વિશ્વ હજુ સુધી આ મહામારીમાંથી સંપૂર્ણપણે બહાર આવ્યું નથી. કોરોના બાદ ફરી એક વાયરસ લોકો માટે જીવલેણ બની રહ્યો છે. તાજેતરમાં એટલાન્ટિક મહાસાગરમાં એક ક્રુઝ જહાજ પર એક વાયરસના કારણે 3 લોકોના મોત થયા. આ વાયરસના કહેરના સમાચાર સામે આવતા તબીબ જગતમાં હડકંપ મચ્યો. વાયરસને લઈને આરોગ્ય નિષ્ણાતો સતર્ક થયા છે. 3 લોકોએ જીવ ગુમાવ્યા તે ‘હંટાવાયરસ’ના કારણે તબીબ જગતની ચિંતામાં વધારો થયો છે.

શું છે હંટા વાયરસ, ફેફસા અને કિડની માટે ઘાતક

હંટા વાયરસ કોઈ નવો વાયરસ નથી, તે ઉંદરો દ્વારા ફેલાતો એક ગંભીર વાયરસ છે. આ વાયરસ હવા દ્વારા ફેલાય છે, જેને એરોસોલાઇઝેશન કહેવાય છે. જ્યારે ચેપગ્રસ્ત ઉંદરોનો મળ, પેશાબ અથવા લાળ સુકાઈ જાય છે અને ધૂળના કણો સાથે ભળી જાય છે, ત્યારે તે હવામાં તરતા રહે છે. જ્યારે કોઈ વ્યક્તિ તે હવામાં શ્વાસ લે છે, ત્યારે વાયરસ સીધો તેમના ફેફસામાં શ્વાસમાં જાય છે. વધુમાં, તે ચેપગ્રસ્ત સપાટીને સ્પર્શ કરીને અને પછી મોં અથવા નાકને સ્પર્શ કરીને પણ ફેલાઈ શકે છે. હંટાવાયરસની ઘાતકતા તેને ભયાનક બનાવે છે. તે સીધા માનવ ફેફસાં (HPS) અથવા કિડની (HFRS) પર હુમલો કરે છે. ફેફસાના ચેપથી શ્વાસ લેવાનું લગભગ અશક્ય બની શકે છે, જે મૃત્યુ તરફ દોરી શકે છે. ગંભીર સમસ્યાથી બચવા હંટા વાયરસ શું છે અને શરીરમાં તેના લક્ષણો કેવા હોય છે તે જાણવા જરૂરી છે.

જાણો હંટા વાયરસના લક્ષણો

• હંટા વાયરસના લક્ષણો બે તબક્કામાં જોવા મળે છે અને તે ઘણીવાર ફ્લૂ જેવા હોય છે. ચેપ લાગ્યાના ૧ થી ૮ અઠવાડિયા પછી આ લક્ષણો શરીરમાં દેખાય છે.
• તાવ અને ઠંડી લાગવી: અચાનક તાવ આવવો અને શરીરમાં ધ્રુજારી થવી.
• સ્નાયુઓમાં દુખાવો: ખાસ કરીને જાંઘ, પીઠ, ખભા અને હાથ-પગમાં અસહ્ય દુખાવો.  
• થાક અને નબળાઈ: દર્દીને ખૂબ જ થાક અનુભવાય છે.  
• પાચન સંબંધી સમસ્યાઓ: પેટમાં દુખાવો, ઉબકા, ઉલટી અને ઝાડા થવા.  
• માથાનો દુખાવો: સતત અને તીવ્ર માથાનો દુખાવો થવો
• શ્વાસ લેવામાં તકલીફ: ફેફસામાં પ્રવાહી ભરાવાને કારણે શ્વાસ લેવામાં ગંભીર મુશ્કેલી ઊભી થાય છે.
• ઉધરસ: ઉધરસ સાથે પ્રવાહી સ્ત્રાવ બહાર આવવો, બ્લડ પ્રેશર અચાનક ઘટી જાય છે.
• હૃદય અને કિડની પર અસર: હૃદયની કાર્યક્ષમતા ઘટવી અથવા કિડની ફેઈલ થવાનું જોખમ.

આ પણ વાંચો :