પાકિસ્તાન ક્રિકેટ બોર્ડ (PCB) ઝિમ્બાબ્વેના ફાસ્ટ બોલર બ્લેસિંગ મુઝરબાની પર કરાર તોડવા બદલ કેસ કરવાની તૈયારી કરી રહ્યું છે. શનિવારે ન્યૂઝ એજન્સી PTIએ પાકિસ્તાની બોર્ડના સૂત્રોને ટાંકીને લખ્યું- PCBના કાયદાકીય વિભાગને ઝિમ્બાબ્વેના આ ફાસ્ટ બોલર વિરુદ્ધ કેસ દાખલ કરવાના નિર્દેશ આપવામાં આવ્યા છે. ઝિમ્બાબ્વેના ફાસ્ટ બોલર મુઝરબાનીએ પાકિસ્તાન સુપર લીગ (PSL)ની ફ્રેન્ચાઇઝી ઇસ્લામાબાદ યુનાઇટેડનો કરાર છોડીને ઇન્ડિયન પ્રીમિયર લીગ (IPL)ની ટીમ કોલકાતા નાઇટ રાઇડર્સ સાથે કરાર કર્યો છે. એક દિવસ પહેલા શુક્રવારે KKRએ બાંગ્લાદેશી ફાસ્ટ બોલર મુસ્તફિઝુર રહેમાનના સ્થાને મુઝરબાનીને પોતાની સાથે જોડવાની જાહેરાત કરી હતી. જેને BCCIના નિર્દેશ બાદ ફ્રેન્ચાઇઝીએ રિલીઝ કર્યો હતો. KKRએ આ પોસ્ટથી મુઝરબાનીને પોતાની સાથે જોડવાની જાહેરાત કરી… PCBના સૂત્રોએ જણાવ્યું- ગયા વર્ષથી ભારત અને પાકિસ્તાનની ક્રિકેટ લીગ એક જ સમયે યોજાઈ રહી છે. આવી સ્થિતિમાં, અમે ખેલાડીઓને મેસેજ આપવા માગીએ છીએ કે જો તેઓ PSL રમવાનું વચન આપે છે, તો તેઓ કરાર તોડીને IPLની કોઈપણ ફ્રેન્ચાઇઝી સાથે નવો કરાર કરી શકશે નહીં. ઇસ્લામાબાદ યુનાઇટેડે મુઝરબાનીને વેસ્ટ ઇન્ડીઝના ફાસ્ટ બોલર શમાર જોસેફના સ્થાને ટીમમાં સામેલ કર્યો હતો. મુઝરબાની T20 વર્લ્ડ કપમાં ઝિમ્બાબ્વેના ટોપ વિકેટ ટેકર રહ્યો હતો. તેણે 6 મેચમાં 13 વિકેટ ઝડપી હતી. કોર્બિન બોશ પર એક વર્ષનો પ્રતિબંધ લગાવ્યો હતો
મુઝરબાની પહેલા ખેલાડી નથી, જેમની વિરુદ્ધ કરાર તોડવા બદલ કાનૂની કાર્યવાહી થઈ રહી છે. ગયા વર્ષે સાઉથ આફ્રિકાના કોર્બિન બૉશે પહેલા પાકિસ્તાની લીગમાં પેશાવર ઝાલ્મી સાથે કરાર કર્યો હતો. પછી બોશ એક ઈજાગ્રસ્ત ખેલાડીની જગ્યાએ મુંબઈ ઈન્ડિયન્સ સાથે જોડાયો હતો. તેને એક સીઝન માટે PSLમાંથી પ્રતિબંધિત કરવામાં આવ્યા હતા. બૉશે પાકિસ્તાની બોર્ડ પાસેથી માફી માગી હતી અને બોર્ડે તેની પાસેથી વળતરની પણ માગ કરી હતી. મેન્ડિસ અને ઓવેને પણ PSL છોડ્યું હતું
આ જ રીતે શ્રીલંકાના કુસલ મેન્ડિસ અને ઓસ્ટ્રેલિયાના મિચેલ ઓવેને પણ પેશાવર ઝાલ્મી માટે કેટલીક મેચ રમી હતી. ગયા વર્ષે મે મહિનામાં ભારત-પાકિસ્તાન તણાવને કારણે લીગ કેટલાક દિવસો માટે સ્થગિત થઈ હતી, ત્યારે બંને ખેલાડીઓ બાદમાં IPL સાથે જોડાઈ ગયા હતા.