1. નાના મેદાન પર પણ નિયંત્રણ રાખ્યું હેનરીએ કહ્યું, “ઈડન ગાર્ડન્સમાં બાઉન્ડરી નાની છે અને સાઉથ આફ્રિકા પાસે મોટા હિટર્સ હતા. આવી સ્થિતિમાં, તેમને 169ના સ્કોર પર રોકવા એ અમારા માટે એક મોટી સિદ્ધિ હતી. બોલરોએ જે રીતે રમતને નિયંત્રિત કરી, તેણે મેચનો મોમેન્ટમ અમારી તરફ ખસેડ્યો.”

2. ફિન એલનનો જાદુઈ શો બોલિંગ પછી બેટિંગમાં ફિન એલનની સદીએ સાઉથ આફ્રિકાને મેચમાંથી બહાર કરી દીધું. હેનરીએ એલનની ઇનિંગ્સની પ્રશંસા કરતા કહ્યું, “ફિને જે કર્યું તે જાદુઈ હતું. તેમની બેટિંગે અમારું કામ વધુ સરળ બનાવી દીધું.”

3. ફાઇનલની ટિકિટ ખૂબ જ ખાસ ન્યૂઝીલેન્ડે T20 વર્લ્ડ કપમાં બીજી વખત જ ફાઇનલમાં સ્થાન બનાવ્યું. હેનરીએ કહ્યું, “બીજા વર્લ્ડ કપ ફાઇનલમાં પહોંચવું અમારા માટે ખૂબ જ ખાસ અનુભવ છે. હાલ ટીમ આ ક્ષણને માણી રહી છે. અમે થોડો આરામ કર્યા પછી ફાઇનલની તૈયારી શરૂ કરીશું.”

ટર્નિંગ પોઈન્ટ: હેનરીની છેલ્લી ઓવર 33 બોલમાં 100 રન બનાવનાર ફિન એલન ભલે પ્લેયર ઓફ ધ મેચ રહ્યો હોય, પરંતુ ન્યૂઝીલેન્ડનું કામ બોલરોએ વધુ સરળ બનાવ્યું. પાવરપ્લેની બીજી જ ઓવરમાં કોલ મેકોન્ચીએ 2 વિકેટ ઝડપી લીધી, તેણે ક્વિન્ટન ડી કોક અને રાયન રિકેલ્ટનને પેવેલિયન મોકલ્યા. 20મી ઓવરમાં ફરી મેટ હેનરીએ માત્ર 6 રન આપીને 2 વિકેટ લીધી અને સાઉથ આફ્રિકાને 170ના પાર જવા દીધું નહીં.

ગુરુવારે કોલકાતામાં પહેલા બેટિંગ કરતા સાઉથ આફ્રિકાએ 8 વિકેટ ગુમાવીને 169 રન બનાવ્યા. માર્કો યાન્સેને ફિફ્ટી ફટકારી. ન્યૂઝીલેન્ડે 12.5 ઓવરમાં 1 જ વિકેટના નુકસાન પર ટાર્ગેટ ચેઝ કરી લીધો. એલને વર્લ્ડ કપ ઇતિહાસની સૌથી ઝડપી સેન્ચુરી ફટકારી.

મેટ હેનરી બોલ્યો- બોલરોએ સાઉથ આફ્રિકા પર દબાણ બનાવ્યું.

હેનરી માટે આખું અઠવાડિયું ઉતાર-ચઢાવ ભર્યું રહ્યું 27 ફેબ્રુઆરીએ ઇંગ્લેન્ડ સામેની છેલ્લી સુપર-8 મેચ પછી મેટ હેનરી ન્યૂઝીલેન્ડ પાછો ફર્યો. તે તેના બીજા બાળકના જન્મના કારણે ઘરે પરત ફર્યો હતો. સેમિફાઇનલ માટે તેનું પરત ફરવું મુશ્કેલ લાગી રહ્યું હતું, પરંતુ ઘરે પરિસ્થિતિ સંભાળ્યા પછી તે મેચ પહેલા જ ભારત આવી ગયો. તે સેમિફાઇનલ રમ્યો અને ટીમને જીત પણ અપાવી.

દિવ્ય ભાસ્કરને Google પર મનપસંદ સોર્સ બનાવો