હાર્દિકની જગ્યાએ સૂર્યા ટોસ માટે આવ્યો

લખનઉ સામે મુંબઈની ટીમમાં મોટો ફેરફાર જોવા મળ્યો. કેપ્ટન હાર્દિક પંડ્યા આ મેચ રમ્યો નહોતો, તેની જગ્યાએ સૂર્યકુમાર યાદવ ટોસ માટે આવ્યો. ટીમમાં બે ફેરફાર પણ થયા. કોર્બિન બોશ અને રોહિત શર્માની ટીમમાં વાપસી થઈ. ટ્રેન્ટ બોલ્ટને પ્લેઇંગ-11માંથી બહાર રાખવામાં આવ્યા.

સૂર્યા કેપ્ટન હાર્દિક પંડ્યાની જગ્યાએ ટોસ કરવા આવ્યો. પંડ્યા બીમાર હતો.

રિષભ પંત શૂન્ય પર આઉટ થતા બચ્યો

લખનઉની ઇનિંગ્સની 9મી ઓવરમાં રિષભ પંત આઉટ થતા માંડ માંડ બચ્યો. કોર્બિન બોશે ઓવરનો ત્રીજો બોલ બેક-ઓફ-લેન્થ નાખ્યો. પંતે શોટ રમ્યો, બોલ તેમના બેટનો નીચેનો કિનારો લઈને વિકેટકીપર રિકેલ્ટન પાસે ગયો. ક્લીન કેચને લઈને શંકા હતી, તેથી અમ્પાયર રિવ્યુ લેવામાં આવ્યો. રિપ્લેમાં સ્પષ્ટ દેખાયું કે બેટની કિનારી લાગી હતી, પરંતુ રિકેલ્ટનના ગ્લોવ્ઝમાં જતા પહેલા બોલ જમીન પર પડી ગયો હતો.

રિકેલ્ટને લખનઉની ઇનિંગ્સની 9મી ઓવરમાં પંતનો કેચ છોડ્યો.

અક્ષત રઘુવંશીએ છગ્ગાથી IPLમાં ખાતું ખોલ્યું

લખનઉના બેટર અક્ષત રઘુવંશીએ પોતાની IPL કારકિર્દીની ધમાકેદાર શરૂઆત કરી. તેણે ડેબ્યૂ મેચમાં પોતાની પહેલી જ બોલ પર છગ્ગો ફટકાર્યો. ઇનિંગ્સની 11મી ઓવરમાં વિલ જેક્સની પાંચમી બોલ પર તેણે લોંગ-ઓન ઉપરથી 89 મીટરનો સિક્સર ફટકાર્યો.

ડેબ્યૂ મેચ રમી રહેલા અક્ષત રઘુવંશીએ પહેલા બોલ પર નો-લુક શોટ રમ્યો.

રઘુ શર્માએ ખિસ્સામાંથી નોટ કાઢી; લખ્યું હતું- ‘રાધે-રાધે, દર્દભર્યા 15 વર્ષ આજે પૂરા થયા’

મુંબઈના બોલર રઘુ શર્માએ લખનઉ સામે IPLની પોતાની પહેલી વિકેટ લીધી. 13મી ઓવરના પહેલા બોલ પર તેણે ફ્લાઈટ કરાવી. બેટર અક્ષત રઘુવંશીએ ક્રીઝમાંથી બહાર નીકળીને ડિફેન્સિવ શોટ રમ્યો, પરંતુ બોલ બેટ અને પેડને અડીને સીધો રઘુના હાથમાં ગયો. ત્યારબાદ તેણે પોતાના ખિસ્સામાંથી કાગળનો એક ટુકડો કાઢીને બધાને બતાવ્યો. કેપ્ટન સૂર્યકુમાર યાદવ પણ નજીક આવીને તે નોટ વાંચવાનો પ્રયાસ કરતા દેખાયા. તે નોટ પર લખ્યું હતું- ‘રાધે-રાધે. ગુરુદેવની દિવ્ય કૃપાથી આજે 15 વર્ષનો દર્દભર્યો પ્રવાસ સમાપ્ત થયો. આ અવસર માટે મુંબઈ ઇન્ડિયન્સ (બ્લુ એન્ડ ગોલ્ડ)નો આભાર. હંમેશા આભારી રહીશ. જય શ્રી રામ.’

રઘુ શર્માએ પહેલી વિકેટ લીધા બાદ પોતાના ખિસ્સામાંથી ચિઠ્ઠી કાઢી.

