વડોદરા જિલ્લાની શિનોર તાલુકા પંચાયતની શિનોર-1 બેઠક પર મોડી રાત્રે ચાલેલા હાઈ-વોલ્ટેજ ડ્રામા બાદ ભાજપના ઉમેદવારને બિનહરીફ જાહેર કરવામાં આવ્યા છે. રાજ્ય ચૂંટણી પંચના કડક નિયમોના પાલનને કારણે કોંગ્રેસના ઉમેદવાર રમેશ વસાવાનું ફોર્મ રદ થતા ભાજપના છાવણીમાં ખુશીની લહેર દોડી ગઈ છે.

ભાજપના ઉમેદવારને બિનહરીફ જાહેર

શિનોર-1 બેઠક પર ભાજપના પ્રમોદ પૂનમ વસાવા અને કોંગ્રેસના રમેશ બચુ વસાવા વચ્ચે સીધી ટક્કર હતી. જોકે, ભાજપના ઉમેદવાર દ્વારા ચૂંટણી અધિકારી સમક્ષ એક લેખિત રજૂઆત કરવામાં આવી હતી કે કોંગ્રેસના ઉમેદવાર રમેશ વસાવાના રહેણાંક સ્થળે શૌચાલયની સુવિધા નથી.

ચૂંટણી અધિકારીની તપાસ

કોંગ્રેસ ઉમેદવારે ફોર્મ સાથે શૌચાલય હોવાના દસ્તાવેજો રજૂ કર્યા હોવા છતાં, ચૂંટણી અધિકારી અને ટીડીઓ (TDO) મહેશ વિરાણી દ્વારા સત્યતા ચકાસવા માટે સ્થળ તપાસના આદેશ આપવામાં આવ્યા હતા. સ્થળ પર તપાસ કરતા ત્યાં શૌચાલય મળી આવ્યું નહોતું.

નિયમ શું કહે છે?

રાજ્ય ચૂંટણી આયોગના 2021ના પરિપત્ર મુજબ, સ્થાનિક સ્વરાજ્યની ચૂંટણી લડતા ઉમેદવારના રહેણાંક સ્થળે શૌચાલય હોવું અનિવાર્ય છે. જો શૌચાલય ન હોય, તો તે ઉમેદવાર ચૂંટણી લડવા માટે અયોગ્ય ગણાય છે. આ નિયમ હેઠળ ચૂંટણી અધિકારીએ કોંગ્રેસના ઉમેદવારનું ફોર્મ નામંજૂર કર્યું હતું.

આ પણ વાંચો:Surat: ગરમીથી રાહત મેળવવા તાપીમાં નહાવા પડેલા ડીંડોલીના યુવકનું ડૂબી જવાથી કરુણ મોત