અમેરિકાના વોશિંગ્ટનમાં રાષ્ટ્રપતિ ડોનાલ્ડ ટ્રમ્પના કાર્યક્રમમાં થયેલ ફાયરિંગની ઘટના અંગે હવે અનેક નવી વાતો સામે આવી છે. ફાયરિંગ કરનાર કોલ ટોમસ એલનનો એક પત્ર (Manifesto) સામે આવ્યો છે, જે તેણે ઘટનાના થોડા સમય પહેલા તેના પરિવારને મોકલ્યો હતો. આ પત્રમાં હુમલાનું કારણ અને અન્ય ઘણા મુદ્દાઓની વિગતો આપવામાં આવી છે.

એપસ્ટીનનું “ભૂત” ટ્રમ્પનો પીછો છોડી રહ્યું નથી

જેફરી એપસ્ટીનનું “ભૂત” ટ્રમ્પનો પીછો છોડી રહ્યું નથી. 24 કલાક પહેલા હોટલમાં થયેલા ફાયરિંગના આરોપી પાછળ પણ એપસ્ટીનનો એક એંગલ બહાર આવ્યો છે. ફાયરિંગની ઘટના બાદ, જ્યારે એક મહિલા એન્કરે એક ઇન્ટરવ્યુ દરમિયાન કેમેરા સામે રાષ્ટ્રપતિ ડોનાલ્ડ ટ્રમ્પને એલનના પત્ર વિશે આ જ વાત કહી, ત્યારે ટ્રમ્પ ગુસ્સે થઈ ગયા. એન્કરે ખરેખર ફાયરિંગ કરનારના હેતુઓનો ઉલ્લેખ કરતા એક નિવેદન વાંચ્યું હતું. આ સાંભળીને ટ્રમ્પ ગુસ્સે થઈ ગયા હતા.

અમેરિકાના રાષ્ટ્રપતિ ડોનાલ્ડ ટ્રમ્પ એક ઇન્ટરવ્યુ દરમિયાન મહિલા પત્રકાર પર ભડકી ઉઠ્યા. આ મામલો કોલ ટોમસ એલનના મેસેજ સાથે જોડાયેલો હતો, જેના પર ગોળીબાર કરવાનો આરોપ છે.

એલને હુમલાના 10 મિનિટ પહેલા પરિવારને એક મેનિફેસ્ટો (લેખિત નિવેદન) મોકલ્યો હતો. તેમાં તેણે ‘પેડોફાઇલ, રેપિસ્ટ અને ગદ્દાર’ જેવા શબ્દો લખ્યા હતો, પરંતુ તેણે કોઈનું નામ સીધું લીધું ન હતું. આ જ મામલે પત્રકાર નોરા ઓ ડોનલે જ્યારે ટ્રમ્પને પૂછ્યું કે શું આ આરોપો તેમની તરફ ઇશારો કરે છે?

આના પર ટ્રમ્પે કહ્યું કે તેઓ ન તો રેપિસ્ટ છે અને ન તો કોઈનો રેપ કર્યો છે. તેમણે નારાજગી વ્યક્ત કરતા કહ્યું, “તમે એક બીમાર માણસની બકવાસ ટીવી પર વાંચી દીધી. મને એવી બાબતો સાથે જોડવામાં આવ્યો જેની સાથે મારે કોઈ લેવાદેવા નથી. મને પહેલાથી જ સંપૂર્ણપણે ક્લીન ચિટ મળી ચૂકી છે.”

આના પર નોરાએ સ્પષ્ટ કર્યું કે તે તેમના પોતાના શબ્દો નહોતા, પરંતુ આરોપીએ લખ્યા હતા. પરંતુ ટ્રમ્પે કહ્યું કે આવા આરોપો ટીવી પર વાંચવા જ ખોટા હતા.

ટ્રમ્પે કહ્યું- હું રેપિસ્ટ નથી, હું પીડોફાઇલ નથી

એક ઇન્ટરવ્યુમાં જ્યારે આ આરોપો વિશે પૂછવામાં આવ્યું ત્યારે, ટ્રમ્પે તેનો સ્પષ્ટ ઇનકાર કર્યો. ટ્રમ્પે કહ્યું- હું તમારા આ વાંચવાની રાહ જોઈ રહ્યો હતો કારણ કે મને ખબર હતી કે તમે તે વાંચશો કારણ કે તમે ખરાબ લોકો છો. ભયાનક લોકો છો. હું રેપિસ્ટ નથી. મેં કોઈનો રેપ નથી કર્યો. હું પીડોફાઇલ નથી. મને દુઃખ છે કે તમે એક બીમાર વ્યક્તિની બકવાસ વાંચી છે.

ટ્રમ્પે વધુમાં કહ્યું, “મને સંપૂર્ણપણે નિર્દોષ જાહેર કરવામાં આવ્યો હતો. તે તમારા મિત્રો છે જે એપસ્ટીન અને તેના જેવા વિશે વાતો કરતા રહે છે. આ વાંચ્યા પછી તમને શરમ આવવી જોઈએ.

ટ્રમ્પ બોલ્યા- ગોળીબાર દરમિયાન ડર ન લાગ્યો

ઇન્ટરવ્યુમાં જ્યારે ટ્રમ્પને પૂછવામાં આવ્યું કે શું તેઓ પોતે નિશાન પર હતા, તો તેમણે કહ્યું કે તેમને ખાતરી નથી. ટ્રમ્પે વધુમાં કહ્યું કે આ ઘટના દરમિયાન તેમને ડર ન લાગ્યો, કારણ કે દુનિયા આવી જ છે અને આવી ઘટનાઓ બની શકે છે.

