મોરોક્કોને AFCON 2025નું ચેમ્પિયન જાહેર કરવામાં આવ્યું છે. કોન્ફેડરેશન ઓફ આફ્રિકન ફૂટબોલ (CAF)એ સેનેગલની 1-0ની જીત રદ કરી દીધી છે. આ નિર્ણય 18 જાન્યુઆરીએ રમાયેલી ફાઇનલ મેચ દરમિયાન થયેલા વિવાદ બાદ લેવામાં આવ્યો છે.

હકીકતમાં, મેચના અંતિમ સમયે સેનેગલના ખેલાડીઓએ રેફરીના એક નિર્ણયના વિરોધમાં મેદાન છોડી દીધું હતું, જેને નિયમોનું ઉલ્લંઘન માનવામાં આવ્યું છે.

શું હતો વિવાદ?

18 જાન્યુઆરીએ રમાયેલી ફાઇનલ મેચમાં નિર્ધારિત સમય સુધી સ્કોર 0-0ની બરાબરી પર હતો. સ્ટોપેજ ટાઈમ (ઈન્જરી ટાઈમ)માં રેફરીએ યજમાન મોરોક્કોની તરફેણમાં એક પેનલ્ટી આપી. આ નિર્ણયથી સેનેગલના ખેલાડીઓ નારાજ થઈ ગયા અને વિરોધ સ્વરૂપે મેદાનમાંથી બહાર નીકળી ગયા. લગભગ 17 મિનિટ સુધી રમત અટકી રહી. બાદમાં ખેલાડીઓ પાછા ફર્યા, મોરોક્કોના બ્રાહિમ ડિયાઝ પેનલ્ટી પર ગોલ કરવામાં ચૂકી ગયા અને એક્સ્ટ્રા ટાઈમમાં સેનેગલના પાપે ગુયેએ ગોલ કરીને પોતાની ટીમને 1-0થી જીત અપાવી હતી.

ફાઇનલમાં વિવાદને કારણે 14 મિનિટ સુધી રમત અટકી રહી હતી.

નિયમોના આધારે ફેરવવામાં આવ્યો નિર્ણય

મોરોક્કો ફૂટબોલ ફેડરેશન (FRMF)એ મેચના પરિણામોને લઈને CAF ની અપીલ કમિટીમાં પડકાર ફેંક્યો હતો. CAFએ તેની તપાસમાં જાણવા મળ્યું કે સેનેગલે AFCON રેગ્યુલેશનના આર્ટિકલ 82નો ભંગ કર્યો છે. આ નિયમ મુજબ, જો કોઈ ટીમ રેફરીની મંજૂરી વિના મેચ પૂરી થાય તે પહેલાં મેદાન છોડે છે, તો તેને હારેલી માનવામાં આવે છે. આર્ટિકલ 84 હેઠળ આવી સ્થિતિમાં વિરોધી ટીમને 3-0 થી વિજેતા જાહેર કરવામાં આવે છે. આ જ આધારે સેનેગલને અયોગ્ય ઠેરવીને મોરોક્કોને 3-0 થી વિજેતા માની લેવામાં આવ્યું.

મોરોક્કો ફેડરેશને કહ્યું- આ માત્ર નિયમોની જીત

નિર્ણય આવ્યા પછી, મોરોક્કો ફૂટબોલ ફેડરેશને એક નિવેદન બહાર પાડીને કહ્યું કે તેમની અપીલ કોઈ ટીમની કામગીરીને પડકારવા માટે ન હતી, પરંતુ ટુર્નામેન્ટના નિયમો લાગુ કરવા માટે હતી. ફેડરેશને કહ્યું, ‘અમે નિયમોનું સન્માન કરવા અને આફ્રિકન સ્પર્ધાઓમાં સ્પષ્ટતા જાળવી રાખવા પ્રતિબદ્ધ છીએ. અમે આ ટુર્નામેન્ટમાં ભાગ લેનાર તમામ દેશોની પ્રશંસા કરીએ છીએ.’

સેનેગલ ફેડરેશન તરફથી હજુ કોઈ ટિપ્પણી નથી

સેનેગલ ફૂટબોલ ફેડરેશને હજુ સુધી કોઈ સત્તાવાર નિવેદન આપ્યું નથી. પરંતુ તેમની નેશનલ ટીમના X એકાઉન્ટ પર એક વીડિયો પોસ્ટ થયો. જેમાં ખેલાડીઓ બસ પરેડમાં ટ્રોફી સાથે ઉજવણી કરતા જોવા મળ્યા. સાથે ‘OK’ ઇમોજી હતું.

ફાઇનલમાં પાપગુએ (26 નંબરની લીલી જર્સીમાં) સેનેગલ તરફથી 94મી મિનિટે ગોલ કરીને ટીમને જીત અપાવી હતી.

આફ્રિકા કપમાં પહેલા પણ આવા વિવાદો થઈ ચૂક્યા છે

દિવ્ય ભાસ્કરને Google પર મનપસંદ સોર્સ બનાવો