સિંગર અને કમ્પોઝર અદનાન સામીએ અરિજિત સિંહના પ્લેબેક સિંગિંગમાંથી સંન્યાસ લેવાના નિર્ણયને સમર્થન આપ્યું છે. અદનાને કહ્યું કે અરિજિતના આ પગલાનું સન્માન થવું જોઈએ અને તેના પર કોઈ પણ પ્રકારની અટકળો ન લગાવવી જોઈએ. અરિજિતે આ જ વર્ષે સોશિયલ મીડિયા પર અચાનક સંન્યાસની જાહેરાત કરીને ફિલ્મ ઇન્ડસ્ટ્રી અને ચાહકોને ચોંકાવી દીધા હતા. અદનાને કહ્યું- અરિજિતનો નિર્ણય ઉતાવળિયો નથી
ન્યૂઝ એજન્સી પીટીઆઈ (PTI) ને આપેલા એક ઇન્ટરવ્યુમાં 54 વર્ષીય અદનાન સામીએ કહ્યું, અરિજિતે પ્લેબેક સિંગિંગમાંથી સંન્યાસ લેવાનો નિર્ણય પૂરા હોશમાં કર્યો છે. આપણે તેના આ નિર્ણયનું સન્માન કરવું જોઈએ. આ કોઈ ઉતાવળિયો નિર્ણય નથી, પરંતુ તેની પાછળ ઊંડી વિચારસરણી હશે. અદનાને આ વાત જી મ્યુઝિક કંપની હેઠળ રિલીઝ થયેલા તેના નવા સિંગલ ‘લિપસ્ટિક લગા કે, નજર ઉતાર લે’ના લોન્ચ દરમિયાન કહી. કારણ જણાવવા માટે અરિજિત બંધાયેલ નથી
અદનાને આગળ કહ્યું કે અરજીત માટે જનતાને પોતાનું કારણ જણાવવું બિલકુલ જરૂરી નથી. તેણે કહ્યું, તેની પાછળ ચોક્કસ કોઈ મોટું કારણ હશે, જેને તે પોતે વધુ સારી રીતે જાણે છે. દુનિયાને તેને તરત જ જણાવવાની કોઈ જરૂર નથી. સમય આવ્યે બધાને ખબર પડી જ જશે. આ તેનું જીવન છે, જ્યારે તે સહજ અનુભવશે, પોતે કારણ શેર કરશે. ત્યાં સુધી આપણે તેને પર્સનલ સ્પેસ આપવી જોઈએ. એક નજર અરિજિત સિંહના કરિયર પર 25 એપ્રિલ 1987ના રોજ અરિજિત સિંહનો જન્મ પશ્ચિમ બંગાળના જિયાગંજમાં થયો હતો. તેની માતા શાસ્ત્રીય ગાયિકા હતા. બાળપણથી જ તેની રુચિ ગાયકીમાં હતી. શાસ્ત્રીય સંગીત શીખ્યા પછી અરિજિત સિંહે 18 વર્ષની ઉંમરે વર્ષ 2005માં સિંગિંગ રિયાલિટી શો ‘ફેમ ગુરુકુલ’માં ભાગ લીધો હતો. અરિજિત આ શો જીતી શક્યા ન હતા, જોકે તેમના પર્ફોર્મન્સથી પ્રભાવિત થઈને સંજય લીલા ભણસાલીએ તેમને ફિલ્મ સાવરિયાનું ગીત ‘યૂં શબનમી’ ઓફર કર્યું હતું. અરિજિતે આ ગીત ગાયું હતું, જોકે કેટલાક ફેરફારોને કારણે તે ગીતમાંથી સિંગરને બદલી દેવામાં આવ્યા હતા. આગળ તેણે બેકગ્રાઉન્ડ સિંગર તરીકે કામ કર્યું. ગોલમાલ 3, ક્રૂક, એક્શન રીપ્લે જેવી ફિલ્મોમાં મ્યુઝિક કોલેબોરેશન પછી અરિજિત સિંહે મર્ડર 2 ના ગીત ‘ફિર મોહબ્બત કરને ચલા હૈ’ થી પ્લેબેક સિંગર તરીકે ડેબ્યૂ કર્યું. આ ગીતની લોકપ્રિયતા પછી તેને એજન્ટ વિનોદનું ગીત ‘રાબતા’ મળ્યું. આ ગીત પણ હિટ રહ્યું અને અરિજિતે સમય જતાં બેસ્ટ સોન્ગ આપીને સ્ટારડમ હાંસલ કર્યું. અરિજિત સિંહે પોતાની મ્યુઝિકલ કારકિર્દીમાં 532 હિન્દી, 144 બંગાળી અને 25 તેલુગુ સહિત અનેક ભાષાઓમાં 700થી વધુ ગીતો ગાયા છે. તે 2 નેશનલ એવોર્ડ, 8 ફિલ્મફેર સહિત કુલ 122 એવોર્ડ જીતી ચૂક્યો છે. અરિજિત સિંહને પહેલો નેશનલ એવોર્ડ વર્ષ 2018માં પદ્માવતના ગીત બિનતે દિલ માટે અને બીજો નેશનલ એવોર્ડ 2022માં ફિલ્મ બ્રહ્માસ્ત્રના ગીત કેસરિયા માટે મળ્યો છે. વર્ષ 2015માં અરિજિત સિંહને પદ્મશ્રીથી સન્માનિત કરવામાં આવ્યો છે.