આગામી 26 એપ્રિલે યોજાનારી સ્થાનિક સ્વરાજ્યની ચૂંટણીને હવે આડે ગણતરીના કલાકો જ બાકી છે, ત્યારે સુરતનું વહીવટી અને પોલીસ તંત્ર એક્શન મોડમાં આવ્યું છે. આજે સુરત જિલ્લા કલેક્ટર કચેરી ખાતે કલેક્ટર, શહેર અને જિલ્લા પોલીસ વડા તેમજ મનપા કમિશનર દ્વારા એક સંયુક્ત પત્રકાર પરિષદ યોજવામાં આવી હતી, જેમાં ચૂંટણીલક્ષી આયોજન અને સુરક્ષા વ્યવસ્થાની વિગતો આપવામાં આવી હતી.

નિષ્પક્ષ અને પારદર્શક મતદાન પર ભાર

સુરત જિલ્લા કલેક્ટર અને મુખ્ય ચૂંટણી અધિકારી ડો. સૌરભ પારઘીએ જણાવ્યું હતું કે, ચૂંટણી પ્રક્રિયા સંપૂર્ણપણે નિષ્પક્ષ અને પારદર્શિતા સાથે યોજાય તે માટે તમામ તૈયારીઓ પૂર્ણ કરી લેવામાં આવી છે. મતદાન મથકો પર જરૂરી સુવિધાઓ અને EVMના વહન માટેની વ્યવસ્થા પર પંચની સીધી દેખરેખ રહેશે.

લોખંડી પોલીસ બંદોબસ્ત

સુરત પોલીસ કમિશનર અનુપમસિંહ ગેહલોત અને જિલ્લા પોલીસ વડા રાજેશ ગઢીયાએ સુરક્ષા વ્યવસ્થા અંગે માહિતી આપતા જણાવ્યું હતું કે, મતદાન દરમિયાન કાયદો અને વ્યવસ્થા જળવાઈ રહે તે માટે શહેર અને ગ્રામ્ય વિસ્તારોમાં ચુસ્ત બંદોબસ્ત ગોઠવવામાં આવ્યો છે. સંવેદનશીલ મતદાન મથકો પર વધારાની ફોર્સ તૈનાત કરવામાં આવી છે અને અસામાજિક તત્વો પર બાજ નજર રાખવામાં આવી રહી છે.

વહીવટી તંત્રની સજ્જતા

પાલિકા કમિશનર એમ. નાગરાજન અને જિલ્લા વિકાસ અધિકારી (DDO) પણ આ બેઠકમાં હાજર રહ્યા હતા. તેમણે શહેરના વિવિધ વોર્ડમાં મતદાનની વ્યવસ્થા અને સ્ટાફની ફાળવણી અંગે વિગતો આપી હતી. અધિકારીઓએ સંયુક્તપણે સુરતની જનતાને અપીલ કરી હતી કે, કોઈપણ પ્રકારના ભય કે ડર વગર લોકશાહીના આ પર્વમાં ઉત્સાહભેર જોડાઈને પોતાનો કિંમતી મત આપે. પ્રચારના પડઘમ શાંત થતા જ હવે તંત્ર મતદાનની આખરી પ્રક્રિયામાં વ્યસ્ત બન્યું છે.

આ પણ વાંચો—   Local Body Elections 2026 : ગરમીના યલો એલર્ટ વચ્ચે 26 એપ્રિલે ગુજરાતમાં જંગ, નેતાઓ અને ચૂંટણી પંચ મતદાન વધારવા મક્કમ