ભારતના 4 દિવસના પ્રવાસે આવેલા અમેરિકાના વિદેશ મંત્રી માર્કો રુબિયોએ આજે કોલકાતામાં મિશનરીઝ ઓફ ચેરિટીની મુલાકાત લીધી. અહીં તેમણે મધર ટેરેસાને શ્રદ્ધાંજલિ આપી. અહીં તેમણે કહ્યું- આવી ક્ષણો આપણને યાદ અપાવે છે કે અમેરિકા અને ભારતની ભાગીદારી માત્ર મજબૂત નીતિઓ પર જ નહીં, પરંતુ સાંસ્કૃતિક મૂલ્યો અને નિસ્વાર્થ સેવા ભાવના પર પણ આધારિત છે, જે સીમાઓથી પર છે. ત્યારબાદ રુબિયો નવી દિલ્હી જવા રવાના થયા, જ્યાં તેઓ પીએમ મોદી સાથે મુલાકાત કરશે. આવતીકાલે અમેરિકી વિદેશ મંત્રી માર્કો રુબિયો વિદેશ મંત્રી એસ. જયશંકર સાથે દ્વિપક્ષીય વાટાઘાટો કરશે. માર્કો રુબિયો નવી દિલ્હીમાં અમેરિકી દૂતાવાસ દ્વારા આયોજિત સ્વતંત્રતા દિવસ સમારોહમાં પણ ભાગ લેશે. સોમવારે તેઓ આગ્રા અને જયપુરની મુલાકાત લેશે. ત્યારબાદ મંગળવારે નવી દિલ્હીમાં યોજાનારી ક્વાડ દેશોના વિદેશ મંત્રીઓની બેઠકમાં ભાગ લેશે. ક્વાડમાં ભારત-જાપાન-અમેરિકા અને ઓસ્ટ્રેલિયા સામેલ ક્વાડ ગ્રુપમાં ભારત, અમેરિકા, જાપાન અને ઓસ્ટ્રેલિયાનો સમાવેશ થાય છે. આ વખતે બેઠકની યજમાની ભારત કરી રહ્યું છે. આ બેઠકમાં ઓસ્ટ્રેલિયાના વિદેશ મંત્રી પેની વોંગ અને જાપાનના વિદેશ મંત્રી તોશિમિત્સુ મોતેગી પણ સામેલ થશે. વિદેશ મંત્રાલય અનુસાર, બેઠકમાં ઓપન અને ફ્રી ઇન્ડો-પેસિફિક રિજનને મજબૂત બનાવવા પર ચર્ચા થશે. સાથે જ ડિફેન્સ સહયોગ, સપ્લાય ચેઇન, નવી ટેકનોલોજી અને પ્રાદેશિક સુરક્ષા જેવા મુદ્દાઓ પર પણ વિચાર કરવામાં આવશે. નિષ્ણાતોનું માનવું છે કે ચીનના વધતા પ્રભાવને જોતા ક્વાડ દેશો વચ્ચે સહયોગ સતત વધી રહ્યો છે. એનર્જી સિક્યોરિટી મોટો મુદ્દો રહેશે માર્કો રુબિયોની મુલાકાતમાં ઊર્જા સુરક્ષા એક મોટો મુદ્દો રહેવાનો છે. ભારત હાલમાં રશિયા પાસેથી મોટા પ્રમાણમાં સસ્તું ક્રૂડ તેલ ખરીદી રહ્યું છે. જ્યારે અમેરિકા ઈચ્છે છે કે ભારત અમેરિકી તેલ અને LNG ગેસની આયાત પણ વધારે. મિડલ ઈસ્ટમાં સતત ચાલી રહેલા તણાવને કારણે દુનિયાભરમાં ઊર્જા સપ્લાયને અસર થઈ રહી છે. આવા સંજોગોમાં ભારત પોતાના માટે ઘણા દેશો પાસેથી ઊર્જા પુરવઠો સુનિશ્ચિત કરવા માંગે છે જેથી ભવિષ્યમાં કોઈ સંકટની અસર ઓછી થાય. ભારત અને અમેરિકા વચ્ચે છેલ્લા કેટલાક સમયમાં ટેરિફ અને વ્યાપારી પ્રતિબંધોને લઈને મતભેદ જોવા મળ્યા હતા. હવે બંને દેશો સંબંધોને ફરીથી મજબૂત કરવાનો પ્રયાસ કરી રહ્યા છે. એવું માનવામાં આવે છે કે આ મુલાકાત દરમિયાન વેપાર કરારો, રોકાણ અને મહત્વપૂર્ણ ખનિજોની સપ્લાય ચેઇન પર વાતચીત થઈ શકે છે. સેમિકન્ડક્ટર, બેટરી ઉત્પાદન, આર્ટિફિશિયલ ઇન્ટેલિજન્સ અને આધુનિક ટેકનીકોમાં સહયોગ વધારવા પર પણ ચર્ચા થવાની અપેક્ષા છે. ડિફેન્સ ભાગીદારી પણ સતત વધી રહી છે ભારત અને અમેરિકા વચ્ચે ડિફેન્સ ભાગીદારી છેલ્લા કેટલાક વર્ષોમાં ઘણી મજબૂત બની છે. ભારતીય સેના અને વાયુસેના પહેલાથી જ અમેરિકાના ઘણા આધુનિક ડિફેન્સ ઇક્વિપમેન્ટનો ઉપયોગ કરી રહી છે. આમાં P-8 પોસાઇડન વિમાન, MQ-9B સ્કાયગાર્ડિયન ડ્રોન, M-777 હોવિત્ઝર તોપ અને C-17 ગ્લોબમાસ્ટર-3 ટ્રાન્સપોર્ટ વિમાનનો સમાવેશ થાય છે. હવે બંને દેશો ડિફેન્સ ઇક્વિપમેન્ટના સંયુક્ત ઉત્પાદન અને નવી સૈન્ય તકનીકો પર પણ સાથે કામ કરવા માંગે છે. માર્કો રુબિયોને અમેરિકામાં ચીન વિરુદ્ધ કડક વલણ અપનાવનારા નેતાઓમાં ગણવામાં આવે છે. તેઓ લાંબા સમયથી ભારત સાથે મજબૂત વ્યૂહાત્મક ભાગીદારીના સમર્થક રહ્યા છે. નિષ્ણાતોનું માનવું છે કે તેમની આ મુલાકાત એ વાતનો સંકેત છે કે અમેરિકા, ભારતને એશિયામાં પોતાનો મહત્વપૂર્ણ વ્યૂહાત્મક ભાગીદાર માને છે.