તેમણે કહ્યું કે પહેલા તેમને લાગ્યું હતું કે આ એક નાની ઘટના છે, પરંતુ પછી સમજાયું કે મામલો ગંભીર છે. તે સમયે એક કલાકાર શો કરી રહ્યો હતો અને માહોલ સામાન્ય લાગી રહ્યો હતો, પરંતુ અચાનક બધું બદલાઈ ગયું.

ટ્રમ્પે કહ્યું કે સુરક્ષા ટીમ તેમને તરત જ બહાર લઈ જવા માંગતી હતી, પરંતુ તેઓ પહેલા જોવા માંગતા હતા કે શું થઈ રહ્યું છે. બાદમાં એજન્ટોએ તેમને નીચે ઝૂકવાનું કહ્યું, તો તેઓ અને મેલાનિયા બંને જમીન પર સૂઈ ગયા અને પછી સુરક્ષિત જગ્યાએ લઈ જવામાં આવ્યા.

તેમણે જણાવ્યું કે તેઓ અડધા રસ્તે સુધી ઊભા રહીને જઈ રહ્યા હતા, પછી એજન્ટોના કહેવા પર નીચે ઝૂકી ગયા કારણ કે ત્યાં ખતરો વધારે હતો. ટ્રમ્પે કહ્યું કે તેમણે પહેલા પણ આવી પરિસ્થિતિઓ જોઈ છે, પરંતુ મેલાનિયા માટે આ નવો અનુભવ હતો. તેમ છતાં તેમણે પરિસ્થિતિને સારી રીતે સંભાળી.

ગોળીબાર દરમિયાન ટ્રમ્પ ડિનર કરી રહ્યા હતા. તે ભાગતી વખતે પડી ગયા.

ટ્રમ્પ બોલ્યા- ડેમોક્રેટિક નેતાઓના નિવેદનોથી હિંસા ભડકી રહી છે

ઇન્ટરવ્યુમાં ટ્રમ્પે કહ્યું કે ઘટના ખરાબ હતી, પરંતુ એટલી મોટી ન બની કારણ કે કોઈનું મૃત્યુ થયું ન હતું અને કોઈ ઘાયલ થયું ન હતું.

આવી હિંસા કોઈ નવી વાત નથી. આ 20, 50, 100 કે 500 વર્ષથી થતી આવી છે. લોકો માર્યા જાય છે, ઘાયલ થાય છે. તેમને નથી લાગતું કે આજે આ પહેલા કરતા વધારે થઈ રહ્યું છે.

તેમણે રાજકીય હિંસા ભડકાવવા માટે ડેમોક્રેટ નેતાઓની “હેટ સ્પીચ” ને જવાબદાર ઠેરવી અને કહ્યું કે આ ખૂબ જ ખતરનાક સ્થિતિ છે.

ટ્રમ્પ સરકારના ઘણા મંત્રીઓ હુમલાખોરના નિશાના પર હતા

આરોપીએ પોતાની લખેલી નોટમાં કહ્યું હતું કે સરકારના મોટા નેતાઓ તેના નિશાન પર હતા અને તે તેમને એક પછી એક ટાર્ગેટ કરવા માંગતો હતો. તેણે લખ્યું કે તે હવે કોઈ “દેશદ્રોહી”ના કામમાં સામેલ થવા માંગતો નથી.

સારી વાત એ રહી કે તે તે હોલ સુધી પહોંચી શક્યો નહીં, જ્યાં ટ્રમ્પ, તેમની પત્ની મેલાનિયા ટ્રમ્પ અને મોટા અધિકારીઓ હાજર હતા. સુરક્ષા ટીમે સમયસર તેને રોકી લીધો અને ટ્રમ્પને તરત જ ત્યાંથી બહાર લઈ જવામાં આવ્યા.

આ ઘટના પછી ફરી એકવાર ટ્રમ્પની સુરક્ષાને લઈને સવાલો ઉભા થયા છે, કારણ કે પહેલા પણ તેમના પર હુમલાનો પ્રયાસ થઈ ચૂક્યો છે.

————————————–

વોશિંગ્ટન ડિનર સંબંધિત સમાચાર અહીં વાંચો…

વોશિંગ્ટનમાં ડિનર દરમિયાન ફાયરિંગ, ટ્રમ્પને સુરક્ષિત બહાર કઢાયા: નજરેજોનારે કહ્યું- 7 રાઉન્ડ ફાયરિંગ થયું, મહેમાનો ટેબલ નીચે છુપાયા; હુમલાખોર પકડાયો

અમેરિકાની રાજધાની વોશિંગ્ટન ડીસીમાં વાર્ષિક વ્હાઇટ હાઉસ કોરસપોન્ડન્ટ ડિનર દરમિયાન ફાયરિંગ થયું. શનિવારે સાંજે યોજાયેલા આ કાર્યક્રમમાં અમેરિકાના રાષ્ટ્રપતિ ડોનાલ્ડ ટ્રમ્પ, પત્ની મેલાનિયા અને ઉપરાષ્ટ્રપતિ જેડી વેન્સ સહિત અનેક મોટા અધિકારીઓ હાજર હતા.

દિવ્ય ભાસ્કરને Google પર મનપસંદ સોર્સ બનાવો