કિંગ ચાર્લ્સ તૃતીયે મંગળવારે વ્હાઇટ હાઉસમાં સ્ટેટ ડિનર દરમિયાન ડોનાલ્ડ ટ્રમ્પ પર હળવાશથી કટાક્ષ કર્યો. તેમણે કહ્યું કે જો બ્રિટિશ ન હોત, તો આજે અમેરિકન લોકો ફ્રેન્ચ બોલી રહ્યા હોત. ચાર્લ્સે કહ્યું- તમે તાજેતરમાં કહ્યું હતું કે જો અમેરિકા ન હોત, તો યુરોપિયન દેશો જર્મન બોલી રહ્યા હોત. તો હું એ કહેવાની હિંમત કરું છું કે જો અમે (બ્રિટિશ) ન હોત, તો તમે લોકો ફ્રેન્ચ બોલી રહ્યા હોત. લગભગ 250 વર્ષ પહેલાં જ્યારે અમેરિકા આઝાદ નહોતું, ત્યારે બ્રિટન અને ફ્રાન્સ બંને ત્યાં પોતાની પકડ જમાવવા માંગતા હતા. બંને દેશો વચ્ચે આ વાતને લઈને લડાઈ થઈ કે ઉત્તર અમેરિકા પર કોનો કબજો રહેશે. અંતે આ લડાઈમાં બ્રિટન જીતી ગયું. કિંગ ચાર્લ્સનો ઈશારો આ તરફ હતો. ટ્રમ્પ એ દાવોસ સમિટમાં યુરોપિયન દેશો પર કટાક્ષ કર્યો હતો આ પહેલા જાન્યુઆરીમાં દાવોસ સમિટ દરમિયાન ડોનાલ્ડ ટ્રમ્પ એ યુરોપિયન દેશો અને તેમના સહયોગને લઈને એક નિવેદન આપ્યું હતું. ટ્રમ્પ એ કહ્યું હતું કે બીજા વિશ્વ યુદ્ધમાં જો અમેરિકાએ મોટી ભૂમિકા ન ભજવી હોત, તો આજે યુરોપનો નકશો અને ત્યાંની ભાષા બંને અલગ હોત. તેમના મતે, તે સમયે જર્મની અને જાપાન ખૂબ શક્તિશાળી હતા અને જો તેમને રોકવામાં ન આવ્યા હોત, તો તેઓ ઘણા દેશો પર કબજો કરી શક્યા હોત. આ જ સંદર્ભમાં તેમણે કહ્યું કે “જો અમેરિકા મદદ માટે ન આવ્યું હોત, તો આજે તમે લોકો જર્મન અને થોડું જાપાનીઝ બોલી રહ્યા હોત.” આ નિવેદન દ્વારા ટ્રમ્પ એ જણાવવા માંગતા હતા કે અમેરિકાએ યુદ્ધમાં નિર્ણાયક ભૂમિકા ભજવી હતી અને યુરોપની આઝાદી જાળવી રાખવામાં મોટો ફાળો આપ્યો હતો. સાથે જ, તેઓ એ પણ સંકેત આપી રહ્યા હતા કે આજે પણ યુરોપ પોતાની સુરક્ષા માટે મોટાભાગે અમેરિકા પર નિર્ભર છે. ચાર્લ્સે વ્હાઇટ હાઉસ સળગાવવાનો કિસ્સો પણ યાદ અપાવ્યો કિંગ ચાર્લ્સે વ્હાઇટ હાઉસમાં થયેલા ફેરફારો પર પણ ટ્રમ્પ પર કટાક્ષ કર્યો. તેમણે કહ્યું કે ઇસ્ટ વિંગમાં ઘણા ‘રીએડજસ્ટમેન્ટ’ થઈ રહ્યા છે. ટ્રમ્પે 400 મિલિયન ડોલરનો મોટો બોલરૂમ બનાવવા માટે જૂના ભાગને તોડી પાડ્યો છે. આના પર ચાર્લ્સે હસતા કહ્યું, “અમે પણ 1814માં વ્હાઇટ હાઉસના રિયલ એસ્ટેટ ડેવલપમેન્ટનો અમારો પ્રયાસ કર્યો હતો.” ખરેખરમાં તેઓ 1814ની ઘટના યાદ અપાવી રહ્યા હતા જ્યારે બ્રિટિશ સૈનિકોએ વ્હાઇટ હાઉસને આગ લગાડી હતી. કિંગ ચાર્લ્સ આટલેથી જ ન અટક્યા. તેમણે મજાકમાં એમ પણ કહ્યું કે આજનું ડિનર ‘બોસ્ટન ટી પાર્ટી’ કરતાં ઘણું સારું છે. બોસ્ટન ટી પાર્ટી 16 ડિસેમ્બર 1773 ના રોજ થઈ હતી. તે સમયે અમેરિકા, બ્રિટનનું સંસ્થાન હતું. બ્રિટને ત્યાંના લોકો પર ઘણા ટેક્સ લગાવ્યા હતા, ખાસ કરીને ચા પર. આનાથી નારાજ થઈને લોકોએ સમુદ્રમાં ચા ફેંકી દીધી હતી. આ ઘટના અમેરિકાની આઝાદીની લડાઈની શરૂઆતનાં મુખ્ય કારણોમાંની એક માનવામાં આવે છે. ટ્રમ્પે કહ્યું- ચાર્લ્સે તે કર્યું જે હું ન કરી શક્યો જ્યારે ટ્રમ્પના બોલવાનો વારો આવ્યો ત્યારે તેમણે ચાર્લ્સની પ્રશંસા