છું. તેઓ ખૂબ જ રસપ્રદ અને સાદગી પસંદ વ્યક્તિ છે. તેમણે પોતાના જીવનમાં ઘણા ઉત્તમ કાર્યો કર્યા છે. તેથી હું તમને કહીશ કે તેમના વિશે જાણો અને જુઓ કે આ સમયે તેઓ શું કરી રહ્યા છે. હાલમાં સોનમ વાંગચુક લાંબા સમયથી ભૂખ હડતાળ પર છે. ઘણા અઠવાડિયા વીતી ચૂક્યા છે અને તેમનું બ્લડ સુગર ઘણું ઓછું થઈ ગયું છે. મને ખબર નથી કે તમે આ વિશે સાંભળ્યું છે કે નહીં, અથવા મીડિયા આના પર કેટલા સમાચાર બતાવી રહ્યું છે, પરંતુ આ ખૂબ જ ગંભીર મામલો છે. તેઓ ભૂખ હડતાળ શા માટે કરી રહ્યા છે? કારણ કે તેમને ભારતની શિક્ષણ વ્યવસ્થા, લદ્દાખ સાથે જોડાયેલા કેટલાક મુદ્દાઓ અને પર્યાવરણની ચિંતા છે. તમે તેમની વાત સાથે સહમત હો કે ન હો, પરંતુ હું એટલું ચોક્કસ કહેવા માંગુ છું કે હું નથી ઈચ્છતો કે આ વ્યક્તિ મૃત્યુ પામે. મારા માટે તેઓ એક પ્રેરણાદાયક વ્યક્તિ છે અને હું ઈચ્છું છું કે તેઓ સુરક્ષિત રહે અને જીવંત રહે.
એક્ટરે લોકોને અપીલ કરતા કહ્યું, આપણે બધા સામાન્ય લોકો છીએ અને આપણા રોજિંદા જીવનમાં ખૂબ વ્યસ્ત રહીએ છીએ. ઘણીવાર આપણી પાસે આવા મુદ્દાઓ પર ધ્યાન આપવાનો સમય નથી હોતો, પરંતુ જો તમે થોડો સમય કાઢીને આ મામલાને સમજશો, તો બની શકે કે તમને પણ તેમની કેટલીક વાતો સાચી લાગે. કદાચ તમે, તમારા પરિવાર કે તમારા મિત્રોએ પણ આવી સમસ્યાઓનો સામનો કર્યો હોય. એટલે હું તમને બસ એટલું કહેવા માંગુ છું કે થોડી મિનિટો રોકાઓ. તમારા કામ કે ઘરની જવાબદારીઓમાંથી થોડો સમય કાઢો અને જુઓ કે આ સમયે શું થઈ રહ્યું છે. મને લાગે છે કે આ જાણવું ખૂબ જ જરૂરી છે. કારણ કે હું નથી ઈચ્છતો કે ફુન્સુખ વાંગડુ મરી જાય, અને મને લાગે છે કે તમે પણ આવું નહીં ઈચ્છો. જનપ્રતિનિધિઓ સુધી વાત પહોંચાડવા જણાવ્યું ઓમીએ આગળ કહ્યું કે ચાલો, આપણે બધા મળીને જે કરી શકીએ તે કરીએ. આ મેસેજને સોશિયલ મીડિયા પર શેર કરો, રીપોસ્ટ કરો અને ઇન્સ્ટાગ્રામ પર પણ લોકો સુધી પહોંચાડો. જો તમને ખરેખર આ મુદ્દાની ચિંતા હોય, તો તમારા સ્થાનિક જનપ્રતિનિધિઓ અથવા સરકારના જવાબદાર અધિકારીઓ સુધી પણ તમારી વાત પહોંચાડો અને તેમની પાસેથી આ મામલે કાર્યવાહીની માંગ કરો. સોનમ વાંગચુક અને તેમની સાથે જોડાયેલા આ મુદ્દાઓ ખૂબ જ મહત્વપૂર્ણ છે. મને લાગે છે કે આના પર ધ્યાન આપવું જોઈએ અને આશા છે કે તમે પણ આવું જ વિચારશો. મેં જે આ મેસેજ તમને આપ્યો છે, તેને દિલથી સ્વીકાર કરો. ખૂબ ખૂબ આભાર. ઝીનત અમાનની વાંગચુકના સમર્થનમાં અપીલ એક્ટ્રેસ ઝીનત અમાનએ ઇન્સ્ટાગ્રામ પર સોનમ વાંગચુક વિશે લખ્યું, ‘મેં એક ન્યૂઝ આર્ટિકલમાં વાંચ્યું કે વાંગચુકના સ્નાયુઓ નબળા પડવા લાગ્યા છે અને તે અતિશય પીડામાં છે. જ્યારે તેને ઉપવાસ સમાપ્ત કરવા માટે કહેવામાં આવ્યું, ત્યારે તેણે જવાબ આપ્યો, ‘મને મારા ઉપવાસ સમાપ્ત કરવાનું ન કહો. સરકારને પૂછો કે તે વાતચીત પણ કેમ નથી કરી રહી.’ એક્ટ્રેસે આગળ લખ્યું, ‘તમામ રીતે, વાંગચુક એક પ્રતિભાશાળી અને સમર્પિત વ્યક્તિ છે, જેમને સમાજ પર તેમની અસર માટે વિશ્વભરમાં ઘણા જાણીતા પુરસ્કારોથી સન્માનિત કરવામાં આવ્યા છે. વાંગચુકની ઈચ્છાનું સન્માન કરતા, હું ભારત સરકારને આ મુદ્દે વાતચીત શરૂ કરવા અપીલ કરું છું, જે સમગ્ર ભારતના ભવિષ્ય સાથે જોડાયેલો છે. આપણે એવો સમાજ ન બનવો જોઈએ, જે ચૂપચાપ બેસીને પોતાના શ્રેષ્ઠ દિમાગમાંથી એકને બલિદાન થતા જોતો રહે.’ ઉપરાંત, સોનમ વાંગચુકના સમર્થનમાં એક્ટર અભય દેઓલ અને એક્ટ્રેસ શ્રેયા ધનવંતરી પણ સામે આવ્યા છે. અભય દેઓલે સોશિયલ મીડિયા પર તૂટેલા હૃદય (બ્રોકન હાર્ટ)ની ઇમોજી સાથે સોનમ વાંગચુકની તસવીર શેર કરી. શ્રેયા ધનવંતરીએ પોતાની પોસ્ટમાં લખ્યું, ‘મને આ કહેતા સારું નથી લાગી રહ્યું, પરંતુ કૃપા કરીને તમારા ઉપવાસ સમાપ્ત કરવા પર વિચાર કરો. સોનમ વાંગચુક એક એવી સરકાર સામે શાંતિપૂર્ણ રીતે વિરોધ નોંધાવી રહ્યા છે, જેણે બહુ ઓછી કે લગભગ કોઈ નૈતિક સંવેદનશીલતા દર્શાવી નથી. સર, એક ઉદાસીન વ્યવસ્થા સાથે દલીલ કરવી મુશ્કેલ છે.’ પ્રકાશ રાજ જંતર-મંતર પહોંચ્યા હતા આ પહેલા એક્ટર પ્રકાશ રાજ જંતર-મંતર પહોંચીને સોનમ વાંગચુકના આંદોલનના સમર્થનમાં જોડાયા હતા. 11 જુલાઈ 2026ના રોજ તેઓ સોનમ વાંગચુકની ભૂખ હડતાળના 14મા દિવસે પ્રદર્શનમાં જોડાયા હતા. એક્ટરે ‘કોકરોચ જનતા પાર્ટી’ (CJP)ના મંચ પરથી વિદ્યાર્થીઓને સંબોધિત કરતા કહ્યું હતું કે, ‘તેઓ કહે છે કે આ સોશિયલ મીડિયાથી ચાલતું આંદોલન છે. અરે, તમે પણ વોટ્સએપ યુનિવર્સિટી અને સોશિયલ મીડિયા દ્વારા જ (સત્તામાં) આવ્યા છો. તમારી પાસે એક એવું હથિયાર હતું, જે ત્યારે અમારી પાસે નહોતું, પરંતુ હવે તે હથિયાર અમારી પાસે પણ છે.’ 28 જૂનથી ભૂખ હડતાળ પર બેઠા છે સોનમ વાંગચુક દિલ્હીના જંતર-મંતર પર 28 જૂન 2026 થી ભૂખ હડતાળ પર બેઠા છે. તેઓ દેશની શિક્ષણ વ્યવસ્થામાં સુધારા, પરીક્ષાઓમાં કથિત ગેરરીતિઓ (જેમ કે NEET પરીક્ષા વિવાદ) અને પેપર લીકના કેસો સામે ‘કોકરોચ જનતા પાર્ટી’ (CJP) ના આંદોલનને સમર્થન આપી રહ્યા છે. પ્રદર્શનકારીઓ કેન્દ્રીય શિક્ષણ મંત્રી ધર્મેન્દ્ર પ્રધાનના રાજીનામા અને પરીક્ષા પ્રણાલીમાં સંપૂર્ણ જવાબદારી નક્કી કરવાની માંગ કરી રહ્યા છે. તેમણે દેશના નાગરિકોને આ મુદ્દે એકજૂથ થવા અને આગામી 20 જુલાઈના રોજ પ્રસ્તાવિત ‘સંસદ માર્ચ’માં જોડાવા અપીલ કરી છે.