ઇટાલીના ટેનિસ ખેલાડી જૈનિક સિનરે ATP માસ્ટર્સ 1000 સ્તર પર સતત સૌથી વધુ સેટ જીતવાના મામલે નોવાક જોકોવિચનો રેકોર્ડ તોડી નાખ્યો છે.

સિનરે મિયામી ઓપનના ત્રીજા રાઉન્ડમાં કોરેન્ટિન મૂટેને 6-1, 6-4 થી હરાવ્યો. આ મુકાબલો 1 કલાક 11 મિનિટ સુધી ચાલ્યો.

આ જીત સાથે સિનરના સતત જીતેલા સેટની સંખ્યા 26 થઈ ગઈ છે, જ્યારે જોકોવિચના નામે 24 સેટનો રેકોર્ડ હતો. જોકોવિચે આ સિદ્ધિ 2016માં ઇન્ડિયન વેલ્સ અને મિયામી વચ્ચે હાંસલ કરી હતી.

નવેમ્બરથી અજેય રહેવાનો સિલસિલો ચાલુ છે

સિનરની આ શાનદાર સફર ગયા વર્ષે નવેમ્બરમાં પેરિસ માસ્ટર્સથી શરૂ થઈ હતી. ત્યાં તેણે એક પણ સેટ ગુમાવ્યા વિના ખિતાબ પોતાના નામે કર્યો હતો.

આ પછી તેણે આ જ મહિને ઇન્ડિયન વેલ્સ ઓપનનો ખિતાબ પણ જીત્યો. મ્યુટેટ સામેની જીત સાથે જ સિનરે ATP માસ્ટર્સ 1000 લેવલ પર સતત 13 મેચ જીતવાનો રેકોર્ડ પણ બનાવી લીધો છે.

મેચ પછી સિનરે ATPની સત્તાવાર વેબસાઇટ પર જણાવ્યું હતું કે, ‘હું ખૂબ ખુશ છું. આ રમત અણધારી છે, તેથી અમે શક્ય તેટલું ધ્યાન કેન્દ્રિત કરવાનો પ્રયાસ કરીએ છીએ. હવે જોઈએ કે આગલા રાઉન્ડમાં શું થાય છે.’ તેમણે વધુમાં જણાવ્યું હતું કે તેઓ દરેક મેચ માટે તકનીકી રીતે સંપૂર્ણપણે તૈયાર રહેવાનો પ્રયાસ કરે છે.

સિનરે મિયામી ઓપનના ત્રીજા રાઉન્ડમાં કોરેન્ટિન મૂટેને 6-1, 6-4 થી હરાવ્યો.

આગળના રાઉન્ડમાં એલેક્સ મિશેલસન સામે થશે મુકાબલો

ચોથા રાઉન્ડમાં જેનિક સિનરનો સામનો અમેરિકાના એલેક્સ મિશેલસન સામે થશે. મિશેલસને પોતાના ત્રીજા રાઉન્ડના મુકાબલામાં એલેજાન્ડ્રો તાબિલોને 3-6, 6-3, 6-4 થી હરાવીને આગળ વધ્યો છે. સિનર જે ફોર્મમાં ચાલી રહ્યો છે, તેને ટુર્નામેન્ટનો પ્રબળ દાવેદાર માનવામાં આવી રહ્યો છે. મિયામી ઓપનમાં કાર્લોસ અલ્કારાઝ બહાર થયા પછી સિનર પાસે પોતાની રેન્કિંગ વધુ મજબૂત કરવાની સારી તક છે.

દિવ્ય ભાસ્કરને Google પર મનપસંદ સોર્સ બનાવો