IPL 2026ના ક્વોલિફાયર-2માં શુક્રવારે ગુજરાત ટાઇટન્સ અને રાજસ્થાન રોયલ્સ આમને-સામને ટકરાશે. આ મેચ જીતનારી ટીમને ફાઈનલની ટિકિટ મળશે, જ્યારે હારનારી ટીમ ટુર્નામેન્ટમાંથી બહાર થઈ જશે.

15 વર્ષના વૈભવ સૂર્યવંશી પર સૌની નજર રહેશે. કારણ કે, તેણે એલિમિનેટરમાં હૈદરાબાદ સામે 12 સિક્સરથી 97 રનની વિસ્ફોટક ઇનિંગ્સ રમી હતી.

બીજી તરફ, આ સીઝનની સૌથી મજબૂત ગુજરાતની બોલિંગ લાઇન-અપ તેમને રોકવાનો પ્રયાસ કરશે. જેમાં કાગીસો રબાડા, મોહમ્મદ સિરાજ, જેસન હોલ્ડર, પ્રસિદ્ધ ક્રિષ્ના અને રાશિદ ખાન જેવા બોલરો સામેલ છે.

તેવામાં સવાલ એ ઊભો થાય છે કે શું રાજસ્થાનને IPL ફાઈનલની ટિકિટ અપાવી શકશે વૈભવ સૂર્યવંશી? જવાબ આ 4 ફેક્ટર્સથી સમજો…

છેલ્લી ટક્કર: 9 મેના રોજ જયપુરમાં ગુજરાત અને રાજસ્થાન વચ્ચે છેલ્લી મેચ રમાઈ હતી. જેમાં મોહમ્મદ સિરાજે શોર્ટ બોલ પર સૂર્યવંશીની વિકેટ લીધી હતી. જ્યારે રબાડા તેની આક્રમક બેટિંગનો શિકાર બન્યો હતો. વૈભવે 16 બોલમાં 3 સિક્સર સહિત 36 રન બનાવ્યા હતા.

જૂનો રેકોર્ડ: વૈભવે ગુજરાત સામે 3 મેચ રમી છે અને એક સદીની મદદથી 233.33ની સ્ટ્રાઇક રેટથી 168 રન બનાવ્યા છે. તેના બેટમાંથી 15 ચોગ્ગા અને 15 સિક્સર આવી ચૂકી છે. તેને મોહમ્મદ સિરાજ, રાશિદ ખાન અને પ્રસિદ્ધ ક્રિષ્નાએ એક-એક વાર આઉટ કર્યો છે.

તાજેતરનું ફોર્મ: વૈભવનું તાજેતરનું ફોર્મ અદ્ભુત છે. તે છેલ્લી 5 ઇનિંગ્સમાં માત્ર એક જ વાર સિંગલ ડિજિટ પર આઉટ થયો છે. બાકીની ચાર ઇનિંગ્સમાં વૈભવે બે ફિફ્ટી ફટકારી છે. તે 250.9ની સ્ટ્રાઇક રેટથી 276 રન બનાવી ચૂક્યો છે. બીજી તરફ, ગુજરાતના 5 બોલરો આ સીઝનમાં ઓછામાં ઓછી 15 વિકેટ લઈ ચૂક્યા છે.

પીચની સ્થિતિ: મહારાજા યાદવેન્દ્ર સિંહ સ્ટેડિયમની પીચ બેટર્સ માટે મદદરૂપ હોય છે. પરંતુ, 2 દિવસ પહેલા 27 મેના રોજ અહીં પેસર્સને મદદ મળી હતી. મેચમાં પડેલી 18 વિકેટોમાંથી 12 વિકેટ પેસર્સને મળી હતી, જ્યારે બે બેટર્સ રનઆઉટ થયા હતા. જોફ્રા આર્ચરે લેન્થ અને સ્પીડના જોરે હૈદરાબાદના ટૉપ ઓર્ડરને ધ્વસ્ત કરી દીધો હતો. જોકે, વૈભવ સામે પેટ કમિન્સની આગેવાનીવાળો પેસ એટેક બેઅસર રહ્યો હતો.

હેડ-ટુ-હેડ

ગુજરાત 7-3થી આગળ, 2022માં ફાઈનલમાં હરાવ્યું હતું

હેડ-ટુ-હેડ રેકોર્ડમાં ગુજરાતનું પલડું ભારે છે. બંને વચ્ચે અત્યાર સુધીમાં 10 મેચ રમાઈ ચૂકી છે, જેમાંથી 7 મેચ ગુજરાત જીત્યું છે, જ્યારે 3 મેચ રાજસ્થાનના નામે રહી છે. આ સીઝનમાં બંને ટીમ બરાબરી પર રહી છે. છેલ્લી મેચ ગુજરાત 77 રનથી જીત્યું હતું. તે પહેલા રાજસ્થાને 6 વિકેટથી જીત મેળવી હતી.