કરી અને કહ્યું કે તેમણે સંસદમાં શાનદાર ભાષણ આપ્યું. તેમણે મજાકમાં એમ પણ કહ્યું કે ચાર્લ્સે ડેમોક્રેટ્સને પણ ઊભા કરી દીધા, જે તેઓ પોતે ક્યારેય કરી શક્યા નહોતા. જોકે, અમેરિકામાં બે મોટી પાર્ટીઓ છે. રિપબ્લિકન (ટ્રમ્પની) અને ડેમોક્રેટ્સ (વિપક્ષ). સામાન્ય રીતે ડેમોક્રેટ્સ, ટ્રમ્પની વાતો સાથે સહમત થતા નથી, તેથી તેમના માટે ઊભા રહીને તાળીઓ પાડતા નથી. પરંતુ ચાર્લ્સના ભાષણ પર ડેમોક્રેટ્સે પણ ઊભા રહીને તાળીઓ પાડી. કિંગ ચાર્લ્સે ટ્રમ્પને ઘંટ ભેટમાં આપ્યો કિંગ ચાર્લ્સ પોતાની સાથે એક ભેટ પણ લાવ્યા હતા. આ બ્રિટન તરફથી ટ્રમ્પ માટે એક પ્રકારની રાજદ્વારી પહેલ માનવામાં આવી રહી છે, ખાસ કરીને ત્યારે જ્યારે ટ્રમ્પે ઈરાન મુદ્દે બ્રિટનના વડાપ્રધાન કીર સ્ટાર્મરની ટીકા કરી હતી. ચાર્લ્સે ટ્રમ્પને બ્રિટિશ સબમરીન HMS નો ઘંટ ભેટમાં આપ્યો. આ સબમરીન 1944માં બીજા વિશ્વ યુદ્ધ દરમિયાન લોન્ચ કરવામાં આવી હતી. ભેટ આપતી વખતે ચાર્લ્સે કહ્યું કે આ આપણા સહિયારા ઇતિહાસ અને ઉજ્જવળ ભવિષ્યનું પ્રતીક બને. સાથે જ હસતા હસતા કહ્યું, “જો ક્યારેય અમને બોલાવવા હોય, તો બસ ઘંટ વગાડી દેજો.” ચાર્લ્સનો કિંગ બન્યા પછીનો પહેલો અમેરિકા પ્રવાસ કિંગ ચાર્લ્સે ટ્રમ્પની મહેમાનગતિ બદલ આભાર પણ માન્યો અને જણાવ્યું કે આ તેમની અમેરિકાની 20મી મુલાકાત છે, પરંતુ પહેલીવાર તેઓ રાજા તરીકે આવ્યા છે. આ મુલાકાત એવા સમયે થઈ જ્યારે બ્રિટન અને અમેરિકા વચ્ચે થોડો તણાવ પણ રહ્યો છે. ખાસ કરીને ઈરાન પર અમેરિકા-ઈઝરાયલના હુમલાને લઈને, જેમાં બ્રિટનની લેબર સરકાર સામેલ થઈ ન હતી. આ પછી ટ્રમ્પે બ્રિટનના વડાપ્રધાનની ટીકા પણ કરી હતી. ડિનરમાં ઘણા દિગ્ગજો સામેલ થયા અમેરિકી સંસદમાં આપેલા ભાષણમાં કિંગ ચાર્લ્સે કહ્યું કે તેઓ “એક એવા જરૂરી ગઠબંધનને ફરીથી મજબૂત કરવા આવ્યા છે, જે લાંબા સમયથી સમૃદ્ધિ અને સુરક્ષાનો પાયો રહ્યો છે.” તેમણે નાટો જેવા આંતરરાષ્ટ્રીય ગઠબંધનોના મહત્વ પર ભાર મૂક્યો, જેમની ટ્રમ્પ પહેલા ટીકા કરી ચૂક્યા છે. સાથે જ તેમણે રશિયા સામે લડી રહેલા યુક્રેનના સમર્થનને ચાલુ રાખવાની વાત પણ કહી. તેમણે કહ્યું, “આપણે સાથે મળીને એક એવી દુનિયાના પડકારોનો સામનો કરી શકીએ છીએ, જે દિવસેને દિવસે જટિલ અને સંઘર્ષપૂર્ણ બનતી જઈ રહી છે.” કિંગ ચાર્લ્સના અમેરિકા પ્રવાસ સાથે જોડાયેલી 6 તસવીરો… ટ્રમ્પે ઈરાનનો મુદ્દો ઉઠાવ્યો ટ્રમ્પે કહ્યું કે ઈરાનને ક્યારેય પરમાણુ હથિયારો મેળવવાની મંજૂરી આપવામાં આવશે નહીં. તેમણે એમ પણ કહ્યું કે કિંગ ચાર્લ્સ પણ તેમની આ વાત સાથે સહમત છે. ટ્રમ્પે કહ્યું કે “અમે અત્યારે મિડલ ઈસ્ટમાં થોડું કામ કરી રહ્યા છીએ, જેમ કે તમે જાણતા હશો, અને અમે ખૂબ સારું કરી રહ્યા છીએ. અમે તે વિરોધીને હરાવી દીધો છે. અને અમે તેને ક્યારેય પરમાણુ હથિયારો મેળવવા દઈશું નહીં.” જોકે ટ્રમ્પે પોતાના નિવેદનમાં સીધી રીતે ઈરાનનું નામ લીધું ન હતું, પરંતુ તેમનો ઈશારો તે જ દેશ તરફ માનવામાં આવી રહ્યો છે.