ચીનના શાંક્સી પ્રાંતમાં એક કોલસાની ખાણમાં થયેલા ભયાનક વિસ્ફોટમાં ઓછામાં ઓછા 90 લોકોના મોત થયા. આ દુર્ઘટના ચીનમાં છેલ્લા એક દાયકાની સૌથી મોટી કોલસા ખાણ દુર્ઘટના માનવામાં આવે છે.

સરકારી સમાચાર એજન્સી શિન્હુઆ અનુસાર, વિસ્ફોટ શુક્રવારે શાંક્સી પ્રાંતના કિનયુઆન કાઉન્ટીમાં થયો હતો. આ વિસ્તાર બેઇજિંગથી લગભગ 520 કિલોમીટર દક્ષિણ-પશ્ચિમમાં આવેલો છે. દુર્ઘટના પહેલા ખાણમાં કાર્બન મોનોક્સાઇડ ગેસનું એલર્ટ જાહેર કરવામાં આવ્યું હતું. તેના થોડા સમય પછી જોરદાર વિસ્ફોટ થયો.

વિસ્ફોટ થયો, તે સમયે ખાણની અંદર 247 મજૂરો કામ કરી રહ્યા હતા. હજુ એ સ્પષ્ટ નથી કે કેટલા લોકો હજુ પણ અંદર ફસાયેલા છે. રાહત અને બચાવ અભિયાન ચાલુ છે.

રસપ્રદ વાત એ છે કે દુર્ઘટનાના તરત જ પછી શિન્હુઆએ પ્રારંભિક રિપોર્ટમાં માત્ર આઠ લોકોના મોતની જાણકારી આપી હતી અને કહ્યું હતું કે 200થી વધુ મજૂરોને સુરક્ષિત બહાર કાઢી લેવામાં આવ્યા છે. પરંતુ બાદમાં અચાનક મૃતકોની સંખ્યા વધીને 82 જણાવવામાં આવી. સરકારી મીડિયાએ એ સ્પષ્ટ કર્યું નથી કે આંકડો આટલી ઝડપથી કેવી રીતે વધ્યો.

ચીનના રાષ્ટ્રપતિ શી જિનપિંગે ગુમ થયેલા લોકોને બચાવવા માટે પૂરી તાકાતથી ઓપરેશન ચલાવવાના આદેશ આપ્યા છે. તેમણે દુર્ઘટનાની સંપૂર્ણ તપાસ કરાવવા અને જવાબદાર લોકો વિરુદ્ધ કાયદા હેઠળ કાર્યવાહી કરવાની વાત કહી છે.

દુર્ઘટના સંબંધિત તસવીરો…

ચીનમાં અકસ્માત સ્થળે પહોંચી બચાવકર્મીઓની ટીમ.

ઘાયલોને એમ્બ્યુલન્સ તરફ લઈ જતા બચાવ દળના લોકો.

અકસ્માત સ્થળે મોટી સંખ્યામાં એમ્બ્યુલન્સ મોકલવામાં આવી છે.

કાર્બન મોનોક્સાઇડ ગેસથી વિસ્ફોટની આશંકા

સરકારી સમાચાર એજન્સી શિન્હુઆ અનુસાર, ખાણની અંદર કાર્બન મોનોક્સાઇડ ગેસનું સ્તર ઘણું વધી ગયું હતું. એવું માનવામાં આવે છે કે આ જ કારણે વિસ્ફોટ થયો. હાલમાં દુર્ઘટનાના સાચા કારણની તપાસ કરવામાં આવી રહી છે.

શાંક્સી પ્રાંત ચીનમાં કોલસા ઉત્પાદનનું મોટું કેન્દ્ર માનવામાં આવે છે. પરંતુ અહીંની ખાણોનો સુરક્ષા રેકોર્ડ ઘણો ખરાબ રહ્યો છે. છેલ્લા કેટલાક વર્ષોમાં અહીં આવા ઘણા મોટા અકસ્માતો થયા છે.

ચીનમાં હજુ પણ ઊર્જા માટે મોટા પાયે કોલસાનો ઉપયોગ થાય છે. દેશની અડધાથી વધુ ઊર્જા જરૂરિયાતો કોલસાથી પૂરી થાય છે.