ટૉપ પ્લેયર્સ

રાજસ્થાન સૂર્યવંશી અને આર્ચર પર નિર્ભર

રાજસ્થાન રોયલ્સ હાલમાં ઘણા અંશે વૈભવ સૂર્યવંશી અને જોફ્રા આર્ચર પર નિર્ભર છે. બંને ખેલાડીઓએ એલિમિનેટરમાં ટીમની જીતમાં મહત્વની ભૂમિકા ભજવી હતી. વૈભવ 680 રન સાથે વર્તમાન સીઝનનો ટૉપ સ્કોરર છે. જ્યારે, જોફ્રા આર્ચર 24 વિકેટ સાથે ટીમનો ટૉપ વિકેટ ટેકર છે.

યશસ્વી જયસ્વાલ આ સીઝનમાં સૂર્યવંશીની ચમક સામે ઝાંખો પડતો દેખાયો છે, જ્યારે ધ્રુવ જુરેલે નંબર-3 પર ઉપયોગી ઇનિંગ્સ રમી છે. કેપ્ટન રિયાન પરાગે સ્વીકાર્યું કે સનરાઇઝર્સ સામે ટીમ 260 રન સુધી પહોંચી શકતી હતી, પરંતુ ડેથ ઓવર્સમાં બેટિંગ લાઇન-અપ વેરવિખેર થઈ ગઈ. ટીમ આ નબળાઈને સુધારવા ઇચ્છશે.

સાઈ સુદર્શન પાસે ઓરેન્જ કેપ મેળવવાની તક

ગુજરાત ટાઇટન્સની બેટિંગ મોટાભાગે સાઈ સુદર્શન (652 રન), શુભમન ગિલ (618 રન) અને જોસ બટલર (498 રન) પર નિર્ભર છે. છેલ્લી મેચમાં બેંગલુરુ સામે ટૉપ-3 બેટર્સ જલ્દી આઉટ થયા બાદ ટીમ 162 રન પર ઓલઆઉટ થઈ ગઈ હતી.

ક્વોલિફાયર-1માં બેંગલુરુના બેટર્સે ગુજરાતના બોલરોની જોરદાર ધોલાઈ કરી હતી. તેથી ગુજરાત પોતાની બોલિંગ અને ફિલ્ડિંગના પ્રદર્શનમાં સુધારો કરવા ઇચ્છશે. કાગીસો રબાડા 26 વિકેટ લઈને સીઝનનો ટૉપ વિકેટ ટેકર્સમાં બીજા સ્થાને છે.

પીચ એન્ડ વેધર રિપોર્ટ

મુલ્લાનપુરમાં હાઈ-સ્કોરિંગ મેચની આશા

મુલ્લાનપુરના મહારાજા યાદવેન્દ્ર સિંહ ક્રિકેટ સ્ટેડિયમમાં વધુ એક હાઈ-સ્કોરિંગ મેચની આશા છે. અહીં રમાયેલી છેલ્લી ચારેય મેચમાં 200 રનથી વધુનો સ્કોર બન્યો છે. જેમાં બે વાર ટાર્ગેટ ચેઝ થયો છે, જ્યારે બે વાર સ્કોર ડિફેન્ડ કર્યો છે. છેલ્લી મેચમાં રાજસ્થાને 243 રન બનાવ્યા હતા. જવાબમાં હૈદરાબાદ 196 રન પર ઓલઆઉટ થઈ ગયું હતું. મેચના દિવસે ન્યુ ચંદીગઢનું તાપમાન 23°C થી 37°C સુધી રહી શકે છે. આવામાં ખેલાડીઓએ ગરમી અને અસહ્ય ઉકળાટનો સામનો કરવો પડી શકે છે.

બન્ને ટીમની સંભવિત પ્લેઇંગ-11

ગુજરાત ટાઇટન્સ (GT): શુભમન ગિલ (કેપ્ટન), સાઈ સુદર્શન, જોસ બટલર (વિકેટકીપર), વોશિંગ્ટન સુંદર, નિશાંત સિંધુ, જેસન હોલ્ડર, રાશિદ ખાન, કુલવંત ખેજરોલિયા, કાગીસો રબાડા, મોહમ્મદ સિરાજ અને પ્રસિદ્ધ ક્રિષ્ના.

ઇમ્પેક્ટ પ્લેયર: રાહુલ તેવતિયા.

રાજસ્થાન રોયલ્સ (RR): યશસ્વી જયસ્વાલ, વૈભવ સૂર્યવંશી, ધ્રુવ જુરેલ (વિકેટકીપર), રિયાન પરાગ (કેપ્ટન), ડોનોવન ફરેરા, દાસુન શનાકા, રવીન્દ્ર જાડેજા, જોફ્રા આર્ચર, નાન્દ્રે બર્ગર, યશ રાજ પૂંજા, બ્રિજેશ શર્મા.

ઇમ્પેક્ટ પ્લેયર: સુશાંત મિશ્રા.

દિવ્ય ભાસ્કરને Google પર મનપસંદ સોર્સ બનાવો