અનિલ કપૂરે તાજેતરમાં તેના પિતા અને ફિલ્મ નિર્માતા સુરિન્દર કપૂરના સંઘર્ષના દિવસોને યાદ કર્યા. તેણે જણાવ્યું કે એક ફિલ્મ ફ્લોપ થયા પછી ઇન્ડસ્ટ્રીએ તેના પિતાથી અંતર બનાવી લીધું હતું. તે સમયે સુરિન્દર કપૂર એટલા ભાંગી પડ્યા હતા કે ઘણી વાર રડી પડતા હતા.

અનિલ કપૂરે આ વાત લિલી સિંહના પોડકાસ્ટમાં કહી. તેણે જણાવ્યું કે તેમના પિતા ખૂબ જ પ્રામાણિક અને સાદગી પસંદ વ્યક્તિ હતા. પરંતુ ફિલ્મ ઇન્ડસ્ટ્રીમાં સફળતા અને નિષ્ફળતા ઝડપથી સંબંધો બદલી નાખે છે. તેમના મતે, પિતાએ સુપરસ્ટાર રાજેશ ખન્ના સાથે એક ફિલ્મ બનાવી હતી, જે બોક્સ ઓફિસ પર ફ્લોપ થઈ ગઈ. આ પછી લોકોએ તેમનાથી દૂર રહેવાનું શરૂ કરી દીધું.

અનિલ કપૂરે કહ્યું, “મેં મારા પિતાને તૂટતા જોયા છે. લોકો અચાનક તેમનાથી દૂર થઈ ગયા હતા. તેઓ રડતા હતા અને ખૂબ પરેશાન રહેતા હતા.” અભિનેતાએ જણાવ્યું કે આ ઘટનાએ તેમને અંદરથી પ્રભાવિત કર્યા. ત્યારે જ તેમણે નક્કી કર્યું કે તેઓ ફિલ્મોમાં પોતાનું નામ બનાવશે અને પિતાનું સપનું પૂરું કરશે.

તેણે એ પણ જણાવ્યું કે તેમના પિતાએ ક્યારેય તેને લોન્ચ કરવાનો પ્રયાસ કર્યો ન હતો. સુરીન્દર કપૂર માનતા હતા કે જો અનિલને ઇન્ડસ્ટ્રીમાં ટકી રહેવું હોય, તો તેને પોતાના દમ પર ઓળખ બનાવવી પડશે. અનિલે શરૂઆતના દિવસોમાં નાના-મોટા રોલ કર્યા, રિજેક્શન સહન કર્યા અને લાંબા સંઘર્ષ પછી પોતાને સ્થાપિત કર્યા.

અનિલ કપૂરે કહ્યું કે તેમના પિતાની નિષ્ફળતાઓએ તેને મહેનત કરતા શીખવ્યું. તેણે અનુભવ્યું કે ફિલ્મ ઇન્ડસ્ટ્રીમાં લોકો ફક્ત સફળતાની સાથે ઊભા રહે છે. આ જ કારણ હતું કે તે પોતાના કામને લઈને ગંભીર રહ્યા અને દરેક તકને પૂરી ઇમાનદારીથી નિભાવી.

સુરીન્દર કપૂર હિન્દી સિનેમાના જાણીતા પ્રોડ્યુસર હતા. તેણે કરિયરમાં ઘણી ફિલ્મો પ્રોડ્યુસ કરી. જ્યારે અનિલ કપૂરે 1980 અને 90ના દાયકામાં મિસ્ટર ઇન્ડિયા, તેજાબ, રામ લખન અને બેટા જેવી ફિલ્મોથી સ્ટારડમ હાંસલ કર્યું. આજે પણ તેઓ ઇન્ડસ્ટ્રીના એક્ટિવ અભિનેતાઓમાં ગણાય છે.

દિવ્ય ભાસ્કરને Google પર મનપસંદ સોર્સ બનાવો