IPL 2026માં સ્વિંગના સુલતાન 36 વર્ષીય ભુવનેશ્વર કુમારે 28 વિકેટ ઝડપી, જે કોઈપણ ભારતીય બોલર દ્વારા સૌથી વધુ છે. તેની આ ઉંમરને માત આપતી પરફોર્મન્સ પાછળ કોઈ જાદુ નથી, પરંતુ જીમમાં વહાવેલો પરસેવો, ભારે વજન ઉઠાવવું (વેટલિફ્ટિંગ) અને અદ્ભુત અનુશાસન છે. એક સમય હતો જ્યારે સતત ઈજાઓ (કમર, ઘૂંટણ અને પગની ઘૂંટી)ને કારણે ભુવીની આંતરરાષ્ટ્રીય કારકિર્દી થંભી ગઈ હતી. ત્રણ વર્ષ પહેલાં તેના શરીરમાં ચરબી 20%ની આસપાસ હતી. પરંતુ આજે, 36 વર્ષની ઉંમરે તેની ચરબીનું પ્રમાણ ઘટીને માત્ર 13-14% રહી ગયું છે. જોકે, તેણે પોતાના શરીરની ચરબી તો ઓછી કરી, પરંતુ વજન નહીં. તેનું વજન આજે પણ 73-74 કિલો છે, જેનો અર્થ છે કે તેણે ચરબીને સ્નાયુઓમાં બદલી છે. આ જ તાકાત અને લીન બોડીને કારણે છેલ્લા ત્રણ વર્ષથી તે સતત ઈજાગ્રસ્ત થયા વિના આખી સીઝન રમી રહ્યો છે. ભુવનેશ્વરના પર્સનલ ટ્રેનર સૂર્યા યાદવના મતે, ઈજાથી બચવા અને તાકાત વધારવા માટે ભુવીને ભારે વજન ઉઠાવવાની આદત પાડવી પડી. પહેલાં ભુવી માત્ર 40 કિલો વજન સાથે સ્ક્વૉટ્સ કરતો હતો. પરંતુ હવે તેની તાકાત બમણી થઈ ગઈ છે અને તે સરળતાથી 110-120 કિલો વજન ઉઠાવી લે છે. ભારે વજન ઉઠાવવા અને ફિટનેસ સુધારવાની સીધી અસર તેની બોલિંગ પર જોવા મળી છે. આ સીઝનની ફાઇનલમાં ભુવીની સ્પીડ લગભગ 139-140 kmph સુધી પહોંચી ગઈ હતી. ભુવી હંમેશાથી પોતાની ઇનસ્વિંગ અને આઉટસ્વિંગ માટે જાણીતો છે. પરંતુ આ વખતે તેણે એક નવું હથિયાર ‘વૉબલ સીમ’ ઉમેર્યું. બોલ સીધી લાઈનમાં આવીને બંને તરફ સ્વિંગ થાય છે. ભુવીએ પોતાની સૌથી મોટી તાકાત ‘બેકસ્પિન’ને પણ પાછી મેળવી લીધી છે. એક ફિટ શરીર માટે માત્ર જીમ જ નહીં, ડાયટ પણ જરૂરી છે. હવે ભુવી મીઠાઈઓથી સંપૂર્ણપણે દૂર રહે છે અને પોતાના શરીરના વજન કરતાં બમણું પ્રોટીન લે છે. તેના ડાયટમાં પ્રોટીન બાર, પ્રોટીન શેક, ઘરના બનાવેલા ચીલા અને જરૂર પડ્યે ઇંડા સામેલ છે. સોશિયલ મીડિયાની ચમકદમકથી દૂર રહેનાર ભુવનેશ્વર કુમાર રોજ 5 થી 7 કલાક ક્રિકેટ અને ફિટનેસને આપે છે. આ જ સખત મહેનતનું પરિણામ છે કે આજે ફરી એકવાર ટીમ ઈન્ડિયામાં તેના કમબેકની ચર્ચાઓ તેજ બની ગઈ છે. દિવસમાં દોઢ કલાક બેટિંગ પ્રેક્ટિસ પણ, તાવમાં પણ મેદાન છોડ્યું નથી ભુવી બેટિંગ પર પણ ખૂબ મહેનત કરી રહ્યો છે. મુંબઈ ઈન્ડિયન્સ સામે પહેલા જ બોલ પર છગ્ગાએ તેની ટીમને રોમાંચક જીત અપાવી. તે દરરોજ 1 થી 1.5 કલાક માત્ર બેટિંગની પ્રેક્ટિસ કરે છે. યુપી T20 લીગનો એક કિસ્સો તેની લગનને દર્શાવે છે. તેની આખી ટીમ વાયરલની ઝપેટમાં હતી અને ભુવીને મેદાન પર જ ગ્લુકોઝ ચઢાવવું પડ્યું. ટ્રેનરે આરામ કરવાનું કહ્યું, પરંતુ બીજા દિવસે તે મેચ રમવા માટે તૈયાર હતો. તેનો જવાબ હતો ‘મને ક્રિકેટ ગમે છે, બોલિંગ ગમે છે. તેથી હું રમું છું.’