IPL 2026માં 58 મેચ પૂરી થઈ ચૂકી છે. ગુરુવારે મુંબઈ ઈન્ડિયન્સે પંજાબ કિંગ્સને હરાવીને પ્લેઓફની રેસ રોમાંચક બનાવી દીધી. હાર બાદ પંજાબ ચોથા સ્થાને છે. ટીમના 12 મેચમાં 13 પોઈન્ટ્સ છે અને પ્લેઓફમાં પહોંચવા માટે તેને બાકીની બંને મેચ જીતવી પડશે. બીજી તરફ મુંબઈ પહેલાથી જ ટૂર્નામેન્ટમાંથી બહાર થઈ ચૂકી છે, પરંતુ તેણે પંજાબનું સમીકરણ બગાડી દીધું. મુંબઈના 12 મેચમાં 8 પોઈન્ટ્સ છે અને ટીમ નવમા સ્થાને છે. ઇકાના સ્ટેડિયમમાં આજે ચેન્નઈ સુપર કિંગ્સ માટે જીત જરૂરી છે. ટીમનો સામનો ટૂર્નામેન્ટમાંથી બહાર થઈ ચૂકેલી લખનઉ સામે થશે. પોઈન્ટ્સ ટેબલની વર્તમાન સ્થિતિ… પંજાબ સતત 5મી મેચ હારી પંજાબ કિંગ્સ સતત પાંચમી હાર બાદ મુશ્કેલીમાં મુકાઈ ગઈ છે. ટીમે સિઝનની શરૂઆત 6 જીત સાથે કરી હતી. પ્લેઓફની આશા જાળવી રાખવા માટે તેને હવે બંને મેચ જીતવી પડશે. પંજાબની આગામી મેચો બેંગલુરુ અને લખનઉ સામે છે. મુંબઈ ઈન્ડિયન્સે સિઝનની ચોથી જીત નોંધાવી. ટીમની આગામી મેચો કોલકાતા અને રાજસ્થાન સામે છે. ચેન્નઈ માટે દરેક મેચ મહત્વની ચેન્નઈ સુપર કિંગ્સ આજે લખનઉ સુપર જાયન્ટ્સ સામે મેદાનમાં ઉતરશે. ટીમ સતત 3 મેચ જીતીને પાંચમા સ્થાને પહોંચી ગઈ છે. ચેન્નઈના 11 મેચમાં 12 પોઈન્ટ્સ છે. પ્લેઓફની આશા જાળવી રાખવા માટે CSKને તેની ત્રણેય મેચ જીતવી પડશે. ટીમની મેચો લખનઉ, હૈદરાબાદ અને ગુજરાત સામે છે. આગામી મેચ હારવા પર તેની રાહ મુશ્કેલ બની જશે. હૈદરાબાદ ત્રીજા સ્થાને પહોંચી પંજાબની હારનો ફાયદો સનરાઇઝર્સ હૈદરાબાદને મળ્યો છે. ટીમ 14 પોઈન્ટ્સ સાથે ત્રીજા સ્થાને છે. તેનો નેટ રનરેટ +0.331 છે. હૈદરાબાદને હવે ચેન્નઈ અને બેંગલુરુ સામે રમવાનું છે. પ્લેઓફમાં સ્થાન લગભગ પાકું કરવા માટે ટીમને ઓછામાં ઓછી એક જીતની જરૂર છે. બેંગલુરુ-ગુજરાત મજબૂત સ્થિતિમાં રોયલ ચેલેન્જર્સ બેંગલુરુ અને ગુજરાત ટાઇટન્સ 16-16 પોઈન્ટ્સ સાથે પહેલા અને બીજા સ્થાને છે. બંને ટીમોનું પ્લેઓફ રમવું લગભગ નિશ્ચિત માનવામાં આવી રહ્યું છે. ટીમોને હવે એક-એક જીતની જરૂર છે. RCBનો નેટ રનરેટ (+1.053) લીગમાં સૌથી સારો છે. બેંગલુરુના મુકાબલા પંજાબ અને હૈદરાબાદ સામે છે, જ્યારે ગુજરાતને કોલકાતા અને ચેન્નઈ સામે રમવાનું છે. રાજસ્થાન હજુ પણ રેસમાં રાજસ્થાન રોયલ્સ 12 પોઈન્ટ્સ સાથે પ્લેઓફની રેસમાં ટકી રહી છે. જોકે ટીમ છેલ્લી 7માંથી 5 મેચ હારી ચૂકી છે. રાજસ્થાનને હવે દિલ્હી, લખનઉ અને મુંબઈ સામે રમવાનું છે. ટોપ-4માં પહોંચવા માટે તેને ત્રણેય મેચ જીતવી પડશે. કોલકાતા અને દિલ્હીનો માર્ગ કઠિન કોલકાતા નાઈટ રાઈડર્સ 11 મેચમાં 9 પોઈન્ટ્સ સાથે આઠમા સ્થાને છે. પ્લેઓફની આશા જાળવી રાખવા માટે તેને પોતાની ત્રણેય મેચ જીતવી પડશે. કોલકાતાની આગામી મેચો ગુજરાત, મુંબઈ અને દિલ્હી સામે છે. દિલ્હી કેપિટલ્સની સ્થિતિ પણ નબળી છે. ટીમના 12 મેચમાં 10 પોઈન્ટ્સ છે અને તેનો નેટ રનરેટ (-0.993) લીગમાં સૌથી ખરાબ છે. દિલ્હીને પોતાની બંને મેચ મોટા અંતરથી જીતવી પડશે. સાથે જ બીજી ટીમોના પરિણામો પર નિર્ભર રહેવું પડશે. ટુર્નામેન્ટના ટોચના ખેલાડીઓ… ઓરેન્જ કેપમાં કોઈ ફેરફાર નહીં પંજાબ-મુંબઈ મેચ પછી ઓરેન્જ કેપના ટોપ-3 પોઝિશનમાં કોઈ ફેરફાર થયો નથી. સનરાઇઝર્સ હૈદરાબાદના હેનરિક ક્લાસેન 508 રન સાથે ટોચ પર યથાવત છે, જ્યારે ગુજરાત ટાઇટન્સના સાઈ સુદર્શન 501 રન સાથે બીજા સ્થાને છે. વિરાટ કોહલી 12 મેચમાં 484 રન બનાવીને ત્રીજા નંબર પર છે. ભુવનેશ્વર 22 વિકેટ સાથે પર્પલ કેપ હોલ્ડર બેંગલુરુના ફાસ્ટ બોલર ભુવનેશ્વર કુમાર IPL 2026માં સૌથી વધુ વિકેટ લેનાર બોલર બન્યો છે. તેણે 12 મેચમાં 22 વિકેટ લીધી છે. ગુજરાતના કાગીસો રબાડા 21 વિકેટ સાથે બીજા સ્થાને છે. ચેન્નઈના અંશુલ કંબોજ 19 વિકેટ સાથે ત્રીજા સ્થાને છે. ————————————————— IPL સંબંધિત આ સમાચાર પણ વાંચો… IPL-પંજાબ સતત 5મી મેચ હાર્યું, મુંબઈ 6 વિકેટે જીત્યું મુંબઈ ઈન્ડિયન્સે રોમાંચક મેચમાં પંજાબ કિંગ્સને 6 વિકેટથી હરાવ્યું છે. મુંબઈને છેલ્લી ઓવરમાં જીતવા માટે 15 રન જોઈતા હતા, જે ટીમે ચેઝ કરી લીધા. જીતના હીરો તિલક વર્મા રહ્યો, જેણે અણનમ 75 રનની મેચ વિનિંગ ઇનિંગ રમી. વાંચો પૂરા સમાચાર