શી જિનપિંગે કહ્યું- અકસ્માતની સંપૂર્ણ તપાસ કરવામાં આવે

શી જિનપિંગે ચીનના રાજ્ય પરિષદના સુરક્ષા વિભાગને સ્થાનિક અધિકારીઓને તેમની જવાબદારીઓ યાદ કરાવવાનો પણ નિર્દેશ આપ્યો. તેમણે નિર્દેશ આપ્યો કે દરેક અકસ્માતની સંપૂર્ણ તપાસ કરવામાં આવે અને ભવિષ્યમાં બનતી ઘટનાઓને કોઈપણ કિંમતે અટકાવવામાં આવે.

જ્યારે, ચીનના વડાપ્રધાન લી કેકિયાંગે પણ કહ્યું કે ગુમ થયેલા કામદારોને શોધવા માટે તમામ પ્રયાસો કરવા જોઈએ. તેમણે અકસ્માતના કારણની ઝડપી તપાસ અને જવાબદારો સામે કાર્યવાહી કરવાની હાકલ કરી હતી.

નાયબ વડાપ્રધાન અકસ્માત સ્થળ પર પહોંચ્યા

ચીનના રાજ્ય મીડિયા અનુસાર, નાયબ વડાપ્રધાન ઝાંગ ગુઓકિંગ અને સ્થાનિક વહીવટીતંત્રના વરિષ્ઠ અધિકારીઓ પણ અકસ્માત સ્થળ પર પહોંચ્યા. તેઓ બચાવ અને રાહત કામગીરીનું નિરીક્ષણ કરી રહ્યા છે.

છેલ્લા કેટલાક વર્ષોમાં ચીન દ્વારા ખાણ સલામતીના નિયમો કડક બનાવવામાં આવ્યા હોવા છતાં, ખાણ અકસ્માતો સતત બનતા રહે છે. કોલસાનું ઉત્પાદન વધારવાનું દબાણ અને કેટલાક વિસ્તારોમાં સલામતીના નબળા ધોરણો આના મુખ્ય કારણો હોવાનું માનવામાં આવે છે.

ફેબ્રુઆરી 2023માં, આંતરિક મંગોલિયાના શિનજિયાંગ પ્રદેશમાં એક ઓપનકાસ્ટ ખાણમાં ભૂસ્ખલન થયું હતું, જેમાં 53 કામદારોના મોત થયા હતા.

શાંક્સી પ્રાંતમાં ભૂતકાળમાં મોટા અકસ્માતો થયા છે

શાંક્સી પ્રાંતને ચીનનો સૌથી મોટો કોલસા ઉત્પાદક પ્રદેશ માનવામાં આવે છે. દેશની ઊર્જા જરૂરિયાતોનો નોંધપાત્ર ભાગ તેની ખાણો દ્વારા પૂર્ણ થાય છે. જો કે, સતત ઉત્પાદનના દબાણને કારણે સલામતી અંગે ચિંતાઓ વધી છે.

ગયા મહિને, શાંક્સીના લુલિયાંગ વિસ્તારમાં એક ખાણ દુર્ઘટના બની હતી, જેમાં ચાર કામદારોના મોત થયા હતા. હાલના વિસ્ફોટથી ફરી એકવાર ચીનની ખાણ સલામતી વ્યવસ્થા પર ગંભીર સવાલો ઉભા થયા છે.

ચીનમાં હજુ પણ ઊર્જા માટે કોલસાનો મોટા પાયે ઉપયોગ થાય છે. દેશની અડધાથી વધુ ઉર્જા જરૂરિયાતો કોલસા દ્વારા પૂર્ણ થાય છે.

આ સમાચાર પણ વાંચો…

જિનપિંગે કહ્યું- દુનિયા ફરી જંગલરાજ તરફ વધી રહી છે:બીજિંગમાં પુતિન સાથે બેઠક કરી, કહ્યું- ઈરાન યુદ્ધ રોકવું જરૂરી

ચીનના રાષ્ટ્રપતિ શી જિનપિંગે મિડલ ઈસ્ટમાં ચાલી રહેલા યુદ્ધ અંગે ચેતવણી આપી છે. રોયટર્સ અનુસાર, બીજિંગમાં રશિયાના રાષ્ટ્રપતિ વ્લાદિમીર પુતિન સાથેની બેઠકમાં તેમણે કહ્યું કે દુનિયા ફરી જંગલરાજ તરફ આગળ વધી રહી છે. સંપૂર્ણ સમાચાર વાંચો…

દિવ્ય ભાસ્કરને Google પર મનપસંદ સોર્સ બનાવો