ઇન્ટરનેશનલ ક્રિકેટ કાઉન્સિલ (ICC) એ વિમેન્સ T-20 વર્લ્ડ કપ માટે ઇનામી રકમની જાહેરાત કરી દીધી છે. ઇંગ્લેન્ડ અને વેલ્સમાં યોજાનારી આ ટુર્નામેન્ટની કુલ ઇનામી રકમ વધારીને 82 કરોડ રૂપિયા કરવામાં આવી છે, જે 2024ની સરખામણીમાં 10% વધુ છે. છેલ્લી વખત ઇનામી રકમ 7.95 મિલિયન ડોલર (લગભગ 74 કરોડ રૂપિયા) હતી. જૂન-જુલાઈમાં ઇંગ્લેન્ડમાં યોજાનારી આ ટુર્નામેન્ટમાં આ વખતે વધુ ટીમ અને વધુ મેચ જોવા મળશે. વિજેતાને મળશે 21.8 કરોડ રૂપિયા ટુર્નામેન્ટ જીતનારી ટીમને 21.8 કરોડ, રનર-અપને 10 કરોડ અને સેમિફાઇનલ હારનારી ટીમને 6.29 કરોડ રૂપિયા મળશે. જ્યારે દરેક ગ્રુપ મેચ જીતવા પર ટીમને 29 લાખ મળશે. 12 ટીમ વચ્ચે કુલ 46 મેચ રમાશે
આ વખતે ટુર્નામેન્ટનો વ્યાપ વધારવામાં આવ્યો છે. અત્યાર સુધી વિમેન્સ ટી-20 વર્લ્ડ કપમાં 10 ટીમો ભાગ લેતી હતી, પરંતુ આ વખતે 12 ટીમો રમશે. ટીમોની સંખ્યા વધવાથી મેચોની સંખ્યામાં પણ 50%નો વધારો થયો છે. ગ્રુપ સ્ટેજની મેચો 20થી વધીને 30 થઈ ગઈ છે. સમગ્ર ટુર્નામેન્ટમાં નોકઆઉટ સહિત કુલ 46 મેચ રમાશે. ઇંગ્લેન્ડની પરિસ્થિતિઓમાં મોટો પડકાર હશે
આગામી વર્લ્ડ કપ ઇંગ્લેન્ડની યજમાનીમાં જૂન-જુલાઈ વચ્ચે રમાવાનો છે. જૂન-જુલાઈમાં ઇંગ્લેન્ડનું હવામાન અને પિચ ફાસ્ટ બોલરોની સાથે સ્પિનરો માટે પણ મદદરૂપ હોય છે. ભારતીય ટીમ માટે આ ટુર્નામેન્ટ ખૂબ જ મહત્વપૂર્ણ રહેશે કારણ કે ટીમ ઇન્ડિયા અત્યાર સુધી એક પણ વાર મહિલા T-20 વર્લ્ડ કપનો ખિતાબ જીતી શકી નથી. 12 ટીમો હોવાથી મુકાબલો વધુ કઠિન થવાની અપેક્ષા છે. બ્રોડકાસ્ટિંગ અને રેવન્યૂ વધવાનો ફાયદો
મહિલા ક્રિકેટની વધતી લોકપ્રિયતાને કારણે ICCની આવકમાં પણ વધારો થયો છે. વુમન્સ ક્રિકેટના બ્રોડકાસ્ટિંગ રાઇટ્સની વેલ્યુ વધી છે અને સ્ટેડિયમમાં દર્શકોની સંખ્યામાં પણ વધારો થયો છે. આને ધ્યાનમાં રાખીને ICC સતત ટુર્નામેન્ટ્સને મોટા બનાવી રહ્યું છે. 12 ટીમોના આ ફોર્મેટથી નાના દેશોની મહિલા ક્રિકેટ ટીમોને પણ ગ્લોબલ પ્લેટફોર્મ પર પોતાની પ્રતિભા બતાવવાનો મોકો મળશે.