મુંબઈ ક્રાઈમ બ્રાન્ચના પ્રોપર્ટી સેલે બોલિવૂડ એક્ટર જાવેદ જાફરીની પત્ની હબીબા જાફરી સાથે થયેલી 16.24 કરોડ રૂપિયાની છેતરપિંડીના કેસમાં મુખ્ય આરોપીની ધરપકડ કરી છે.

આ હાઈ-પ્રોફાઈલ કેસમાં બીએમસી (BMC)ના આસિસ્ટન્ટ કમિશનર મહેશ પાટીલ સહિત 6 લોકો વિરુદ્ધ કેસ નોંધવામાં આવ્યો છે. આરોપીઓએ ટેક્સ સેટલમેન્ટ અને ઇન્વેસ્ટમેન્ટના નામે જાફરી પરિવારને પોતાની જાળમાં ફસાવ્યો.

બીએમસી નોટિસથી થઈ છેતરપિંડીની શરૂઆત

છેતરપિંડીની શરૂઆત એપ્રિલ 2024માં થઈ. હબીબા જાફરીને તેના અંધેરી સ્થિત બંગલાનો પ્રોપર્ટી ટેક્સ ભરવા માટે બીએમસી તરફથી એક નોટિસ મળી. આ દરમિયાન એક પરિચિત દ્વારા તેની મુલાકાત બીએમસી જી-સાઉથ વોર્ડના આસિસ્ટન્ટ કમિશનર મહેશ પાટીલ સાથે થઈ.

પાટીલે પહેલા ટેક્સ સેટલમેન્ટનો ભરોસો આપ્યો અને પછી તેને બાંદ્રા (પશ્ચિમ)ના ‘ન્યૂ કમલકુંજ’ કોમર્શિયલ પ્રોજેક્ટમાં રોકાણ કરવાની લાલચ આપી.

જાવેદ અને હબીબાને ત્રણ બાળકો છે. દીકરી અલાવિયા, દીકરા મીઝાન અને અબ્બાસ.

વિશ્વાસ જીતવા માટે બનાવટી રિપોર્ટ્સ બતાવ્યા

આસિસ્ટન્ટ કમિશનરે હબીબાની મુલાકાત વેપારી નિશિત પટેલ સાથે કરાવી. નિશિતે પોતાને મોટા બિલ્ડરોનો પાર્ટનર ગણાવ્યો અને દાવો કર્યો કે, આ પ્રોજેક્ટમાં પહેલાથી 150 કરોડ રૂપિયાનું રોકાણ થઈ ચૂક્યું છે.

જાફરી પરિવારનો વિશ્વાસ જીતવા માટે આરોપીઓએ ઘરે જઈને નકશા, બનાવટી લેટરહેડ અને વિદેશી બેંકો સાથે પ્રી-લીઝ એગ્રીમેન્ટના કાગળો બતાવ્યા. તેમણે વચન આપ્યું કે, ડિસેમ્બર 2025 સુધીમાં તેમને કોમર્શિયલ સ્પેસનો કબજો મળી જશે.

ઘરે બનાવટી રજિસ્ટ્રી કરી

ષડયંત્રને સાચું બતાવવા માટે આરોપી રૂપેશ, દેવેન્દ્ર પડવલ અને તેના સાથીઓ સરકારી મશીનો જેવા ઉપકરણો લઈને જાફરી પરિવારના ઘરે પહોંચ્યા. તેમણે ઘરે જ હબીબાના ફોટો, ફિંગરપ્રિન્ટ અને હસ્તાક્ષર લીધા અને દાવો કર્યો કે સરકારી રજિસ્ટ્રીની પ્રક્રિયા પૂર્ણ થઈ ગઈ છે.

બાદમાં તેમને દસ્તાવેજોની ફોટોકોપી પકડાવી દેવામાં આવી. જ્યારે અસલી કાગળો માંગવામાં આવ્યા, ત્યારે બિલ્ડર પાસે હોવાનું બહાનું બનાવવામાં આવ્યું.

હબીબા અને જાવેદે 1991માં લગ્ન કર્યાં હતાં. હબીબા લાઇમલાઇટથી દૂર રહે છે.

ફ્લેટ અને બંગલો વેચીને 16.24 કરોડ ભેગા કર્યા

આરોપીઓની જાળમાં આવીને જાવેદ જાફરી, તેની પત્ની હબીબા અને ભાઈ નાવેદ જાફરીએ પોતાની સંપત્તિઓ વેચીને પૈસા એકઠા કર્યા. પોલીસના જણાવ્યા અનુસાર, આ રકમ પૂજન ટેકનોલોજીસ, ઉદિત ટ્રેડર્સ અને એશિયન ફૂડ જેવી શેલ કંપનીઓના ખાતાઓમાં ટ્રાન્સફર કરવામાં આવી. કુલ 16.24 કરોડની છેતરપિંડીમાં રોકડ ઉપરાંત વિદેશી ચલણ અને એક લક્ઝરી ઘડિયાળ પણ સામેલ છે.

નિશિત 19 મે સુધી પોલીસ રિમાન્ડ પર

છેતરપિંડીનો અહેસાસ થતાં હબીબા જાફરીએ ખાર પોલીસ સ્ટેશનમાં ફરિયાદ નોંધાવી. તપાસ બાદ ક્રાઈમ બ્રાન્ચે નિશિત પટેલને પકડી લીધો.

નિશિતે પૂછપરછમાં નકલી દસ્તાવેજો તૈયાર કરવાની વાત કબૂલી લીધી છે. કોર્ટે તેને 19 મે સુધી પોલીસ રિમાન્ડ પર મોકલ્યો છે. પોલીસ હવે ફરાર આસિસ્ટન્ટ કમિશનર મહેશ પાટીલ અને અન્ય આરોપીઓની શોધ કરી રહી છે.

દિવ્ય ભાસ્કરને Google પર મનપસંદ સોર્સ બનાવો