ભારતીય ક્રિકેટ કંટ્રોલ બોર્ડ (BCCI) એ T20 વર્લ્ડકપ 2026 જીતવા બદલ ટીમ ઈન્ડિયા માટે 131 કરોડ રૂપિયાના ઈનામની જાહેરાત કરી છે. ભારતે રવિવારે ફાઇનલમાં ન્યુઝીલેન્ડને હરાવીને આ ખિતાબ પોતાના નામે કર્યો.

અમદાવાદના નરેન્દ્ર મોદી સ્ટેડિયમમાં રમાયેલી ફાઇનલ મેચમાં ભારતે શાનદાર પ્રદર્શન કરતા ન્યુઝીલેન્ડને હરાવી ટ્રોફી જીતી લીધી. આ સાથે જ ટીમ ઈન્ડિયાએ પોતાનો ખિતાબ જાળવી રાખ્યો અને T20 વર્લ્ડકપના ઇતિહાસમાં સતત બે વાર ટ્રોફી જીતનારી પ્રથમ ટીમ બની ગઈ.

BCCI એ ખેલાડીઓ, સપોર્ટ સ્ટાફ અને સિલેક્ટર્સને આ ઐતિહાસિક સિદ્ધિ બદલ અભિનંદન પાઠવ્યા છે. બોર્ડે આશા વ્યક્ત કરી કે ટીમ ભવિષ્યમાં પણ આ જ રીતે શાનદાર પ્રદર્શન કરીને દેશનું નામ રોશન કરતી રહેશે.

ભારતીય ટીમને 27.5 કરોડ પ્રાઇઝ મની મળી

રિપોર્ટ અનુસાર, T20 વર્લ્ડકપ 2026 જીત્યા બાદ ભારતીય ટીમને 3 મિલિયન ડોલર (લગભગ 27.5 કરોડ રૂપિયા)ની ઇનામી રકમ મળી. જ્યારે, રનર-અપ ન્યુઝીલેન્ડને 1.6 મિલિયન ડોલર (લગભગ 14.7 કરોડ રૂપિયા) આપવામાં આવ્યા. જોકે, આ વખતે ICCએ પ્રાઇઝ મનીની સત્તાવાર જાહેરાત કરી ન હતી, જ્યારે સામાન્ય રીતે દરેક ટુર્નામેન્ટમાં તેની માહિતી અગાઉથી જ આપી દેવામાં આવે છે.

ભારત 3 T20 વર્લ્ડકપ જીતનારો પ્રથમ દેશ

ભારતીય ટીમ 2024 પછી 2026માં પણ ચેમ્પિયન બની અને T20 વર્લ્ડકપનો ખિતાબ ડિફેન્ડ કરનારી પ્રથમ ટીમ બની ગઈ. આ સાથે જ ભારત ત્રણ T20 વર્લ્ડકપ (2007, 2024 અને 2026) જીતનારી દુનિયાની પ્રથમ ટીમ પણ બની.

અમદાવાદમાં રમાયેલી ફાઇનલમાં જીત સાથે ભારતે પ્રથમ વખત પોતાના ઘરઆંગણે T20 વર્લ્ડકપ ટ્રોફી પણ જીતી. આ પહેલા ટીમે 2007માં સાઉથ આફ્રિકા અને 2024માં વેસ્ટ ઇન્ડીઝમાં ખિતાબ જીત્યો હતો. હવે ભારતના નામે ત્રણ T20 વર્લ્ડકપ ટ્રોફી થઈ ગઈ છે, જ્યારે વેસ્ટ ઇન્ડીઝ અને ઇંગ્લેન્ડ બે-બે વાર જ આ ખિતાબ જીતી શક્યા છે.

સૂર્યાનું 500 વર્ષ જૂની અડાલજની વાવમાં ફોટોશૂટ

T20 વર્લ્ડકપ જીત્યા પછી ટીમ ઈન્ડિયાના ખેલાડીઓની ઉજવણીના અલગ-અલગ અંદાજ જોવા મળ્યા. કેપ્ટન સૂર્યકુમાર યાદવ ગાંધીનગર સ્થિત 500 વર્ષ જૂની ઐતિહાસિક અડાલજની વાવમાં ટ્રોફી સાથે ફોટોશૂટ કરતા જોવા મળ્યા.

જસપ્રીત બુમરાહ પ્લેયર ઑફ ધ મેચ, સંજુ સેમસન પ્લેયર ઑફ ધ સિરીઝ

ફાઈનલ મેચમાં 15 રન આપીને 4 વિકેટ લેનાર જસપ્રીત બુમરાહ પ્લેયર ઑફ ધ મેચ રહ્યો. બીજી તરફ, 5 મેચમાં 3 ફિફ્ટીની મદદથી 321 રન બનાવનાર સંજુ સેમસનને પ્લેયર ઑફ ધ સિરીઝ પસંદ કર્યો.

—————————————

સ્પોર્ટ્સના આ સમાચાર પણ વાંચો…

ભારતને ટી-20 વર્લ્ડ કપ જીતાડનારા હીરોઝ:સેમસને સતત 3 ફિફ્ટી ફટકારી, બુમરાહ ટુર્નામેન્ટનો ટોપ વિકેટ ટેકર બન્યો

ભારતે ટી-20 વર્લ્ડ કપ જીતી લીધો છે. ટીમે રવિવારે રાત્રે ન્યુઝીલેન્ડને 96 રનથી હરાવ્યું. જોકે, આ ટ્રોફી માટે તમામ ખેલાડીઓએ યોગદાન આપ્યું, પરંતુ કેટલાક ખેલાડીઓ એવા રહ્યા જેમણે મુશ્કેલ પરિસ્થિતિઓમાં પ્રદર્શન કરીને પોતાને સાબિત કર્યા. વાંચો સંપૂર્ણ સમાચાર

દિવ્ય ભાસ્કરને Google પર મનપસંદ સોર્સ બનાવો