દમદાર ડાન્સર અને એક્ટ્રેસ નોરા ફતેહી FIFA વર્લ્ડ કપ 2026ની ઓપનિંગ સેરેમનીમાં પરફોર્મ કરનારી પ્રથમ બોલિવૂડ એક્ટ્રેસ બનશે. આ સેરેમની 12 જૂને કેનેડાના ટોરોન્ટોમાં BMO ફિલ્ડમાં યોજાશે.

FIFA વર્લ્ડ કપના ઓફિશિયલ હેન્ડલે નોરા ફતેહીના ઓપનિંગ સેરેમનીમાં પરફોર્મ કરવા અંગેની માહિતી આપી છે.

આ પહેલા નોરાએ FIFA વર્લ્ડ કપ 2022ની ક્લોઝિંગ સેરેમની અને ICC મેન્સ T20 વર્લ્ડ કપ 2026ની ઓપનિંગ સેરેમનીમાં પરફોર્મ કર્યું હતું. હવે તે પ્રથમ અને એકમાત્ર બોલિવૂડ કલાકાર બનશે, જેણે ફૂટબોલ અને ક્રિકેટના વર્લ્ડ કપની ઓપનિંગ સેરેમનીમાં પરફોર્મ કર્યું છે.

નોરા ફતેહીએ 18 ડિસેમ્બર 2022ના રોજ ફિફા વર્લ્ડ કપ 2022ની ક્લોઝિંગ સેરેમની દરમિયાન સત્તાવાર એન્થમ ‘લાઇટ ધ સ્કાય’ પર પરફોર્મ કર્યું હતું.

નોરા ફતેહીએ 7 ફેબ્રુઆરી 2026ના રોજ મુંબઈના વાનખેડે સ્ટેડિયમમાં ICC પુરુષ T20 વિશ્વ કપ 2026ની ઓપનિંગ સેરેમનીમાં પરફોર્મ કર્યું હતું.

ત્રણ અલગ-અલગ ઓપનિંગ સેરેમની યોજાશે

વર્લ્ડ કપ 2026 ત્રણ દેશો (અમેરિકા, મેક્સિકો અને કેનેડા) માં યોજાઈ રહ્યો છે, તેથી ફીફાએ દરેક યજમાન દેશની પ્રથમ મેચ પહેલાં ત્રણ અલગ-અલગ ઓપનિંગ સેરેમની યોજવાની યોજના બનાવી છે.

કેનેડાની સેરેમનીમાં બાંગ્લાદેશી મૂળના અમેરિકન ડીજે સંજોય પણ પરફોર્મ કરશે. સંજોયે 2011માં બોલિવૂડ ફિલ્મ રા.વનના પ્રખ્યાત ગીત ‘છમ્મક છલ્લો’નું એક સત્તાવાર રીમિક્સ તૈયાર કર્યું હતું.

નોરા અને સંજોય ઉપરાંત આ ઇવેન્ટમાં માઇકલ બુબ્લે, એલાનિસ મોરિસેટ, એલેસિયા કારા, એલિયાના, જેસી રેયેઝ, વેજીડ્રીમ અને વિલિયમ પ્રિન્સ જેવા કલાકારો સામેલ થશે.

સંજય દેબને પ્રોફેશનલી ડીજે સંજય તરીકે ઓળખવામાં આવે છે.

સિંગર કેટી પેરી પણ વર્લ્ડ કપમાં પરફોર્મ કરશે

સિંગર કેટી પેરી અમેરિકામાં યોજાનારી ઓપનિંગ સેરેમનીમાં પરફોર્મ કરશે. પેરીએ ઇન્સ્ટાગ્રામ પર આ સમાચાર શેર કર્યાં. તેણે જણાવ્યું કે તે 12 જૂને અમેરિકાના લોસ એન્જલસમાં ઓપનિંગ સેરેમનીમાં પરફોર્મ કરશે.

અમેરિકન સિંગર કેટી પેરી પહેલીવાર FIFA મેન્સ વર્લ્ડ કપની ઓપનિંગ સેરેમનીમાં પરફોર્મ કરશે.

આ ઇવેન્ટ કેલિફોર્નિયાના સોફી સ્ટેડિયમમાં યોજાશે, જ્યાં અમેરિકા અને પેરાગ્વે વચ્ચે મેચ રમાશે. કેટી પેરી ઉપરાંત લિસા, ટાયલા, અનિતા અને રેમા પણ ઓપનિંગ સેરેમનીમાં પરફોર્મ કરશે.

11 જૂને મેક્સિકો સિટીમાં યોજાનારી ઓપનિંગ સેરેમનીમાં ટાયલા, અલેજાન્ડ્રો ફર્નાન્ડેઝ, ડેની ઓશન, લીલા ડાઉન્સ, બેલિન્ડા, જે બાલવિન અને બેન્ડ લોસ એન્જલસ અઝુલ્સ અને માના પરફોર્મ કરશે.

શકીરાએ નવું ગીત કર્યું અનાઉન્સ

ફિફા વર્લ્ડ કપ 2026માં શકીરા પણ વાપસી કરશે. તેણે ટૂર્નામેન્ટ માટે નવું ગીત ‘દાઈ દાઈ’ અનાઉન્સ કર્યું છે. આ ગીતમાં નાઇજીરીયન સિંગર બર્ના બોય પણ સામેલ છે. શકીરાનું 2010 વર્લ્ડ કપ એન્થમ વાકા વાકા ખૂબ ફેમસ થયું હતું.

ફિફા વર્લ્ડ કપ 2026નું આયોજન 11 જૂનથી 19 જુલાઈ સુધી થશે. ટૂર્નામેન્ટમાં કુલ 104 મેચ રમાશે. પહેલી મેચ મેક્સિકો સિટીમાં જ્યારે ફાઇનલ ન્યૂ જર્સીમાં આયોજિત થશે.

દિવ્ય ભાસ્કરને Google પર મનપસંદ સોર્સ બનાવો