મહાનગર ગેસ લિમિટેડ (MGL)એ મુંબઈ અને આસપાસના વિસ્તારોમાં CNG ₹2 પ્રતિ કિલો મોંઘો કર્યો છે. આ સાથે જ ઘરેલું પાઇપ્ડ નેચરલ ગેસ (PNG)ના ભાવ પણ 50 પૈસા પ્રતિ સ્ટાન્ડર્ડ ક્યુબિક મીટર (SCM) વધારી દેવામાં આવ્યા છે. નવા દરો 29-30 મેની મોડીરાતથી લાગુ પડી ગયા છે.

અહીં CNGની કિંમત ₹84 પ્રતિ કિલોથી વધીને ₹86 પ્રતિ કિલો થઈ ગઈ છે. જ્યારે, ઘરેલું PNGની કિંમત હવે ₹52 પ્રતિ SCM થઈ ગઈ છે. 15 દિવસમાં ઇંધણના ભાવમાં આ બીજો વધારો છે. આ પહેલા 13-14 મેના રોજ પણ ગેસની કિંમતોમાં ₹2 નો વધારો કરવામાં આવ્યો હતો.

ઘરેલું ગેસની અછત અને નબળા રૂપિયાને કારણે વધ્યા ભાવ

કંપનીના અધિકારીઓએ જણાવ્યું કે ઘરેલું ગેસની ફાળવણીમાં ઘટાડો થયો છે. આ કારણે કંપનીને વધુ ખર્ચાળ બાહ્ય સ્ત્રોતો પર નિર્ભર રહેવું પડી રહ્યું છે. આ સાથે જ અમેરિકી ડોલરની સરખામણીમાં ભારતીય રૂપિયામાં આવેલા ઘટાડાએ પણ કુલ ખર્ચમાં નોંધપાત્ર વધારો કર્યો છે.

વધારા છતાં પેટ્રોલ-ડીઝલ કરતાં CNG સસ્તો છે

MGL દાવો કરે છે કે નેચરલ ગેસ હજુ પણ બજારમાં ઉપલબ્ધ સૌથી સસ્તું ઇંધણ પૈકી એક છે. કંપનીના મતે, મુંબઈમાં હાલના ઇંધણ દરોની સરખામણીમાં CNGના ઉપયોગથી પેટ્રોલની સરખામણીમાં લગભગ 45% અને ડીઝલની સરખામણીમાં લગભગ 12% બચત થાય છે.

CNG મોંઘો થયા બાદ ₹2 થી ₹3 ભાડું વધારવાની માંગ

આ વધારા બાદ ઓટો-રિક્ષા અને ટેક્સી યુનિયનોએ ₹2 થી ₹3 ભાડું વધારવાની માંગ શરૂ કરી છે. આવું એટલા માટે કારણ કે તેમની ઓપરેટિંગ કોસ્ટ વધી ગઈ છે.

મુંબઈ મેટ્રોપોલિટન રિજનમાં સીએનજી ઇકોસિસ્ટમ

સીએનજી વાહન	કુલ સંખ્યા
ખાનગી કારો	5 લાખ+
ઓટો-રિક્ષા	4.7 લાખ+
ટેક્સીઓ	1.6 લાખ+
ખાનગી બસો અને ટેમ્પો	50 હજાર+
જાહેર બસો	1900+
કુલ સીએનજી વાહન	12 લાખ+

(નોંધ: છેલ્લા એક વર્ષમાં લગભગ 2 લાખ નવા વાહનો ઉમેરાયા બાદ હવે આ ક્ષેત્રમાં સીએનજી પર નિર્ભર વાહનોની કુલ સંખ્યા 12 લાખને પાર થઈ ગઈ છે.)

દિલ્હીમાં CNG 2 અઠવાડિયામાં 4 વખત મોંઘો થયો

ઈરાન યુદ્ધ વચ્ચે દિલ્હીમાં પણ CNGના ભાવ છેલ્લા બે અઠવાડિયામાં ચાર વખત વધી ચૂક્યા છે. ઇન્દ્રપ્રસ્થ ગેસ લિમિટેડ (IGL) એ મંગળવાર, 26 મેના રોજ CNG ₹2 પ્રતિ કિલોગ્રામ મોંઘો કર્યો હતો.

નોલેજ પાર્ટ : શું હોય છે SCM?

• SCM (સ્ટાન્ડર્ડ ક્યુબિક મીટર): આ ગેસને માપવા માટેનો એક પ્રમાણભૂત એકમ છે. તેનો ઉપયોગ પાઇપ દ્વારા ઘરોમાં સપ્લાય થતી ગેસના બિલિંગ કેલ્ક્યુલેશન માટે થાય છે.

દિવ્ય ભાસ્કરને Google પર મનપસંદ સોર્સ બનાવો