ભારતમાં મનોરંજન જોવાની રીત ઝડપથી બદલાઈ રહી છે. લાંબી ફિલ્મો અને ટીવી સિરિયલોની જગ્યાએ હવે લોકો મોબાઈલ પર માઈક્રો-ડ્રામા વધુ જોઈ રહ્યા છે. આ શોના એપિસોડ 2 મિનિટથી પણ ઓછા સમયના હોય છે અને લોકો તેમને દિવસના નાના-નાના બ્રેકમાં બિન્જ-વોચ કરી રહ્યા છે. આ મુખ્યત્વે મોબાઈલ ફોન માટે વર્ટિકલ ફોર્મમાં ડિઝાઇન કરવામાં આવ્યું છે, જેને ગમે ત્યાં સરળતાથી ઉપયોગ કરી શકાય છે.

રોકાણ ફર્મ લુમિકાઈના રિપોર્ટ અનુસાર, ભારતમાં માઈક્રો-ડ્રામાનું બજાર હાલમાં લગભગ 2,856 કરોડ રૂપિયાનું છે, જે 2030 સુધીમાં 42,844 કરોડ રૂપિયા સુધી પહોંચી શકે છે.

68% દર્શકો નાના શહેરોમાંથી, 40% દર્શકો મહિલાઓ

નિષ્ણાતોના મતે, ભારતમાં દર મહિને લગભગ 4 કરોડ યુઝર્સ માઈક્રો-ડ્રામા જુએ છે. લગભગ 68% દર્શકો ટિયર-2/ટિયર-3 શહેરોમાંથી આવે છે, જ્યાં સિનેમાઘરો ઓછા, ટીવી નબળું અને સ્ટ્રીમિંગ પ્લેટફોર્મની પહોંચ મર્યાદિત રહે છે. લગભગ 40% દર્શકો મહિલાઓ છે.

મોટા પ્રોડ્યુસર્સ અને AIથી વધેલું રોકાણ

હવે મોટા નિર્માતાઓ પણ તેમાં રોકાણ કરી રહ્યા છે. મુકેશ અંબાણીની કંપની જિયોસ્ટારે ‘તડકા’ નામનું પ્લેટફોર્મ લોન્ચ કર્યું છે, જેના પર 100થી વધુ શો છે. ઝી એન્ટરટેઈનમેન્ટ અને બાલાજી ટેલિફિલ્મ્સ પણ આ ફોર્મેટમાં ઉતરી ચૂક્યા છે. ઘણી કંપનીઓ હવે AIની મદદથી તેને દર મહિને 1 હજાર સુધી લઈ જવાની યોજના બનાવી રહી છે.

OTT કરતાં 90% સસ્તું માઇક્રો-ડ્રામા

માઇક્રો-ડ્રામા ફિલ્મમેકર અનુસાર, માઇક્રો-ડ્રામાની આખી સીઝન બનાવવી ઓટીટી સિરીઝની સરખામણીમાં 70-90% સસ્તી પડે છે. શૂટિંગ 3-4 દિવસમાં થઈ જાય છે. પ્રતિ મિનિટ કન્ટેન્ટનો ખર્ચ લગભગ 15 હજારથી 20 હજાર રૂપિયા જણાવવામાં આવ્યો છે. આખી સિઝન 10-15 લાખ રૂપિયામાં બની જાય છે, જેને દર મહિને 20થી 50 રૂપિયાના સબ્સ્ક્રિપ્શનથી વસૂલવામાં આવે છે.

દિવ્ય ભાસ્કરને Google પર મનપસંદ સોર્સ બનાવો