તમિલનાડુના મુખ્યમંત્રી અને સાઉથ સુપરસ્ટાર થલાપતિ વિજયને શુક્રવારે ક્રિકેટર વિરાટ કોહલીનું સહી કરેલું ક્રિકેટ બેટ ભેટમાં આપવામાં આવ્યું છે. MRF કંપનીના ટોચના મેનેજમેન્ટે સચિવાલયમાં મુલાકાત દરમિયાન તેમને આ ભેટ આપી હતી.

વિજયે આ બેટ સાથે તસવીરો પણ પડાવી હતી, જે સોશિયલ મીડિયા પર સામે આવી છે. તસવીરોમાં વિજય મોનોક્રોમ સૂટ અને ખભા પર અંગવસ્ત્રમ પહેરીને બેટ બતાવતા જોવા મળી રહ્યા છે. આ પહેલા તાજેતરમાં જ ફિલ્મ ડિરેક્ટર વેંકટ પ્રભુએ પણ તેમને ‘GOAT’ ફિલ્મમાં ઉપયોગમાં લેવાયેલી એક ખાસ નંબર પ્લેટ ભેટમાં આપી હતી, જેમાં વિજયના મુખ્યમંત્રી બનવાની ભવિષ્યવાણી કરવામાં આવી હતી.

મુખ્યમંત્રી વિજયનો વિરાટ કોહલીએ સાઇન કરેલા બેટ સાથેનો ફોટો.

MRF કંપની દ્વારા સાઉથ સુપરસ્ટારને આ ભેટ આપવામાં આવી.

ડિરેક્ટર વેંકટ પ્રભુએ નંબર પ્લેટ ગિફ્ટ કરી હતી

મુખ્યમંત્રી વિજયને તાજેતરમાં ફિલ્મ ડિરેક્ટર વેંકટ પ્રભુએ પણ એક ખાસ ભેટ આપી હતી. તેમણે વર્ષ 2024માં આવેલી ફિલ્મ ‘ધ ગ્રેટેસ્ટ ઓફ ઓલ ટાઈમ’ (GOAT)માં ઉપયોગમાં લેવાયેલી ગાડીની નંબર પ્લેટને ફ્રેમ કરાવીને વિજયને ગિફ્ટ કરી હતી.

આ નંબર પ્લેટ પર ‘TN 07 CM 2026’ લખેલું હતું, જેને ફિલ્મમાં વિજયના મુખ્યમંત્રી બનવાના સંકેત તરીકે જોવામાં આવ્યું હતું. વિજયના ખરેખર મુખ્યમંત્રી બન્યા પછી સોશિયલ મીડિયા પર પણ આ ક્લિપ ઘણી ચર્ચામાં રહી હતી.

ડિરેક્ટર વેંકટ પ્રભુએ નંબરપ્લેટ ગિફ્ટ કરી.

નંબર પ્લેટ સાથે લખ્યું હતું, ‘વેંકટ પ્રભુ અને ટીમ દ્વારા પહેલું મેનિફેસ્ટેશન.’

બાળ કલાકારથી મુખ્યમંત્રી બનવા સુધીની સફર

ફિલ્મ ડિરેક્ટર એસએ ચંદ્રશેખરના દીકરા વિજયે પોતાની કારકિર્દીની શરૂઆત 1984માં બાળ કલાકાર તરીકે ફિલ્મ ‘વેટ્રી’થી કરી હતી. ત્યારબાદ 1992માં આવેલી ફિલ્મ ‘નાલૈયા તીરપૂ’થી તેમણે લીડ એક્ટર તરીકે ડેબ્યૂ કર્યું. વર્ષ 1996માં આવેલી ‘કોયંબતૂર માપ્પિલ્લઈ’ અને ‘પૂવે ઉનક્કાગા’ તેમની કારકિર્દીની પ્રથમ બ્લોકબસ્ટર ફિલ્મો બની.

વર્ષ 2024માં તેમણે રાજકારણમાં પ્રવેશ કર્યો અને ‘તમિલગા વેત્રી કડગમ’ નામની પાર્ટી બનાવી. ત્યારબાદ વર્ષ 2026ની ચૂંટણીઓમાં જીતીને તેઓ તમિલનાડુના મુખ્યમંત્રી બન્યા.

છેલ્લી ફિલ્મ ‘જન નાયક’ પર વિવાદ ચાલી રહ્યો છે

રાજકારણમાં સંપૂર્ણપણે સક્રિય થાય તે પહેલાં વિજયે એચ. વિનોદના ડિરેક્શનમાં તેની છેલ્લી ફિલ્મ ‘જન નાયકન’ સાઇન કરી હતી. આ ફિલ્મમાં મમિતા બૈજુ, બોબી દેઓલ અને પૂજા હેગડે મુખ્ય ભૂમિકાઓમાં છે. આ ફિલ્મ જાન્યુઆરીમાં રિલીઝ થવાની હતી, પરંતુ સેન્સર બોર્ડ (CBFC) સાથેના વિવાદ અને સમિતિમાં ફરિયાદને કારણે તેની રિલીઝ ટળી ગઈ.

એપ્રિલમાં આ ફિલ્મ HD ક્વોલિટીમાં ઓનલાઈન લીક પણ થઈ ગઈ હતી, જે બાદ પોલીસે 9 લોકોની ધરપકડ કરી હતી. આ ફિલ્મ હજુ સુધી રિલીઝ થઈ શકી નથી.

‘જન નાયકન’ વિજયની એક્ટર તરીકેની છેલ્લી ફિલ્મ છે. આ પછી તેણે એક્ટિંગમાંથી સંન્યાસ લઈ લીધો છે.

દિવ્ય ભાસ્કરને Google પર મનપસંદ સોર્સ બનાવો