અજિંક્ય રહાણેની કેપ્ટનશીપમાં KKRની આ સીઝન અત્યાર સુધી નિરાશાજનક રહી છે. ગયા વર્ષે ટીમ તેના નેતૃત્વમાં આઠમા નંબરે રહી હતી, ત્યારબાદ તેને ફરીથી કેપ્ટન બનાવવા પર સવાલો ઉઠ્યા હતા. આ સીઝનમાં પણ KKRને પહેલી જીત માટે સાતમી મેચ સુધી રાહ જોવી પડી હતી. ખોટી ટીમ પસંદગી અને બેટિંગ ઓર્ડરમાં સતત ફેરફારના કારણે ટીમ ક્યારેય સેટ થયેલી જોવા મળી નથી.

રાજસ્થાન રોયલ્સ સામે 19 એપ્રિલે મળેલી જીત પછી KKRએ સતત ચાર મેચ જીતી હતી. પરંતુ RCB સામેની ગત મેચમાં નબળી ફિલ્ડિંગ અને વિરાટ કોહલીની બેટિંગના કારણે તેની વિજયી કૂચ અટકી ગઈ હતી. હવે KKR પાસે ત્રણ મેચ બાકી છે. ટીમ ત્રણેય મેચ જીતીને પણ મહત્તમ 15 પોઇન્ટ્સ સુધી પહોંચી શકશે. એવામાં પ્લેઑફ માટે તેને બીજી ટીમના પરિણામો પર પણ નિર્ભર રહેવું પડશે.

સ્પિનર વરુણ ચક્રવર્તીના પરત ફરવાથી કોલકાતાને રાહત

KKRનો સ્ટાર સ્પિનર વરુણ ચક્રવર્તી ઈજા બાદ પરત ફરી શકે છે. RCB સામેની મેચમાં ડાબા પગમાં ફ્રેક્ચરને કારણે તે રમી શક્યો નહોતો, જેની અસર ટીમ પર પડી હતી. આ સીઝનમાં કોલકાતાની બેટિંગમાં સાતત્યનો અભાવ જોવા મળ્યો છે. સૌરવ ગાંગુલીએ રિંકુ સિંહને બેટિંગ ઓર્ડરમાં નીચે મોકલવા પર સવાલો ઉઠાવ્યા છે. જોકે, અંગક્રિશ રઘુવંશી અને વાઇસ-કેપ્ટન રિંકુ સિંહ ટીમ માટે પોઝિટિવ રહ્યો છે. અંગકૃષે 11 મેચમાં 139.34ની સ્ટ્રાઈક રેટથી 340 રન બનાવ્યા છે, જ્યારે રિંકુએ 148.95ની સ્ટ્રાઈક રેટથી 286 રન બનાવ્યા છે. ગુજરાત સામે આ બંને પર મોટી જવાબદારી રહેશે.

શાનદાર ફોર્મમાં ગુજરાત, સાઈ સુદર્શન ઓરેન્જ કેપની રેસમાં

શુભમન ગિલની આગેવાનીમાં ગુજરાત ટાઈટન્સ અત્યારે સૌથી સંતુલિત ટીમમાંની એક દેખાઈ રહી છે. ટીમ સતત પાંચ મેચ જીતીને પોઇન્ટ્સ ટેબલમાં ટોપ પર ચાલી રહેલી RCBની બરાબરી પર પહોંચી ગઈ છે. ગુજરાતની સફળતા પાછળ તેનો મજબૂત બોલિંગ એટેક છે, જેમાં કાગીસો રબાડા, જેસન હોલ્ડર અને રાશિદ ખાન સતત સારું પ્રદર્શન કરી રહ્યા છે. રબાડા 12 મેચમાં 21 વિકેટ સાથે ટીમનો ટૉપ વિકેટ ટેકર છે.

ઓપનર સાઈ સુદર્શન શાનદાર ફોર્મમાં છે. ગયા વર્ષે 759 રન બનાવીને ઓરેન્જ કેપ જીતનાર સુદર્શન આ સીઝનમાં 501 રન બનાવી ચૂક્યો છે અને સૌથી વધુ રન બનાવનાર હેનરિક ક્લાસેનથી માત્ર 7 રન પાછળ છે. કેપ્ટન શુભમન ગિલ પણ શાનદાર લયમાં છે, જેનાથી ગુજરાતનો ટૉપ ઓર્ડર ખતરનાક દેખાઈ રહ્યો છે.

ઈડન ગાર્ડન્સની પીચ પર સ્પિનર્સની ભૂમિકા મહત્વની રહેશે

ઈડન ગાર્ડન્સની પીચ આ સીઝનમાં સ્પિનર્સ માટે મદદરૂપ રહી છે, જોકે અહીં બેટર્સને પણ સારો સપોર્ટ મળે છે. પીચ પર સારો બાઉન્સ અને ઝડપી આઉટફિલ્ડ હોવાને કારણે ચોગ્ગા-છગ્ગા વધુ લાગે છે. શરૂઆતમાં ઝડપી બોલરો અને મિડલ ઓવર્સમાં સ્પિનર્સને મદદ મળી શકે છે. અહીં અત્યાર સુધી 104 IPL મેચ રમાઈ છે. 43 મેચ પહેલા બેટિંગ કરનાર અને 59 મેચ ચેઝ કરનાર ટીમે જીતી છે.

વરસાદની આશંકા

કોલકાતામાં આજનું હવામાન ગરમ અને ભેજવાળું રહેવાનું અનુમાન છે. દિવસ દરમિયાન તડકો અને સાંજે હળવો વરસાદ કે ગાજવીજ સાથે ઝાપટાં પડી શકે છે. મહત્તમ તાપમાન 36 થી 37 ડિગ્રીની વચ્ચે રહી શકે છે. દક્ષિણ દિશાથી આશરે 12 કિમી/કલાકની ઝડપે પવન ફૂંકાશે.

બન્ને ટીમની પ્લેઇંગ-12

કોલકાતા નાઈટ રાઈડર્સ (KKR): અજિંક્ય રહાણે (કેપ્ટન), ફિન એલન, અંગક્રિશ રઘુવંશી (વિકેટકીપર), કેમરૂન ગ્રીન, રોવમેન પોવેલ, મનીષ પાંડે, રિંકુ સિંહ, સુનીલ નારાયણ, અનુકૂલ રોય, કાર્તિક ત્યાગી, વૈભવ અરોરા, મનીષ પાંડે.

ગુજરાત ટાઇટન્સ (GT): શુભમન ગિલ (કેપ્ટન), સાઈ સુદર્શન, જોસ બટલર (વિકેટકીપર), વોશિંગ્ટન સુંદર, નિશાંત સિંધુ, જેસન હોલ્ડર, રાહુલ તેવતિયા, રાશિદ ખાન, અરશદ ખાન, કાગીસો રબાડા, મોહમ્મદ સિરાજ, પ્રસિદ્ધ ક્રિષ્ના.

દિવ્ય ભાસ્કરને Google પર મનપસંદ સોર્સ બનાવો