બુમરાહે વિકેટ લીધી, પરંતુ બોલ નો-બોલ નીકળ્યો

લખનઉની ઇનિંગ્સની 14મી ઓવર ઘણી ઇવેન્ટફુલ રહી. જસપ્રીત બુમરાહે ઓવરના ત્રીજા બોલ પર ગુડ લેન્થ નાખી. હિંમત સિંહે શોટ રમવાનો પ્રયાસ કર્યો, પરંતુ બોલ બેટની કિનારી લઈને સીધો વિકેટકીપરના ગ્લોવ્ઝમાં જતો રહ્યો. મુંબઈ વિકેટની ઉજવણી કરી રહી હતી ત્યાં નો બોલનું સાયરન વાગ્યું. રિપ્લેમાં દેખાયું કે બુમરાહનો પગ ક્રીઝની બહાર નીકળી ગયો હતો.

બુમરાહે હિંમત સિંહને કેચ આઉટ કરાવ્યો, પરંતુ અમ્પાયરે બોલને નો-બોલ જાહેર કર્યો.

રોહિતે સતત 4 વખત બોલને બાઉન્ડ્રીની બહાર મોકલ્યો

મુંબઈના પાવરપ્લેની છેલ્લી ઓવર લખનઉ માટે ઘણી મોંઘી સાબિત થઈ. આ ઓવરમાં રોહિત શર્માએ બોલર આવેશ ખાનની બોલ પર સતત 2 ચોગ્ગા અને પછી 2 છગ્ગા ફટકાર્યા. ઓવરના બીજા અને ત્રીજા બોલ પર રોહિતે ચોગ્ગો ફટકાર્યો. ત્યારબાદ ચોથા બોલને ડીપ મિડવિકેટ પર છગ્ગા માટે મોકલી દીધો. આગળનો બોલ આવેશે ફુલ ટોસ નાખ્યો, જેને રોહિતે બેકવર્ડ સ્ક્વેર લેગ ઉપરથી સિક્સ ફટકાર્યો. આ ઓવરમાં 21 રન બન્યા.

રોહિતે આવેશની ઓવરમાં બે ચોગ્ગા અને બે છગ્ગા ફટકાર્યા.

રોહિતે છગ્ગો ફટકારીને ફિફ્ટી પૂરી કરી

રોહિતે લખનઉ સામે 9મી ઓવરમાં ધમાકેદાર અંદાજમાં ફિફ્ટી પૂરી કરી. મણિમરણ સિદ્ધાર્થના ઓવરની પહેલી જ બોલ પર પુલ શોટ રમતા લોંગ-ઓન ઉપરથી છગ્ગો ફટકાર્યો. આ સાથે જ રોહિતે 27 બોલમાં પોતાની ફિફ્ટી પૂરી કરી. આ પછી રોહિતે બેટ ઉઠાવીને દર્શકોનું અભિવાદન કર્યું.

ફિફ્ટી સેલિબ્રેટ કરતા રોહિત શર્મા.

નમન ધીરનો શૂન્ય પર કેચ છૂટ્યો

પારીની 16મી ઓવરમાં જોશ ઇંગ્લિશે નમન ધીરનો કેચ છોડી દીધો. બોલર મણિમરણ સિદ્ધાર્થની પાંચમી બોલ પર નમને ઓફ-સાઇડ તરફ ઝડપી શોટ રમ્યો. કવર પર ઉભેલા જોશ ઇંગ્લિશે પોતાની ડાબી બાજુ ડાઇવ લગાવીને બોલ પકડવાનો પ્રયાસ કર્યો, પરંતુ બોલ તેમના હાથમાંથી છટકી ગયો. નમને આ સમયે ખાતું પણ ખોલ્યું ન હતું.

જોશ ઇંગ્લિશે નમન ધીરનો કેચ છોડ્યો.

વિલ જેક્સે છગ્ગો ફટકારી મુંબઈને જીતાડ્યું

19મી ઓવરના ચોથા બોલ પર વિલ જેક્સે છગ્ગો ફટકારી મુંબઈને જીત અપાવી. આવેશ ખાનના ફુલ લેન્થ બોલને તેણે લોંગ-ઓફ બાઉન્ડ્રી ઉપરથી છગ્ગો ફટકાર્યો. વિનિંગ શોટ બાદ તેણે જીતની ઉજવણી કરી. આ સાથે જ મુંબઈએ આ સિઝનની ત્રીજી જીત નોંધાવી.

વિનિંગ શોટ લગાવ્યા બાદ જીત સેલિબ્રેટ કરતા વિલ જેક્સ.

દિવ્ય ભાસ્કરને Google પર મનપસંદ સોર્સ બનાવો